Original text in parallel with Skeat’s version

	INCIPIT VITA HAUELOK QUONDAM REX ANGLIE ET DENEMARCHIE

	Original	As edited by Skeat

1	Herknet to me gode men	Herkneth to me, gode men,
2	Wiues maydnes and alle men	Wiues, maydnes, and alle men,
3	Of a tale þat ich you wile telle	Of a tale ich you wil telle,
4	Wo so it wile here and þer to duelle	Hwo-so it wile here, and þer-to duelle.
5	Þe tale is of hauelok i maked	Þe tale of Hauelok is i-maked;
6	Wil he was litel he yede ful naked	Hwil he was litel, he yedẹ ful naked.
7	Hauelok was a ful god gome	Hauelok was a ful god gome,
8	He was ful god in eueri trome	He was ful god in eueri trome,
9	He was þe wicteste man at nede	He was þe wihtest man at nede
10	Þat þurte riden on ani stede	Þat þurte riden on ani stede.
11	Þat ye mowen nou y here	Þat ye mowen nou y-here,
12	And þe tale ye mowen y lere	And þe tale ye mowẹn y-lere.
13	At þe biginnig of vre tale	At þe biginning of vre tale,
14	Fil me a cuppe of ful god ale	Fil me a cuppe of ful god ale;
15	And wile drinken her y spelle	And y wilẹ drinken, er y spelle,
16	Þat crist vs shilde alle fro helle	Þat Crist vs shilde alle fro helle!
17	Krist late vs heuere so for to do	Krist late vs euere so to do
18	Þat we moten comen him to	Þat we moten comen him to;
19	And wit þat it mote ben so	And, with-þat it mote ben so,
20	Benedicamus domino	Benedicamus domino!
21	Here y schal biginnen a rym	Here y schal biginnen a rym,
22	Krist us yeue wel god fyn	Krist us yeue wel god fyn!
23	The rym is maked of hauelok	The rym is maked of Hauelok,
24	A stalworþi man in a flok	A stalworþi man in a flok;
25	He was þe stalworþeste man at nede	He was þe wihtest man at nede
26	Þat may riden on ani stede	Þat may riden on ani stede.

27	It was a king bi are dawes	It was a king bi are dawes,
28	Þat in his time were gode lawes	Þat in his time werẹ gode lawes
29	He dede maken an ful wel holden	He dede maken and ful wel holden;
30	Hym louede yung him louede holde	Him louẹde yung, him louẹden olde,
31	Erl and barun dreng and kayn	Erl and barun, dreng and thayn,
32	Knict bondeman and swain	Kniht, and bondeman, and swain,
33	Wydues maydnes prestes and clerkes	Wydues, maydnes, prestes and clerkes,
34	And al for hise gode werkes	And al for hise gode werkes.
35	He louede god with al his micth	He louẹde god with al his miht,
36	And holi kirke and soth ant ricth	And holi kirke, and soth, and riht;
37	Rirth wise men he louede alle	Riht-wise men he louede alle,
38	And oueral made hem forto calle	And oueral made hem forto calle;
39	Wreieres and wrobberes made he falle	Wreierẹs and robberẹs made he falle,
40	And hated hem so man doth galle	And hated hem so man doth galle;
41	Vtlawes and theues made he bynde	Vtlawes and theues made he bynde,
42	Alle that he micthe fynde	Alle that he mihte fynde,
43	And heye hengen on galwe tre	And heye hengen on galwe-tre;
44	For hem ne yede gold ne fe	For hem ne yede gold ne fe.
45	In þat time a man þat bore	In þat time a man þat bore
46		Wel fifty pund, y wot, or more,
47	Of red gold up on hiis bac	Of rede gold up-on his bac,
48	In a male with or blac	In a male hwit or blac,
49	Ne funde he non þat him misseyde	Ne funde he non þat him misseyde,
50	N with iuele on hond leyde	Ne hond on him with iuele leyde.
51	Þanne micthe chapmen fare	Þanne mihte chapmen fare
52	Þuruth englond wit here ware	Þurhut Englond with here ware,
53	And baldelike beye and sellen	And baldelike beye and sellen,
54	Oueral þer he wilen dwellen	Oueral þer he wilen dwellen,
55	In gode burwes and þer fram	In gode burwes, and þer-fram
56	Ne funden he non þat dede hem sham	Ne funden he non þat dede hem sham,
57	Þat he ne weren sone to sorwe brouth	Þat he ne weren to sorwe brouht,
58	An pouere maked and browt to nouth	And pouere maked, and browht to nouht.
59	Þanne was engelond athayse	Þanne was Engelond at ayse;
60	Michel was svich a king to preyse	Michel was svich a king to preyse,
61	Þat held so englond in grith	Þat held so Engelond in grith!
62	Krist of heuene was him with	Krist of heuẹne was him with.
63	He was engelondes blome	He was Engelondes blome;
64	Was non so bold lond to rome	Was non so bold þe lond to rome,
65	Þat durste upon his bringhe	Þat durste upon his menie bringe
66	Hunger ne here wicke þinghe	Hunger, ne othere wicke þinge.
67	Hwan he felede hise foos	Hwan he felẹde hise foos,
68	He made hem lurken and crepen in wros	He made hem lurken, and crepen in wros:
69	Þe hidden hem alle and helden hem stille	Þei hidden hem alle, and helden hem stille,
70	And diden al his herte wille	And diden al his herte wille.
71	Ricth he louede of alle þinge	Riht he louẹde of alle þinge,
72	To wronge micht him no man bringe	To wronge micht him no man bringe,
73	Ne for siluer ne for gold	Ne for siluer, ne for gold:-
74	So was he his soule hold	So was he of his soule hold.
75	To þe faderles was he rath	To þe faderles was he rath,
76	Wo so dede hem wrong or lath	Hwo-so dede hem wrong or lath,
77	Were it clerc or were it knicth	Were it clerc, or were it kniht,
78	He dede hem sone to hauen ricth	He dede hem sone to hauen riht;
79	And wo diden widuen wrong	And hwo-so dide widuen wrong,
80	Were he neure knicth so strong	Were he neure kniht so strong
81	Þat he ne made him sone kesten	Þat he ne made him sone kesten
82	And in feteres ful faste festen	In feteres, and ful faste festen;
83	And wo so dide maydne shame	And hwo-so dide maydne shame
84	Of hire bodi or brouth in blame	Of hire bodi, or brouht in blame,
85	Bute it were bi hire wille	Bute it were bi hire wille,
86	Ke made him sone of limes spille	He made him sone of limes spille.
87	Ke waste beste knith at nede	He was þe beste kniht at nede
88	Þat heuere micthe riden on stede	Þat euere mihte riden on stede,
89	Or wepne wagge or folc vt lede	Or wepne wagge, or folc vt lede;
90	Of knith ne hauede he neuere drede	Of kniht ne hauẹde he neuere drede,
91	Þat he ne sprong forth so sparke of glede	Þat he nẹ sprong forth so sparke of glede,
92	And lete him of hise hand dede	And lete him knawe of hisẹ hand-dede,
93	Hw he couþe with wepne spede	Hu he couþe with wepne spede;
94	And oþer he refte him hors or wede	And oþer he refte him hors or wede,
95	Or made him sone handes sprede	Or made him sone handes sprede,
96	And louerd merci loude grede	And ‘louerd, merci!’ loude grede.
97	He was large and no wicth gnede	He was large, and no wiht gnede;
98	Hauede he non so god brede	Hauẹde he neure so god brede,
99	Ne on his bord non so god shrede	Ne on his bord non so god shrede,
100	Þat he ne wolde þorwit fede	Þat he ne wolde þorwith fede
101	Poure þat on fote yede	Poure þat on fote yede;
102	Forto hauen of him þe mede	Forto hauen of him þe mede
103	Þat for vs wolde on rode blede	Þat for vs wolde on rode blede,
104	Crist that al kan wisse and rede	Crist, that al kan wisse and rede
105	Þat euere woneth in ani þede	Þat euere woneth in ani þede.
106	Þe king was hoten aþelwold	Þe king was hoten Aþelwold,
107	Of word of wepne he was bold	Of word, of wepne he was bold;
108	In engeland was neure knicth	In Engeland was neure kniht,
109	Þat betere hel þe lond to ricth	Þat betere held þe lond to riht.
110	Of his bodi ne hauede he eyr	Of his bodi ne hauẹde he eyr
111	Bute a mayden swiþe fayr	Bute a mayden swiþe fayr,
112	Þat was so yung þat sho ne couþe	Þat was so yung þat sho ne couþe
113	Gon on fote ne speke wit mouþe	Gon on fote, ne speke with mouþe.
114	Þan him tok an iuel strong	Þan him tok an iuel strong,
115	Þat he we wiste and under fong	Þat he wel wiste, and under-fond,
116	Þat his deth was comen him on	Þat his deth was comen him on:
117	And seyde crist wat shal y don	And seyde, ‘Crist, hwat shal y don?
118	Louerd wat shal me to rede	Louerd, hwat shal me to rede?
119	I woth ful wel ich haue mi mede	I wot ful wel ich haue mi mede.
120	W shal nou mi douhter fare	Hu shal nou mi douhter fare?
121	Of hire haue ich michel kare	Of hire haue ich michel kare;
122	Sho is mikel in mi þouth	Sho is mikel in mi þouht,
123	Of me self is me rith nowt	Of me self is me riht nowht.
124	No selcouth is þou me be wo	No selcouth is, þouh me be wo;
125	Sho ne kan speke ne sho kan go	Sho nẹ kan speke, ne sho kan go.
126	Yif scho couþe on horse ride	Yif scho couþe on horse ride,
127	And a thousande men bi hire syde	And a thousand men bi hire syde;
128	And sho were comen in til helde	And sho werẹ comen in-til elde,
129	And engelond sho couþe welde	And Engelond sho couþe welde;
130	And don hem of þar hire were queme	And don of hem þat hirẹ werẹ queme,
131	An hire bodi couþe yeme	And hire bodi couþe yeme,
132	Ne wolde me neuere iuele like	Ne wolde me neuere iuelẹ like,
133	Me þou ich were in heuene riche	Ne þouh ich were in heuenẹ-rike!’

134	Quanne he hauede þis pleinte maked	Quanne he hauẹde þis pleinte maked,
135	Þer after stronglike quaked	Þer-after stronglike he quaked.
136	He sende writes sone on on	He sende writes sone on-on
137	After his erles euere ich on	After his erles euere-ich on;
138	And after hise baruns riche and poure	And after hisẹ baruns, riche and poure,
139	Fro rokesburw al into douere	Fro Rokesburw al into Douere,
140	That he shulden comen swiþe	That he shulden comen swiþe
141	Til him that was ful vnbliþe	Til him, that was ful vnbliþe,
142	To þat stede þe he lay	To þat stede þer he lay
143	In harde bondes nicth and day	In harde bondes, niht and day.
144	He was so faste wit yuel fest	He was so faste with yuel fest,
145	Þat he ne mouthe hauen no rest	Þat he ne mouhte hauen no rest;
146	He ne mouthe no mete hete	He ne mouhte no mete ete,
147	Ne he ne mouchte no lyþe gete	Ne he ne mouhte no lyþe gete;
148	Ne non of his iuel þat couþe red	Ne non of his iuel couþe red;
149	Of him ne was nouth buten ded	Of him ne was nouht buten ded.

150	Alle þat þe writes herden	Alle þat þe writes herden
151	Sorful an sori til him ferden	Sorful and sori til him ferden;
152	He wrungen hondes and wepen sore	He wrungen hondes, and wepen sore,
153	And yerne preyden cristes hore	And yerne preyden Cristes ore,
154	Þat he turnen him	Þat he wolde turnen him
155	Vt of þat yuel þat was so grim	Vt of þat yuel þat was so grim!
156	Þanne he weren comen alle	Þanne he weren comen alle
157	Bifor þe king into the halle	Bifor þe king into the halle,
158	At winchestre þer he lay	At Winchéstre þer he lay:
159	Welcome he seyde be ye ay	‘Welcome,’ he seyde, ‘be ye ay!
160	Ful michel þank kan yow	Ful michel þanke kan y yow
161	That ye aren comen to me now	That ye arẹn comen to me now!’

162	Quanne he weren alle set	Quanne he weren alle set,
163	And þe king aueden i gret	And þe king hauẹden i-gret,
164	He greten and gouleden and gouen hem ille	He greten, and gouleden, and gouen hem ille,
165	And he bad hem alle ben stille	And he bad hem allẹ ben stille;
166	And seyde þat greting helpeth nouth	And seyde, ‘þat greting helpeth nouht,
167	For al to dede am ich brouth	For al to dede am ich brouht,
168	Bute nov ye sen þat i shal deye	Butẹ nou ye sen þat i shal deye,
169	Nou ich wille you alle preye	Nou ich willẹ you alle preye
170	Of mi douther þat shal be	Of mi douhter þat shal be
171	Yure leuedi after me	Yure leuẹdi after me,
172	Wo may yemen hire so longe	Hwo may yemen hire so longe,
173	Boþen hire and engelonde	Boþen hire and Engelonde,
174	Til þat she wman of helde	Til þat she wuman be of elde,
175	And þa she mowe yemen and welde	And þat she mowe hir yemen and welde?’
176	He ansuereden and seyden an on	He ansuerẹden, and seyden an-on,
177	Bi crist and bi seint ion	Bi Iesu Crist and bi seint Ion,
178	That þerl godrigh of cornwayle	That þerl Godrigh of Cornwayle
179	Was trewe man wit uten faile	Was trewe man, with-uten faile;
180	Wis man of red wis man of dede	Wis man of red, wis man of dede,
181	And men haueden of him mikel drede	And men hauẹden of him mikel drede.
182	He may hire alþer best yeme	‘He may alþer-best hirẹ yeme,
183	Til þat she mowe wel ben quene	Til þat she mowe wel ben quene.’

184	Þe king was payed of that Rede	Þe king was payed of that rede;
185	A wol fair cloth bringen he dede	A wel fair cloth bringen he dede,
186	And þer on leyde þe messebok	And þer-on leyde þe messebok,
187	Þe caliz and þe pateyn ok	Þe caliz, and þe pateyn ok,
188	Þe corporaus þe messe gere	Þe corporaus, þe messe-gere;
189	Þer on he garte þe erl suere	Þer-on he garte þe erl suere,
190	Þat he sholde yemen hire wel	Þat he sholde yemen hirẹ wel,
191	With uten lac wit uten tel	With-uten lac, with-uten tel,
192	Til þat she were tuelf winter hold	Til þat she were tuelf winter old,
193	And of speche were bold	And of speche were bold;
194	And þat she covþe of curteysye	And þat she couþe of curteysye
195	Gon and speken of luue drurye	Don, and speken of luue-drurye;
196	And til þat she louen mithe	And til þat she louen mouhte
197	Wom so hire to gode þoucte	Hwom so hirẹ to gode þouhte;
198	And þat he shulde hire yeue	And þat he shulde hire yeue
199	Þe beste man þat micthe liue	Þe hexte man þat mihte liue,
200	Þe beste fayreste the strangest ok	Þe beste, fayrestẹ, the strangest ok:-
201	Þat dede he him sweren on þe bok	Þat dede he him sweren on þe bok.
202	And þanne shulde he engelond	And þanne shulde he Engelond
203	Al bitechen in to hire hond	Al bitechen in-to hirẹ hond,

204	Ouanne þat was sworn on his wise	Quanne þat was sworn on þis wise,
205	Þe king dede þe mayden arise	Þe king dede þe mayden arise,
206	And þe erl hire bitaucte	And þe erl hirẹ bitauhte,
207	And al the lond he euere awcte	And al the lond he euere awhte
208	Engelonde eueri del	Of Engelonde, eueri del;
209	And preide he shulde yeme hire wel	And preide, he shulde yeme hirẹ wel.

210	Þe king ne mowcte don no more	Þe king ne mowhte don no more,
211	But yerne preyede godes ore	But yerne preyẹde Godes ore;
212	And dede him hoslen wel and shriue	And dede him hoslen wel and shriue
213	I woth fif hundred siþes and fiue	I wot, fif hundred siþe and fiue;
214	An ofte dede him sore swinge	And ofte dede him sore swinge,
215	And wit hondes smerte dinge	And with hondes smerte dinge;
216	So þat þe blod ran of his fleys	So þat þe blod ran of his fleysh,
217	Þat tendre was and swiþe neys	Þat tendre was, and swiþe neysh....
218	And sone gaf it euere il del	And sone gaf it euere-ilk del;
219	He made his quiste swiþe wel	He made his quiste swiþe wel.
220	Wan it was gouen ne micte men finde	Hwan it was yeuen, ne mihtẹ men finde
221	So mikel men micte him in winde	So mikel men mihte him in winde,
222	Of his in arke ne in chiste	Of his in arke, ne in chiste,
223	In engelond þat noman wiste	In Engelond, þat noman wiste:
224	For al was youen faire and wel	For al was yeuen, faire and wel,
225	Þat him was leued no catel	Þat him was leued no catel.

226	Þanne he hauede ben ofte swngen	Þanne he hauẹde ben ofte swungen,
227	Ofte shriuen and ofte dungen	Ofte shriuen, and ofte dungen,
228	In manus tuas loude he seyde	‘In manus tuas,’ loude he seyde,
229	Her þat he þe speche leyde	Er þat he þe speche leyde;
230	To iesu crist bigan to calle	To Iesu Crist bigan to calle,
231	And deyede biforn his heymen alle	And deyẹde biforn his heymen alle.
232	Þan he was ded þere micte men se	Þan he was ded, þerẹ mihtẹ men se
233	Þe meste sorwe that micte be	Þe meste sorwe that mihte be;
234	Þer was sobbing siking and sor	Þer was sobbing, siking, and sor,
235	Handes wringing and drawing bi hor	Handes wringing, and drawing bi hor.
236	Alle greten swiþe sore	Alle greten swiþe sore,
237	Riche and poure þat þere wore	Riche and poure þat þerẹ wore;
238	An mikel sorwe haueden alle	And mikel sorwe hauẹden alle,
239	Leuedyes in boure knictes in halle	Leuẹdyes in boure, knihtes in halle.

240	Quan þat sorwe was somdel laten	Quan þat sorwe was somdel laten,
241	And he haueden longe graten	And he hauẹden longe graten,
242	Belles deden he sone ringen	Belles deden he sone ringen,
243	Monkes and prestes messe singen	Monkes and prestes messe singen;
244	And sauteres deden he manie reden	And sauteres deden he manie reden,
245	Þat god self shulde his soule leden	Þat God self shulde his soule leden
246	Into heuene biforn his sone	Into heuenẹ, biforn his sone,
247	And þer wit uten hende wone	And þer with-uten ende wone.
248	Þan he was to þe erþe brouth	Þan he was to þe erþe brouht,
249	Þe riche erl ne foryat nouth	Þe riche erl ne foryat nouht,
250	Þat he ne dede al engelond	Þat he ne dede al Engelond
251	Sone sayse intil his hond	Sone sayse intil his hond;
252	And in þe castels leth he do	And in þe castels let he do
253	Þe knictes he micte tristen to	Þe knihtes he mihte tristen to;
254	And alle þe englis dede he swere	And alle þe Englis dede he sweren,
255	Þat he shulden him ghod fey beren	Þat he him shulden god fey beren;
256	He yaf alle men þat god þoucte	He yaf allẹ men þat god him þouhte,
257	Liuen and deyen til þat him moucte	Liuen and deyen til þat he mouhte,
258	Til þat þe kinges dowter wore	Til þat þe kinges dowhter wore
259	Tuenti winter hold and more	Tuenti winter old, and more.

260	Þanne he hauede taken þis oth	Þanne he hauẹde taken þis oth
261	Of erles baruns lef and loth	Of erles, baruns, lef and loth,
262	Of knictes cherles fre and þewe	Of knihtes, cherles, fre and þewe,
263	Iustises dede he maken newe	Iustíses dede he maken newe,
264	Al engelond to faren þorw	Al Engelond to faren þorw,
265	Fro douere into rokesborw	Fro Douere into Rokesborw.
266	Schireues he sette bedels and greyues	Schiréues he sette, bedels, and greyues,
267	Grith sergeans wit longe gleyues	Grith-sergeans, with longe gleyues,
268	To yemen wilde wodes and paþes	To yemen wilde wodes and paþes
269	Fro wicke men that wolde don scaþes	Fro wicke men, that woldẹ don scaþes;
270	And forto hauen alle at his cri	And forto hauen alle at his cri,
271	At his wille at his merci	At his wille, at his merci;
272	Þat non durste ben him ageyn	Þat non him durste ben ageyn,
273	Erl ne barun knict ne sweyn	Erl ne barun, kniht ne sweyn.
274	Wislike for soth was him wel	Wislikẹ, for sothe, was him wel
275	Of folc of wepne of catel	Of folc, of wepne, of catel.
276	Soþlike in a lite þrawe	Soþlike, in a litel þrawe,
277	Al engelond of him stod awe	Al Engelond of him stod awe;
278	Al engelond was of him adrad	Al Engelond was of him adrad
279	So his þe beste fro þe gad	So is þe beste fro þe gad.

280	Þe kinges douther bigan þriue	Þe kinges douhter gan to þriue,
281	And wex þe fayrest wman on liue	And wex þe fayrest wuman on liue.
282	Of alle þewes w she wis	Of alle þewes was she wis,
283	Þat gode weren and of pris	Þat gode weren, and of pris;
284	Þe mayden goldeboru was hoten	Þe mayden Goldeboru was hoten;
285	For hire was mani a ter igroten	For hirẹ was mani a ter igroten.

286	Quanne þe erl godrich him herde	Quanne þe Erl Godrich him herde
287	Of þat mayden hw we he ferde	Of þat mayden, hu wel she ferde;
288	Hw wis sho was w chaste hw fayr	Hu wis sho was, hu chaste, hu fayr,
289	And þat sho was þe rithe eyr	And þat sho was þe rihte eyr
290	Of engelond of al þe rike	Of Engelond, of al þe rike:-
291	Þo bigan godrich to sike	Þo bigan Godrich to sike,
292	And seyde weþer she sholde be	And seyde, ‘Hweþer she sholde be
293	Quen and leuedi ouer me	Quen and leuẹdi ouer me?
294	Hweþer sho sholde al engelond	Hweþer sho sholde al Engelond
295	And me and mine hauen in hire hond	And me, and mine, hauen in hire hond?
296	Daþeit hwo it hire thaue	Daþeit hwo it hire thaue!
297	Shal sho it neuere more haue	Shal sho it neuere more haue.
298	Sholde ic yeue a fol a þerne	Sholde ic yeue a fol, a þerne,
299	Engelond þou sho it yerne	Engelond, þouh sho it yerne?
300	Daþeit hwo it hire yeue	Daþeit hwo it hire yeue
301	Euere more hwil i liue	Euere-more hwil i liue!
302	Sho is waxen alto prud	Sho is waxen al to prud,
303	For gode metes and noble shrud	For gode metes, and noble shrud,
304	Þat hic haue youen hire to offte	Þat ic haue youen hirẹ to ofte;
305	Hic haue yemed hire to softe	Ic haue yemed hirẹ to softe.
306	Shal it nouth ben als sho þenkes	Shal it nouht ben als sho þenkes:
307	Hope maketh fol man ofte blenkes	“Hopẹ maketh fol man ofte blenkes.”
308	Ich haue a sone a ful fayr knaue	Ich haue a sone, a ful fayr knaue,
309	He shal engelond al haue	He shal Engelond al haue.
310	He shal king he shal ben sire	He shal ben king, he shal ben sire,
311	So brouke i euere mi blake swire	So brouke i euere mi blake swire!’

312	Hwan þis trayson was al þouth	Hwan þis trayson was al þouht,
313	Of his oth ne was him nouth	Of his oth ne was him nouht.
314	He let his oth al ouer ga	He let his oth al ouer-ga,
315	Þerof ne yaf he nouth a stra	Þerof ne yaf he nouht a stra;
316	But sone dede hire fete	But sone dede hire fete,
317	Er he wolde heten ani mete	Er he wolde eten ani mete.
318	Fro winchestre þer sho was	Fro Winchéstre, þer sho was,
319	Also a wicke traytur iudas	Also a wicke traytúr Iudas;
320	And dede leden hire to doure	And dede leden hirẹ to Doure,
321	Þat standeth on þe seis oure	Þat standeth on þe seis oure;
322	And þerhinne dede hire fede	And þerinne dede hirẹ fede
323	Pourelike in feble wede	Pourelike in feble wede.
324	Þe castel dede he yemen so	Þe castel dede he yemen so
325	Þat non ne micte comen hire to	Þat non ne mihte comen hirẹ to
326	Of hire frend with to speken	Of hire frend, with hir to speken,
327	Þat heuere micte hire bale wreken	Þat euere mihte hirẹ bale wreken.

328	Of goldeb shul we nou laten	Of Goldeboru shul we nou laten,
329	Þat nouth ne blinneth forto graten	Þat nouht ne blinneth forto graten
330	Þet sho liggeth in prisoun	Þet sho liggeth in prisoun:
331	Iesu crist that lazarun	Iesu Crist, that Lazarun
332	To liue broucte fro dede bondes	To liue brouhte fro dede bondes;
333	He lese hire wit hise hondes	He lese hirẹ with hise hondes;
334	And leue sho mo him y se	And leue sho mote him y-se
335	Heye hangen on galwe tre	Heye hangen on galwe-tre,
336	Þat hire haued in sorwe brouth	Þat hire hauẹd in sorwe brouht,
337	So as sho ne misdede nouth	So as sho ne misdede nouht!

338	Sawe nou forth in hure spelle	Say we nou forth in ure spellẹ!
339	In þat time so it bifelle	In þat time, so it bifellẹ,
340	Was in þe lon of denemark	Was in þe lond of Denemark
341	A riche king and swyþe stark	A riche king, and swyþe stark.
342	Þ name of him was birkabeyn	Þe name of him was Birkabeyn,
343	He hauede mani knict and sueyn	He hauẹde mani kniht and sueyn,
344	He was fayr man and wicth	He was fayr man, and swipe wiht,
345	Of bodi he was þe beste knicth	Of bodi he was þe beste kniht
346	Þat euere micte leden uth here	Þat euere mihte leden ut here,
347	Or stede onne ride or handlen spere	Or stede on ride, or handlen spere.
348	Þre children he hauede bi his wif	Þre children hauẹde he bi his wif,
349	He hem louede so his lif	He hem louẹde so his lif.
350	He hauede a sone douhtres two	He hauẹde a sone and douhtres two,
351	Swiþe fayre as fel it so	Swiþe fayre, as fel it so.
352	He þat wile non forbere	He þat wile non forbere,
353	Riche ne poure king ne kaysere	Riche ne poure, king ne kaysére,
354	Deth him tok þan he bes wolde	Deth him tok þan he best wolde
355	Liuen but hyse dayes were fulde	Liuen, but hysẹ dayes werẹ fulde;
356	Þat he ne moucte no more liue	Þat he ne mouhte no more liue,
357	For gol ne siluer ne for no gyue	For gold ne siluer, ne for no gyue.

358	Hwan he þat wiste raþe he sende	Hwan he þat wiste, raþe he sende
359	After prestes fer an hende	After prestes fer and hende,
360	Chanounes gode and monkes boþe	Chanounes gode, and monkes beþe,
361	Him fort to wisse and to rede	Him for to wisse, and to rede
362	Him for to hoslon an forto shriue	Him for to hoslen, and forto shriue,
363	Hwil his bodi were on liue	Hwil his bodi were on liue.

364	Hwan he was hosled and shriuen	Hwan he was hosled wel and shriuen,
365	His quiste maked and for him gyuen	His quiste maked, and for him gyuen,
366	His knictes dede he alle site	His knihtes dede he alle site;
367	For þorw hem he wolde wite	For þorw hem he wolde wite
368	Hwo micte yeme hise children yunge	Hwo mihte yeme hisẹ children yunge,
369	Til þat he kouþen speken wit tunge	Til þat he kouþen speken with tunge;
370	Speken and gangen on horse riden	Speken and gangen, on horse riden,
371	Knictes an sweynes bi here siden	Knihtes and sweynes bi herẹ siden.
372	He spoken þer offe and chosen sone	He spoken þer-of, and chosen sone
373	A riche man was under mone	A riche man þat, under mone,
374	Was þe trewest þat he wende	Was þe trewest, as he wende,
375	Godard þe kinges oune frende	Godard, þe kinges oune frende;
376	And seyden he moucthe hem best loke	And seyden, he mouchte hem best loke,
377	Yif þat he hem vndertoke	Yif þat he hem vndertoke,
378	Til hise sone mouthe bere	Til hisẹ sone mouhte bere
379	Helm on heued and leden vt here	Helm on heued, and leden vt here,
380	In his hand a spere stark	In his hand a spere stark,
381	And king ben maked of denemark	And king ben maked of Denemark.
382	He wel trowede þat he seyde	He wel trowedẹ þat he seyde,
383	And on godard handes leyde	And on Godard handes leyde;
384	And seyde here bi teche i þe	And seyde, ‘Herẹ bi-teche i þe
385	Mine children alle þre	Mine children alle þre,
386	Al denemark and al mi fe	Al Denemark, and al mi fe,
387	Til þat mi sone of helde be	Til þat mi sone of elde be;
388	But þat ich wille þat þo suere	But þat ich wille, þat þou suere
389	On auter and on messe gere	On auter, and on messe-gere,
390	On þe belles þat men ringes	On þe belles þat men ringes,
391	On messe bok þe prest on singes	On messe-bok þe prest on singes,
392	Þat þou mine children shalt we yeme	Þat þou minẹ children shalt wel yeme,
393	Þat hire kin be ful wel queme	Þat hire kin be ful wel queme,
394	Til mi sone mowe ben knicth	Til mi sone mowẹ ben kniht;
395	Þanne biteche him þo his ricth	Þannẹ biteche him þo his riht,
396	Denemark and þat þertil longes	Denemark, and þat þertil longes,
397	Casteles and tunes wodes and wonges	Castelẹs and tunes, wodes and wonges.’

398	Godard stirt up an swor al þat	Godard stirt up, and swor al þat
399	þe king him bad and siþen sat	þe king him bad, and siþen sat
400	Bi þe knictes þat þer ware	Bi þe knihtes, þat þer ware,
401	Þat wepen alle swiþe sare	Þat wepen alle swiþe sare
402	For þe king þat deide sone	For þe king þat deide sone:
403	Iesu crist that makede mone	Iesu Crist, that makedẹ mone
404	On þe mirke nith to shine	On þe mirke niht to shine,
405	Wite his soule fro helle pine	Wite his soule fro helle pine;
406	And leue þat it mote wone	And leue þat it mote wone
407	In heuene riche with godes sone	In heuenẹ-riche with Godes sone!

408	Hwan birkabeyn was leyd in graue	Hwan Birkabeyn was leyd in graue,
409	þe erl dede sone take þe knaue	þe erl dede sone takẹ þe knaue,
410	Hauelok þat was þe eir	Hauelok, þat was þe eir,
411	Swanborow his sister Helfled þe toþer	Swanborow, his sister, Elfled, þe fair,
412	And in þe castel dede he hem do	And in þe castel dede hem do,
413	Þer non ne micte hem comen to	Þer non ne mihte hem comen to
414	Of here kyn þer þei sperd wore	Of here kyn, þer þei sperd wore;
415	Þer he greten ofte sore	Þer he greten ofte sore,
416	Boþe for hunger and for kold	Boþe for hunger and for kold,
417	Or he weren þre winter hold	Or he werẹn þre winter old.
418	Feblelike he gaf hem cloþes	Feblelike he gaf hem cloþes,
419	He ne yaf a note of hise oþes	He nẹ yaf a note of alle hise oþes;
420	He hem cloþede rith ne fedde	He hem ne cloþedẹ riht, ne fedde,
421	Ne hem ne dede richelike be bedde	Ne hem dedẹ richelike be-bedde.
422	Þanne godard was sikerlike	Þanne Godard was sikerlike
423	Vnder god þe moste swike	Vnder God þe moste swike,
424	Þat eure in erþe shaped was	Þat eure in erþe shaped was,
425	With uten on þe wike iudas	With-uten on, þe wike Iudas.
426	Haue he þe malisun to day	Haue he þe malisun to-day
427	Of alle þat eure speken may	Of alle þat eure speken may!
428	Of patriark and of pope	Of patriarke, and of pope,
429	And of prest with loken kope	And of prest with loken kope,
430	Of monekes and hermites boþe	Of monẹkes and hermítes boþe!
431	And of þe leue holi rode	And of þe leue holi rode
432	Þat god him selue ran on blode	Þar God him-selue ran on blode!
433	Crist warie him with his mouth	Crist him warie with his mouth!
434	Waried wrthe he of norþ and suth	Waried wurthe he of norþ and suth!
435	Offe alle man þat speken kunne	Of alle men, þat speken kunne,
436	Of crist þat maude mone and sunne	Of Crist, þat made mone and sunne
437	Þanne he hauede of al þe lond	Þanne he hauẹde of al þe lond
438	Al þe folk tilled in til his hond	Þe folk al tilled in-til his hond,
439	And alle haueden sworen him oth	And alle hauẹden sworen him oth,
440	Riche and poure lef and loth	Riche and poure, lef and loth,
441	Þat he sholden hise wille freme	Þat he sholden hisẹ wille freme,
442	And þat he shulde him nouth greme	And þat he shulden him nouht greme,
443	He þouthe a ful strong trechery	He þouhte a ful strong trechery,
444	A trayson and a felony	A trayson and a felony,
445	Of þe children forto make	Of þe children forto make:
446	Þe deuel of helle him sone take	Þe deuel of helle him sone take!

447	Hwan þat was þouth onon he ferde	Hwan þat was þouht, onon he ferde
448	To þe tour þer he woren sperde	To þe tour þer he worẹn sperde,
449	Þer he greten for hunger and cold	Þer he greten for hunger and cold:
450	Þe knaue þat was sumdel bold	Þe knaue, þat was sumdel bold,
451	Kam him ageyn on knes him sette	Kam him ageyn, on knes him sette,
452	And godard ful feyre he þer grette	And Godard ful feyre he þer grette.
453	And godard seyde wat is yw	And Godard seyde, ‘What is you?
454	Hwi grete ye and goulen nou	Hwi grete ye and goulen nou?’
455	For us hungreth swiþe sore	‘For us hungreth swiþe sore:’-
456	Seyden he wolden more	Seyden, he wolden hauen more:-
457	We ne haue to hete ne we ne haue	‘We nẹ hauẹ to ete, ne we ne haue
458	Herinne neyther knith ne knaue	Herinne neyther kniht ne knaue
459	Þat yeueth us drinken ne no mete	Þat yeuẹth us drinken, ne no mete,
460	Haluendel þat we moun ete	Haluendel þat we moun ete.
461	Wo is us þat we weren born	Wo is us þat we werẹn born!
462	Weilawei nis it no korn	Weilawei! nis it no korn
463	Þat men micte maken of bred	Þat men mihte maken of bred?
464	Þs hungreth we aren ney ded	Us hungreth so, we arẹn ney ded.’

465	Godard herde here wa	Godard herde here wa,
466	Ther offe yaf he nouth a stra	Ther-of yaf he nouht a stra,
467	But tok þe maydnes bothe samen	But tok þe maydnes bothe samen,
468	Al so it were up on hiis gamen	Al-so it were up-on his gamen;
469	Al so he wolde with hem leyke	Al-so he wolde with hem leyke,
470	Þat weren for hunger grene and bleike	Þat werẹn for hunger grene and bleike.
471	Of boþen he karf on two here þrotes	Of boþen he shar on-two here þrotes,
472	And siþen hem alto grotes	And siþen karf hem alto grotes.
473	Þer was sorwe wo so it sawe	Þer was sorwe, hwo so it sawe,
474	Hwan þe children bi þ wawe	Hwan þe children bi þe wawe
475	Leyen and sprauleden in þe blod	Leyen and sprauleden in þe blod:
476	Hauelok it saw and þe bi stod	Hauelok it saw, and þer-bi stod.
477	Ful sori was þat seli knaue	Ful sori was þat seli knaue,
478	Mikel dred he mouthe haue	Mikel dred he mouhte haue;
479	For at hise herte he saw a knif	For at hisẹ herte he saw a knif,
480	For to reuen him hise lyf	For to reuen him hisẹ lyf.
481	But þe kaue þat litel was	But þe knaue, þat litel was,
482	He knelede bifor þat iudas	He kneledẹ bifore þat Iudas,
483	And seyde louerd merci nov	And seyde, ‘Louerd, merci nou!
484	Manrede louerd biddi you	Manrede, louerd, biddi you!
485	Al denemark i wile you yeue	Al Denemark i wilẹ you yeue,
486	To þat forward þu late me liue	To þat forward þu latẹ me liue;
487	Here hi wile on boke swere	Here i wile on boke swere,
488	Þat neure more ne shal i bere	Þat neure more ne shal i bere
489	Ayen þe louerd shel ne spere	Ayen þe, louerd, sheld ne spere,
490	Ne oþer wepne bere that may you dere	Ne oþer wepne that may you dere.
491	Louerd haue merci of me	Louerd, haue merci of me!
492	To day i wile fro denemark fle	To-day i wilẹ fro Denemark fle,
493	Ne neuere more comen ageyn	Ne neuere more comen ageyn:
494	Sweren y wole þat bircabein	Sweren y wolẹ, þat Bircabein
495	Neuere yete me ne gat	Neuere yete me ne gat:’-
496	Hwan þe deuel hede þat	Hwan þe deuel herde þat,
497	Sum del bigan him forto rewe	Sum-del bigan him forto rewe;
498	With drow þe knif þat was lewe	With-drow þe knif, þat was lewe
499	Of þe seli children blod	Of þe seli children blod.
500	Þer was miracle fair and god	Þer was mirácle fair and god,
501	Þat he þe knaue nouth ne slou	Þat he þe knaue nouht ne slou,
502	But fo rewnesse him wit drow	But for rewnesse him with-drow.
503	Of auelok rewede him ful sore	Of Hauelok rewede him ful sore,
504	And þoucte he wolde þat he ded wore	Al-þouh he wolde þat he ded wore,
505	But on þat he nouth wit his hend	But-on þat he nouht with his hend
506	Ne drepe him nouth þat fule fend	Ne drepe him mouhte, þat fule fend!
507	Þoucte he als he him bi stod	Þouhte he, als he him bi-stod,
508	Starinde als he were wod	Starinde als he were wod:
509	Yif y late him liues go	‘Yif y late him liues go,
510	He micte me wirchen michel wo	He mihte me wirchen michel wo.
511	Grith ne get y neuere mo	Grith ne get y neuere mo,
512	He may waiten for to slo	He may me waiten for to slo;
513	And yf he were brouct of liue	And yf he were brouht of liue,
514	And mine children wolden thriue	And mine children wolden thriue,
515	Louerdinges after me	Louerdinges after me
516	Of al denemark micten he be	Of al Denemark mihten he be.
517	God it wite he shal ben ded	God it wite, he shal ben ded,
518	Wile i taken non oþer red	Wile i taken non oþer red;
519	I shal do casten him in þe she	I shal do casten him in þe se,
520	Þer i wile þat he drench be	Þer i wilẹ þat he drenched be;
521	Abouten his hals an anker god	Abouten his hals an anker god,
522	Þat he ne flete in the flod	Þat he ne flete in the flod.’
523	Þer anon he dede sende	Þer anon he dede sende
524	After a fishere þat he wende	After a fisherẹ, þat he wende
525	Þat wolde al his wille do	Þat he wolde al his wille do,
526	And sone anon he seyde him to	And sone anon he seyde him to:
527	Grim þou wost þu art mi þral	‘Grim, þou wost þu art mi þral;
528	Wilte don mi wille al	Wiltu don mi wille al
529	Þat i wile bidden þe	Þat i wilẹ nou bidden þe,
530	To morwen shal maken þe fre	To-morwen i shal maken þe fre,
531	And aucte þe yeuen and riche make	And auhte þe yeuen, and riche make,
532	With þan þu wilt þis child take	With-þan þu wilt þis knaue take,
533	And leden him with þe to nicht	And leden him with þe to-niht,
534	Þan þou sest se Mone lith	Þan þou sest þe mone-liht,
535	In to þe se and don him þer inne	In-to þe se, and don him þer-inne;
536	Al wile taken on me þe sinne	Al wile i taken on me þe sinne.’
537	Grim tok þe child and bond him faste	Grim tok þe child, and bond him faste,
538	Hwil þe bondes micte laste	Hwil þe bondes mihte laste,
539	Þat weren of ful strong line	Þat weren of ful stronge line: -
540	Þo was hauelok in ful strong pine	Þo was Hauelok in ful strong pine.
541	Wiste he neuere her wat was wo	Wiste he neuere er hwat was wo:
542	Iesu crist þat makede to go	Iesu Crist, þat makedẹ go
543	þe halte and þe doumbe speken	þe halte, and þe doumbe speke,
544	Hauelok þe of godard wreken	Hauelok, þe of Godard wreke!

545	Hwan grim him hauede faste bounden	Hwan Grim him hauede faste bounden,
546	And siþen in an eld cloth wnden	And siþen in an old cloth wounden,
547	A keuel of clutes ful un wraste	A keuel of clutes, ful un-wraste,
548	Þat he mouthe speke ne fnaste	Þat he ne mouhte speke, ne fnaste,
549	Hwere he wolde him bere or lede	Hwere he wolde him bere or lede.
550	Hwan he hauede don þat dede	Hwan he hauẹde don þat dede,
551	Hwan þe swike him hauede he yede	As þe swike him bad, he yede,
552	Þat he shulde him forth	Þat he shulde him forth lede
553	And him drinchen in þe se	And him drenchen in þe se -
554	þat forwarde makeden he	þat forwardẹ þan makẹden he.
555	In a poke ful and blac	In a poke, ful and blac,
556	Sone he caste him on his bac	Sone he caste him on his bac,
557	Ant bar him hom to hise cleue	And bar him hom to hise cleue,
558	And bi taucte him dame leue	And bi-taucte him dame Leue,
559	And seyde wite þou þis knaue	And seyde, ‘ Wite þou þis knaue,
560	Al so thou with mi lif haue	Al-so thou wilt mi lif nou saue;
561	I shal dreinchen him in þe se	I shal him drenchen in þe se,
562	For him shole we ben maked fre	For him sholẹ we ben maked fre,
563	Gold hauen ynou and oþer fe	Gold hauen ynou, and oþer fe;
564	Þat hauet mi louerd bihoten me	Þat hauẹth mi louerd bihoten me.’

565	Hwan dame herde þat	Hwan dame Leue herde þat,
566	Vp she stirte and nouth ne sat	Vp she stirte, and nouht ne sat,
567	And caste þe knaue adoun so harde	And caste þe knaue so harde adoune,
568	þat hise croune he þer crakede	þat he crakedẹ þer his croune
569	Ageyn a gret ston þer it lay	Ageyn a gret ston, þer it lay:
570	Þo hauelok micte sei weilawei	Þo Hauelok mihtẹ sei, ‘Weilawei!
571	Þat euere was i kinges bern	Þat euere was i kinges bern -
572	Þat him ne hauede grip or ern	Þat him ne hauẹde grip or ern,
573	Leoun or wlf wluine or bere	Leoun or wulf, wuluine or bere,
574	Or oþer best þat wolde him dere	Or oþer best, þat wolde him dere!’
575	So lay þat child to middel nicth	So lay þat child to middel niht,
576	Þat grim bad leue bringen lict	Þat Grim bad Leue bringen liht,
577	For to don on his cloþes	For to don on him his cloþes:
578	Ne thenkeste nowt of mine oþes	‘Ne thenkestu nowht of mine oþes
579	Þat ich haue mi louerd sworen	Þat ich haue mi louerd sworen?
580	Ne wile i nouth be forloren	Ne wile i nouht be nou forloren.
581	I shal beren him to þe se	I shal him beren to þe se,
582	Þou wost þat houes me	Þou wost þat so bi-houes me;
583	And i shal drenchen him þer inne	And i shal drenchen him þer-inne;
584	Ris up swiþe an go þu binne	Ris up swiþe, and go þu binne,
585	And blou þe fir and lith a kandel	And blou þe fir, and liht a kandel:’
586	Als she shulde hise cloþes handel	Als she shulde hisẹ cloþes handel
587	On forto don and blawe þer fir	On forto don, and blawe þe fir,
588	She saw þer inne a lith ful shir	She saw þer-inne a liht ful shir,
589	Also brith so it were day	Also briht so it werẹ day,
590	Aboute þe knaue þer he lay	Aboutẹ þe knaue þer he lay.
591	Of hise mouth it stod a stem	Of hise mouth it stod, a stem,
592	Als it were a sunnebem	Als it were a sunnebem;
593	Also lith was it þer inne	Also liht was it þer-inne
594	So þer brenden cerges inne	So þer brenden cerges inne.
595	Iesu crist wat dame leue	Iesu Crist!’ quath dame Leue,
596	Hwat is þat lith in vre cleue	‘Hwat is þat liht in ure cleue!
597	Sir up grim and loke wat it menes	Ris up, Grim, lokẹ hwat it menes,
598	Hwat is þe lith as þou wenes	Hwat is þe liht herẹ, as þou wenes?’
599	He stirten boþe up to the knaue	He stirten boþe up to the knaue -
600	For man shal god wille haue	‘For man shal god wille haue’ -
601	Vnkeueleden him and swiþe unbounden	Vnkeuelẹden him, and swiþe unbounden.
602	And sone anon him funden	And sone anon upon him funden,
603	Als he tirueden of his serk	Als he tiruẹden of his serk,
604	On his rith shuldre a kyne merk	On his riht shuldre a kyne-merk;
605	A swiþe brith a swiþe fair	A swiþe briht, a swiþe fair :
606	Goddot quath grim þis ure eir	‘Goddot!’ quath Grim, ‘þis ure eir
607	Þat shal louerd of denemark	Þat shal ben louerd of Denemark,
608	He shal ben king strong and stark	He shal ben king, strong and stark
609	He shal hauen in his hand	He shal hauen in his hand
610	A denemark and engeland	Al Denemark and Engeland;
611	He shal do godard ful wo	He shal do Godard ful gret wo,
612	He shal him hangen or quik flo	He shal him hangen, or quik do flo;
613	Or he shal him al quic graue	Or he shal him al quic do graue,
614	Of him shal he no merci haue	Of him shal he no merci haue.’
615	Þus seide grim and sore gret	Þus seide Grim, and sore gret,
616	And sone fel him to þe fet	And sone fel him to þe fet,
617	And seide louerd haue merci	And seide, ‘Louerd, haue merci
618	Of me and leue þat is me bi	Of me, and Leue, þat is me bi!
619	Louerd we aren boþe þine	Louerd, we arẹn boþe þine,
620	Þine cherles þine hine	Þine cherles, þine hine.
621	Lowerd we sholen þe wel fede	Lowerd, we sholẹn þe wel fede,
622	Til þat þu cone riden on stede	Til þat þu conne riden on stede,
623	Til þat þu cone ful wel bere	Til þat þu conne ful wel bere
624	Helm on heued sheld and spere	Helm on heued, sheld and spere.
625	He ne shal neuere wite sikerlike	He nẹ shal neuere , sikerlike,
626	Godard þat fule swike	Godard, wite, þat fule swike.
627	Þoru oþer man louerd than þoru þe	Þoru oþer man, louerd, than þoru þe
628	Sal i neuere freman be	Shal i neuere freman be.
629	Þou shalt me louerd fre maken	Þou shalt me, louerd, fre man maken,
630	For i shal yemen þe and waken	For i shal yemen þe, and waken;
631	Þoru þe wile i fredom haue	Þoru þe wile i mi fredom haue.’
632	Þo was haueloc a bliþe knaue	Þo was Haueloc a bliþe knaue;
633	He sat him up and crauede bred	He sat him up, and crauedẹ bred;
634	And seide ich am ney ded	And seide, ‘ich am wel ney ded,
635	Hwat for hunger wat for bondes	Hwat for hunger, hwat for bondes
636	Þat þu leidest on min hondes	Þat þu leidest on min hondes;
637	And for keuel at þe laste	And for þe keuel at þe laste,
638	Þat in mi mouth was þrist faste	Þat in mi mouth was þrist so faste.
639	Y was þe with so harde prangled	Y was þer-with so harde prangled,
640	Þat i was þe with ney strangled	Þat i was þer-with ney y-strangled’
641	Wel is me þat þu mayth hete	‘Wel is me þat þu maght ete:
642	Goddoth quath leue y shal þe fete	Goddot!’ quath Leue, ‘y shal þe fete
643	Bred an chese butere and milk	Bred and chese, butere and milk,
644	Pastees and flaunes al with suilk	Pastees and flaunes; al with suilk
645	Shole we sone þe wel fede	Sholẹ we sone þe wel fede,
646	Louerd in þis mikel nede	Louerd, in þis mikel nede;
647	Soth it is þat men seyt and suereth	Soth is, þat men seyth and suereth:
648	Þer god wile helpen nouth ne dereth	“Þer God wilẹ helpen, nouht ne dereth.”

649	Þanne sho hauede brouth þe mete	Þanne sho hauẹde brouht þe mete,
650	Haueloc anon bigan to ete	Haueloc anon bigan to ete
651	Grundlike and was ful bliþe	Grundlike, and was ful bliþe;
652	Couþe he nouth his hunger miþe	Couþe he nouht his hunger miþe.
653	A lof he het y woth and more	A lof he et, y wot, and more,
654	For him hungrede swiþe sore	For him hungredẹ swiþe sore.
655	Þre dayes þer biforn i wene	Þre dayes þer-biforn, i wene,
656	Et he no mete þat was wel sene	Et he no mete, þat was wel sene.
657	Hwan he hauede eten and was fed	Hwan he hauẹde eten, and was fed,
658	Grim dede maken a ful fayr bed	Grim dede maken a ful fayr bed;
659	Vncloþede him and dede him þer inne	Vncloþede him, and dede him þer-inne,
660	And seyde slep sone with michel winne	And seydẹ, ‘Slep, sone, with michel winne!
661	Slep wel faste and dred þe nouth	Slep wel faste, and dred þe nouht,
662	Fro sorwe to ioie art þu brouth	Fro sorwe to ioie art þu brouht.’
663	Sone so it was lith of day	Sone so it was liht of day,
664	Grim it under tok þe wey	Grim it under-tok, þe wey
665	To þe wicke traitour godard	To þe wicke traitóur Godard,
666	Þat was denemak a stiward	Þat was of Denemark stiward,
667	And seyde louerd don ich haue	And seyde, ‘Louerd, don ich haue
668	Þat þou me bede of þe knaue	Þat þou me bede of þe knaue;
669	He is drenched in þe flod	He is drenched in þe flod,
670	Abouten his hals an anker god	Abouten his hals an anker god;
671	He is witer like ded	He is witer-like ded,
672	Eteth he neure more bred	Eteth he neure more bred;
673	He liþ drenched in þe se	He liþ drenched in þe se:
674	Yif me gold oþer fe	Yif me gold and oþer fe,
675	Þat y mowe riche be	Þat y mowe riche be;
676	And with þi chartre make fre	And with þi chartre makẹ me fre
677	For þu ful wel bi hetet me	For þu ful wel bi-hetet me,
678	Þanne i last spak with þe	Þanne i laste spak with þe.’
679	Godard stod and lokede on him	Godard stod, and lokẹde on him
680	Þoruth like with eyne grim	Þoruh-like, with eyne grim;
681	And seyde wiltu ben erl	And seyde, ‘Wiltu nou ben erl?
682	Go hom swiþe fule drit cherl	Go hom swiþe, fulẹ drit-cherl
683	Go heþen and be euere more	Go heþen, and be euere-more
684	Þral and cherl als þou er wore	Þral and cherl, als þou er wore.
685	Shal haue non oþer mede	Shaltu haue non oþer mede;
686	For litel i do þe lede	For litel shal i do þe lede
687	To þe galues so god me rede	To þe galues, so God me rede!
688	For þou haues don a wicke dede	For þou hauẹs don a wicke dede.
689	Þou Mait stonden her to longe	Þou maght stonden her to longe,
690	Bute þou swiþe eþen gonge	Butẹ þou swiþe heþen gonge.’

691	Grim þoucte to late þat he ran	Grim thouhtẹ to late þat he ran
692	Fro þat traytour þa wicke man	Fro þat traytóur, þat wicke man
693	And þoucte wat shal me to rede	And þouhte, ‘hwat shal me to rede?
694	Wite he him onliue he wile beþe	Wite he him liues, he wile us beþe
695	Heye hangen on galwe tre	Heye hangen on galwe-tre:
696	Betere us is of londe to fle	Betere us is of londẹ to fle,
697	And berwen boþen ure liues	And berwen boþen ure liues,
698	And mine children and mine wiues	And mine children, and mine wiues.’
699	Grim solde sone al his corn	Grim solde sone al his corn,
700	Shep wit wolle neth wit horn	Shep with wolle, net with horn,
701	Hors and swin wit berd	Hors, and swin, and geet with berd,
702	Þe gees þe hennes of þe yerd	Þe gees, þe hennes of þe yerd;
703	Al he solde þat outh douthe	Al he solde, þat ouht douhte,
704	Þat he eure selle moucte	Þat he eure selle mouhte,
705	And al he to þe peni drou	And al he to þe peni drou.
706	Hise ship he greyþede wel inow	Hisẹ ship he greyþedẹ wel inow,
707	He dede it tere an ful wel pike	He dede it tere, and ful wel pike,
708	Þat it ne doutede sond ne krike	Þat it ne doutedẹ sond ne krike;
709	Þer inne dide a ful god mast	Þer-inne he dide a ful god mast,
710	Stronge kables and ful fast	Stronge kables, and ful fast,
711	Ores gode an ful god seyl	Ores gode, and ful god seyl;
712	Þer inne wantede nouth a nayl	Þer-inne wantedẹ nouht a nayl,
713	Þat euere he sholde þer inne do	Þat euere he sholdẹ þer-inne do:
714	Hwan he hauedet greyþed so	Hwan he hauẹdet greyþed so,
715	Hauelok þe yunge he dede þer inne	Hauelok þe yunge he dedẹ þer-inne,
716	Him and his wif hise sones þrinne	Him and his wif, hisẹ sones þrinne,
717	And hise two doutres þat faire wore	And hisẹ two douhtres, þat faire wore;
718	And sone dede he leyn in an ore	And sone dede leyn in an ore,
719	And drou him to þe heye se	And drou him to þe heye se,
720	Þere he mith alþer best fle	Þere he miht alþer-beste fle.
721	Fro londe woren he bote a mile	Fro londe woren he bote a mile,
722	Ne were neuere but ane hwile	Ne were it neuere but ane hwile,
723	Þat it ne bigan a wind to Rise	Þat it ne gan a wind to rise
724	Out of þe north men calleth bise	Out of þe north, men calleth ‘bise,’
725	And drof hem intil engelond	And drof hem intil Engelond,
726	Þat al was siþen in his hond	Þat al was siþen in his hond,
727	His þat hauelok was þe name	His, þat Hauelok was þe name;
728	But or he hauede michel shame	But or, he hauẹde michel shame,
729	Michel sorwe and michel tene	Michel sorwe, and michel tene,
730	And þrie he gat it al bidene	And yete he gat it al bidene;
731	Als ye shulen nou forthwar here	Als ye shulẹn nou forthward lere,
732	Yf that ye wilen þer to here	Yf that ye wilen þer-to here.

733	In humber grim bigan to lende	In Humber Grim bigan to lende,
734	In lindeseye Rith at þe north ende	In Lindẹseyẹ, riht at þe north ende.
735	Þer sat is ship up on þe sond	Þer sat his ship up-on þe sond,
736	But grim it drou up to þe lond	But Grim it drou up to þe lond;
737	And þere he made a litel cote	And þere he made a litel cote
738	To him and to hise flote	To him and his, and to hisẹ flote.
739	Bigan he Þere for to erþe	Bigan he Þere for to erde.
740	A litel hus to maken of erþe	A litel hus to maken of erþe,
741	So þat he wel þore were	So þat he and his wel wore
742	Of here herboru herborwed þere	Of here herboru herborwed þore;
743	And for þat grim þat place aute	And for þat Grim þat place auhte,
744	Þe stede of grim þe name laute	Þe stede of Grim þe name lauhte;
745	So þat grimesbi calleth alle	So þat Grimesbi it calle
746	þat þer offe speken alle	He þat þer-of speken alle;
747	And so shulen men callen it ay	And so shulẹn men it callen ay,
748	Bituene þis and domesday	Bituene þis and domesday.

749	Grim was fishere swiþe god	Grim was fisherẹ swiþe god,
750	And mikel couþe on the flod	And mikel couþe on the flod;
751	Mani god fish þer inne he tok	Mani god fish þer-inne he tok,
752	Boþe with neth and with hok	Boþe with net, and ek with hok.
753	He tok þe sturgiun and þe qual	He tok þe sturgiun, and þe qual,
754	And þe turbut and lax with al	And þe turbut, and lax with-al,
755	He tok þe sele and þe hwel	He tok þe sele, and ek þe el
756	He spedde ofte swiþe wel	He spedde ofte swiþe wel:
757	Keling he tok and tumberel	Keling he tok, and tumberel,
758	Hering and þe makerel	Hering, and þe makerel,
759	Þe Butte þe schulle þe þornebake	Þe butte, þe schulle, þe þornbake:
760	Gode paniers dede he make	Gode paniers dede he make,
761	On til him and oþer þrinne	On til him, and oþer þrinne
762	Til hise sones to beren fish inne	Til hisẹ sones, to berẹn fish inne,
763	Vp o londe to selle and fonge	Vp o-londe to selle and fonge;
764	Forbar he neyþe tun ne gronge	Forbar he neyþer tun, ne gronge,
765	Þat he ne to yede with his ware	Þat he ne to-yede with his ware;
766	Kam he neuere hom hand bare	Kam he neuere hom hand-bare,
767	Þat he ne broucte bred and sowel	Þat he ne brouhte bred and sowel
768	In his shirte or in his couel	In his shirte, or in his couel;
769	In his poke benes and korn	In his poke benes and korn:
770	Hise swink ne hauede he nowt forlorn	Hisẹ swink ne hauẹde he nowht forlorn.
771	And hwan he tok þe grete laumprei	And hwan he tok þe gretẹ laumprei,
772	Ful we he couþe þe rithe wei	Ful wel he couþe þe rihte wei
773	To lincolne þe gode boru	To Lincólne, þe gode boru;
774	Ofte he yede it þoru and þoru	Ofte he yede it þoru and þoru,
775	Til he hauede wol wel sold	Til he hauẹde al wel sold,
776	And þer fore þe penies told	And þer-fore þe penies told.
777	Þanne he com þenne he were bliþe	Þanne he com þenne, he werẹ bliþe,
778	For hom he brouthe fele siþe	For hom he brouhte fele siþe
779	Wastels simenels with þe horn	Wastels, simenels with þe horn,
780	Hise pokes fulle of mele an korn	Hisẹ pokes fulle of mele and korn,
781	Netes flesh shepes and swines	Netes flesh, shepes, and swines;
782	And hemp to maken of gode lines	And hemp to maken of gode lines,
783	And stronge ropes to hise netes	And stronge ropes to hisẹ netes;
784	In þe se weren he ofte setes	In þe se he ofte setes.

785	Þus gate grim him fayre ledde	Þus-gate Grim him fayre ledde.
786	Him and his genge wel he fedde	Him and his genge wel he fedde
787	Wel twelf winter oþer more	Wel twelue winter, oþer more:
788	Hauelok was war þat grim swank sore	Hauelok was war þat Grim swank sore
789	For his mete and he lay at hom	For his mete, and he lay at home:
790	Thouthe ich am nou no grom	Thouhte he, ‘ich am nou no grome;
791	Ich am wel waxen and wel may eten	Ich am wel waxen, and wel may eten
792	More þan euere grim may geten	More þan euere Grim may geten.
793	Ich ete more bi god on liue	Ich ete more, bi God on liue,
794	Þan grim an hise children fiue	Þan Grim and hise children fiue!
795	It ne may nouth ben þus longe	It ne may nouht ben þus longe,
796	Goddot y wile with þe gange	Goddot! y wile with hem gange,
797	For to leren sum god to gete	For to leren sum god to gete;
798	Swinken ich wolde for mi mete	Swinken ich wolde for mi mete.
799	It is no shame forto swinken	It is no shame forto swinken ;
800	Þe man þat may wel eten and drinken	Þe man þat may wel eten and drinken
801	Þat nouth ne haue but on swink long	Þar nouht ne haue but on swink long;
802	To liggen at hom it is ful strong	To liggen at hom it is ful strong.
803	God yelde him þer ine may	God yelde him, þer i ne may,
804	Þat haueth me fed to þis day	Þat hauẹth me fed unto þis day!
805	Gladlike i wile þe paniers bere	Gladlike i wile þe paniers bere;
806	Ich woth ne shal it me nouth dere	Ich wot, ne shal it me nouht dere,
807	Þey þer be inne a birþene gret	Þey þer be inne a birþenẹ gret
808	Al so heui als a neth	Al so heui als a net.
809	Shal ich neuere lengere dwelle	Shal ich neuere lengerẹ dwelle,
810	To morwen shal ich forth pelle	To-morwen shal ich forth pelle.’

811	On þe morwen hwan it was day	On þe morwen, hwan it was day,
812	He stirt up sone and nouth ne lay	He stirt up sone, and nouht ne lay;
813	And cast a panier on his bac	And cast a panier on his bac,
814	With fish giueled als a stac	With fish giuéled als a stac;
815	Also michel he bar him one	Also michel he bar him one
816	So he foure bi mine mone	So he foure, bi mine mone!
817	Wel he it bar and solde it wel	Wel he it bar, and solde it wel,
818	Þe siluer he brouthe hom il del	Þe siluer he brouhte hom ilk del;
819	Al þat he þer fore tok	Of al þat he þer-fore tok
820	With held he nouth a ferþinges nok	With-held he nouht a ferþingẹs nok.
821	So yede he forth ilke day	So yede he forth ilke day,
822	Þat he neuere at home lay	Þat he neuere at home lay.
823	So wolde he his mester lere	So wolde he his mester lere. -
824	Bifel it so a strong dere	Bifel it so, a ful strong dere
825	Bigan to rise of korn of bred	Bigan to rise of korn of bred,
826	That grim ne couþe no god red	That Grim ne couþe no god red,
827	Hw he sholde his meine fede	Hu he sholde his meiné fede;
828	Of hauelok hauede he michel drede	Of Hauelok hauẹde he michel drede:
829	For he was strong and wel mouthe ete	For he was strong, and wel mouhte ete
830	More þanne heuere mouthe he gete	Morẹ þanne euere mouhte he gete;
831	Ne he ne mouthe on þe se take	Ne he ne mouhte on þe se take
832	Neyþer lenge ne þornbake	Neyþer lenge, ne þornbake.
833	Ne non oþer fish þat douthe	Ne non oþer fish þat douhte
834	His meyne feden with he mouthe	His meyné feden with, he mouhte.
835	Of hauelok he hauede kare	Of Hauelok he hauẹde kare,
836	Hwilgat þat he micthe fare	Hwilkgat þat he mihte fare;
837	Of his children was him nouth	Of his children was him nouht,
838	On hauelok was al hise þouth	On Hauelok was al hisẹ þouht,
839	And seyde hauelok dere sone	And seyde, ‘Hauelok, dere sone,
840	I wene that we deye mone	I wene that we deye mone
841	For hunger þis dere is so strong	For hunger, þis dere is so strong,
842	And hure mete is uten long	And ure mete is uten long.
843	Betere is þat þu henne gonge	Betere is þat þu henne gonge
844	Þan þu here dwelle longe	Þan þu here dwelle longe;
845	Heþen þow mayt gangen to late	Heþen þow maght gangẹn to late;
846	Thou canst ful wel þe ricthe gate	Thou canst ful wel þe rihte gate
847	To lincolne þe gode borw	To Lincólne, þe gode boru,
848	Þou hauest it gon ful ofte þoru	Þou hauẹst it gon ful ofte þoru;
849	Of me ne is me nouth a slo	Of me, ne is me nouht a slo.
850	Betere is þat þu þider go	Betere is þat þu þider go,
851	For þer is mani god man inne	For þer is mani god man inne,
852	þer þou mayt þi mete winne	þer þou maght þi mete winne.
853	But wo is me þou art so naked	But wo is me! þou art so naked,
854	Of mi seyl y wolde þe were maked	Of mi seyl y woldẹ werẹ maked
855	A cloth þou mithest inne gongen	A cloth, þou mihtest inne gongen,
856	Sone no cold þat þu ne fonge	Sone, no cold þat þu ne fonge.’

857	He tok þe shres of þe nayl	He tok þe sheres of þe nayl,
858	And made him a couel of þe sayl	And made him a couel of þe sayl,
859	And hauelok dide it sone on	And Hauelok dide it sone on
860	Hauede neyþer hosen ne shon	Hauẹde he neyþer hosen ne shon,
861	Ne none kines oþe wede	Ne none kinnes oþer wede;
862	To lincolne barfot he yede	To Lincólne barfot he yede.
863	Hwan he kam þe he was ful wil	Hwan he kam þer, he was ful wil,
864	Ne hauede he no frend to gangen til	Nẹ hauẹde he no frend to gangen til;
865	Two dayes þer fastinde he yede	Two dayes þer fastinde he yede,
866	Þat non for his werk wolde him fede	Þat non for his werk wolde him fede;
867	Þe þridde day herde he calle	Þe þridde day he herde calle:
868	Bermen bermen hider forth alle	Bermen, bermen, hider forth alle!’
869		Þoure þat on fote yede
870	Sprongen forth so sparke on glede	Sprongen forth so sparke of glede.
871	Hauelok shof dun nyne or ten	Hauelok shof dune nyne or ten
872	Rith amidewarde þe fen	Riht amideward þe fen,
873	And stirte forth to þe kok	And stirte forth to þe kok,
874		Þer the erles mete he tok
875	Þat he bouthe at þe brigge	Þat he bouhte at þe brigge:
876	Þe bermen let he alle ligge	Þe bermen let he alle ligge,
877	And bar þe mete to þe castel	And bar þe mete to þe castel,
878	And gat him Þere a ferþing wastel	And gat him Þere a ferþing wastel.

879	Þet oþer day kepte he ok	Þet oþer day he kepte ok
880	Swiþe yerne þe erles kok	Swiþe yerne þe erles kok,
881	Til þat he say him on þe bigge	Til þat he say him on þe brigge,
882	And bi him mani fishes ligge	And bi him mani fishes ligge.
883	Þe herles mete hauede he bouth	Þe erles mete hauẹde he bouht
884	Of cornwalie and kalde oft	Of Cornwaile, and kalde oft:
885	Bermen bermen hider swiþe	‘Bermen, bermen, hider swiþe !’
886	Hauelok it herde and was ful bliþe	Hauelok it herde, and was ful bliþe
887	Þat he herde bermen calle	Þat he herde ‘bermen’ calle;
888	Alle made he hem dun falle	Alle he made hem dune falle
889	Þat in his gate yeden and stode	Þat in his gate yeden and stode,
890	Wel sixtene laddes gode	Wel sixtene laddes gode.
891	Als he lep þe kok til	Als he lep þe kok un-til,
892	He shof hem alle upon an hyl	He shof hem alle upon an hyl;
893	Astirte til him with his rippe	Astirte til him with his rippe,
894	And bigan þe fish to kippe	And bigan þe fish to kippe.
895	He bar up wel a carte lode	He bar up wel a carte-lode
896	Of segges laxes of playces brode	Of segges, laxes, of playces brode,
897	Of grete laumprees and of eles	Of grete laumprees, and of eles;
898	Sparede he neyþer tos ne heles	Sparede he neyþer tos ne heles
899	Til þat he to þe castel cam	Til þat he to þe castel cam,
900	Þat men fro him his birþene nam	Þat men fro him his birþenẹ nam.
901	Þan men haueden holpen him doun	Þan men hauẹden holpen him doune
902	With þe birþene of his croun	With þe birþene of his croune,
903	þe kok stod and on him low	þe kok bi stod, and on him low,
904	And þoute him stalworþe man ynow	And þouhte him stalworþẹ man ynow,
905	And seyde wiltu ben wit me	And seyde, ‘Wiltu ben with me?
906	Gladlike wile ich feden þe	Gladlike wile ich feden þe;
907	Wel is set þe mete þu etes	Wel is set þe mete þu etes,
908	And þe hire þat þu getes	And þe hire þat þu getes.’

909	Soddot quoth he leue sire	Goddot!’ quoth Hauelok, ‘leue sire,
910	Bidde ich you non oþer hire	Bidde ich you non oþer hire;
911	But yeueþ me inow to ete	But yeueþ me inow to ete,
912	Fir and water y wile yow fete	Fir and water y wilẹ yow fete,
913	Þe fir blowe an ful wele maken	Þe fir blowe, and ful welẹ maken;
914	Stickes kan ich breken and kraken	Stickes kan ich breken and kraken,
915	And kindlen ful wel a fyr	And kindlen ek ful wel a fyr,
916	And maken it to brennen shir	And maken it to brennen shir;
917	Ful wel kan ich cleuen shides	Ful wel kan ich cleuen shides,
918	Eles to turuen of here hides	Eles to-turuen of herẹ hides;
919	Ful wel kan ich dishes swilen	Ful wel kan ich dishes swilen,
920	And don al þat ye euere wilen	And don al þat ye euere wilen.’
921	Quoth þe kok wile i no more	Quoth þe kok, ‘Wile i no more;
922	Go þu yunder and sit þore	Go þu yunder, and sit þore,
923	And y shal yeue þe ful fair bred	And y shal yeue þe ful fair bred,
924	And make þe broys in þe led	And make þe broys in þe led.
925	Sit now doun and et ful yerne	Sit now doun and et ful yerne:
926	Daþeit hwo þe mete werne	Daþeit hwo þe mete werne!’

927	Hauelok sette him dun anon	Hauelok sette him dune anon,
928	Also stille als a ston	Also stille als a ston,
929	Til he hauede ful wel eten	Til he hauẹde ful wel eten;
930	Þo hauede hauelok fayre geten	Þo hauẹde Hauelok fayre geten.
931	Hwan he hauede eten inow	Hwan he hauẹde eten inow,
932	He kam to þe welle water up drow	He kam to þe welle, water up-drow,
933	And filde þe a michel so	And filde þer a michel so;
934	Bad he non ageyn him go	Bad he non ageyn him go;
935	But bi twen his hondes he barit in	Bi-twen his hondes he bar it in,
936	A him one to þe kichin	Al him one, to þe kichin.
937	Bad he non him water to fete	Bad he non him water fete,
938	Ne fro bigge to bere þe mete	Ne fro brigge to bere þe mete,
939	He bar þe turues he bar þe star	He bar þe turues, he bar þe star,
940	Þe wode fro the brigge he bar	Þe wode fro the brigge he bar;
941	Al that euere shulden he nytte	Al that euere shulden he nytte,
942	Al he drow and al he citte	Al he drow, and al he kitte;
943	Wolde he neuere hauen rest	Wolde he neuere hauen rest,
944	More þan he were a best	More þan he were a best.
945	Of alle men was he mest meke	Of alle men was he mest meke,
946	Lauhwinde ay and bliþe of speke	Lauhwinde ay, and bliþe of speke;
947	Euere he was glad and bliþe	Euere he was glad and bliþe,
948	His sorwe he couþe ful wel miþe	His sorwe he couþe ful wel miþe.
949	It ne was non so litel knaue	It ne was non so litel knaue, ...
950	For to leyken ne forto plawe	For to leyken, ne forto plawe,
951	Þat he ne wode with him pleye	Þat he ne wolde with him pleye:
952	Þe children that yden in þe weie	Þe children that yeden in þe weie
953	Of him he deden al he wille	Of him he deden al her wille,
954	And with him leykeden here fille	And with him leykeden herẹ fille.
955	Him loueden alle stille and bolde	Him louẹden alle, stille and bolde,
956	Knictes children yunge and holde	Knihtes, children, yunge and olde;
957	Alle him loueden þat him sowen	Alle him louẹden þat him sowen,
958	Boþen heyemen and lowe	Boþen heye men and lowe.
959	Of him ful wide þe word sprong	Of him þe word ful wide sprong,
960	Hw he was mike hw he was strong	Hu he was mikel, hu he was strong,
961	Hw fayr man god him hauede maked	Hu fayr man God him hauẹde maked,
962	But on þat he was almest naked	But-on þat he was almest naked:
963	For he ne hauede nouth to shride	For he ne hauẹde nouht to shride,
964	But a kouel ful unride	But a kouel ful unride,
965	Þat ful and swiþe wicke	Þat was ful, and swiþe wicke,
966	Was it nouth worth a fir sticke	Was it nouht worth a fir-sticke.
967	Þe cok bigan of him to rewe	Þe cok bigan of him to rewe,
968	And bouthe him cloþes al spannewe	And bouhte him cloþes, al spannewe;
969	He bouthe him boþe hosen and shon	He bouhte him boþe hosen and shon,
970	And sone dide him dones on	And sone dide him dones on.
971	Hwan he was cloþed osed and shod	Hwan he was cloþed, hosed, and shod,
972	Was non so fayr under god	Was non so fayr under God,
973	Þat euere yete in erþe were	Þat euere yete in erþe were,
974	Non þat euere moder bere	Non þat euere moder bere;
975	It was neuere man þat yemede	It was neuere man þat yemede
976	In kinneriche þat so wel semede	In kineriche, þat so wel semede
977	King or cayser forto be	King or cayser forto be,
978	Þan he was shrid so semede he	Þan he was shrid, so semede he;
979	For þanne he weren alle samen	For þanne he weren alle samen
980	At lincolne at þe gamen	At Lincólne, at þe gamen,
981	And þe erles men woren al þore	And þẹ erles men worẹn alle þore,
982	Þan was hauelok bi þe shuldren more	Was Hauelok bi þe shuldren more
983	Þan þe meste þat þer kam	Þan þe meste þat þer kam:
984	In armes him noman nam	In armes him noman ne nam
985	Þat he doune sone ne caste	Þat he doune sonẹ ne caste;
986	Hauelok stod ouer hem als a mast	Hauelok stod ouer hem als a mast.
987	Als he was heie al he was long	Als he was heiẹ, so he was strong,
988	He was boþe stark and strong	He was boþe stark and long;
989	In engelond non hise per	In Engelond was non hisẹ per
990	Of strengþe þat euere kam him ner	Of strengþẹ þat euere kam him ner.
991	Als he was strong so was he softe	Als he was strong, so was he softe;
992	Þey a man him misdede ofte	Þey a man him misdede ofte,
993	Neuere more he him misdede	Neuere more he him misseyde,
994	Ne hond on him with yuele leyde	Ne hond on him with yuele leyde.
995	Of bodi was he mayden clene	Of bodi was he mayden clene;
996	Neuere yete in game ne in grene	Neuere yete in game, ne in grene,
997	Wit hire ne wolde leyke ne lye	With hire ne wolde he leykẹ ne lye,
998	No more þan it were a strie	No more þan it were a strie.
999	In þat time al hengelond	In þat time al engelond
1000	Þerl godrich hauede in his hond	Þerl Godrich hauẹde in his hond,
1001	And he gart komen into þe tun	And he gart komen into þe tun
1002	Mani erl and mani barun	Mani erl, and mani barun;
1003	And alle þat liues were	And alle men þat liues were
1004	In englond Þanne wer þere	In Engelond, Þannẹ were þere,
1005	Þat þey haueden after sent	Þat þey hauẹden after sent
1006	To ben þer at þe parlement	To ben þer at þe parlement.
1007	With hem com mani chambioun	With hem com mani champioun,
1008	Mani with ladde blac and brown	Mani with ladde, blac and brown;
1009	An fel it so þat yunge men	And fel it so, þat yunge men,
1010	Wel abouten nine or ten	Wel abouten nine or ten,
1011	Bigunnen þe for to layke	Bigunnen þere for to layke:
1012	Þider komen boþe stronge and wayke	Þider komen stronge and wayke;
1013	Þider komen lesse and more	Þider komen lesse and more,
1014	Þat in þe borw þanne weren þore	Þat in þe borw þannẹ werẹn þore;
1015	Chaunpiouns and starke laddes	Chaumpiouns, and starke laddes,
1016	Bondemen with here gaddes	Bondemen, with here gaddes,
1017	Als he comen fro þe plow	Als he comen fro þe plow;
1018	Þere was sembling i now	Þere was sembling i-now!
1019	For it ne was non horse knaue	For it ne was non horse-knaue,
1020	Þo þei sholden in honde haue	Þouh þei sholden in honde haue,
1021	Þat he ne kam þider þe leyk to se	Þat he nẹ kam þider, þe leyk to se:
1022	Biforn here fet þanne lay a tre	Biforn herẹ fet þannẹ lay a tre,
1023	And pulten with a mikel ston	And putten with a mikel ston
1024	Þe starke laddes ful god won	Þe starke laddes, ful god won.
1025	Þe ston was mikel and ek greth	Þe ston was mikel, and ek gret,
1026	And al so heui so a neth	And al so heui so a net;
1027	Grund stalwrþe man he sholde be	Grund-stalwurþẹ man he sholde be
1028	Þat mouthe liften it to his kne	Þat mouhte it liften to his kne;
1029	Was þer neyþer clerc ne prest	Was þer neyþer clerc, ne prest,
1030	Þat mithe liften it to his brest	Þat mihte it liften to his brest:
1031	þerwit putten the chaunpiouns	þerwith putten the chaumpiouns
1032	Þat þider comen with þe barouns	Þat þider comen with þe barouns.
1033	Hwo so mithe putten þore	Hwo-so mihte putten þore
1034	Biforn a noþer an inch or more	Biforn a-noþer, an inch or more,
1035	Wore he yung wore he hold	Wore he yung, or wore he old,
1036	He was for a kempe told	He was for a kempe told.
1037	Al so þe stoden an ofte stareden	Al-so þei stoden, and ofte starẹden,
1038	Þe chaunpiouns and ek the ladden	Þe chaumpiouns, and ek the ladden,
1039	And he maden mikel strout	And he maden mikel strout
1040	Abouten þe alþerbeste but	Abouten þe alþerbeste bout,
1041	Hauelok stod and lokede þer til	Hauelok stod, and lokedẹ þer-til;
1042	And of puttingge he was ful wil	And of puttingge he was ful wil,
1043	For neuere yete ne saw he or	For neuere yete ne saw he or
1044	Putten the stone or þanne þor	Putten the stone, or þanne þor.
1045	Hise mayster bad him gon þer to	Hise mayster bad him gon þer-to,
1046	Als he couþe þer with do	Als he couþe þer-with do.
1047	Þo hise mayster it him bad	Þo hisẹ mayster it him bad,
1048	He was of him sore adrad	He was of him ful sore adrad;
1049	Þerto he stirte sone anon	Þerto he stirte sone anon,
1050	And kipte up þat heui ston	And kipte up þat heui ston,
1051	Þat he sholde puten wiþe	Þat he sholde putten wiþe;
1052	He putte at þe firste siþe	He putte, at þe firste siþe,
1053	Ouer alle þat þer wore	Ouer alle þat þer wore,
1054	Twel fote and sumdel more	Twelue fote, and sumdel more.
1055	Þe chaunpiouns þat put sowen	Þe chaumpiouns þat þat put sowen,
1056	Shuldreden he ilc oþer and lowen	Shuldreden he ilc oþer, and lowen;
1057	Wolden he no more to putting gange	Wolden he no more to putting gange,
1058	But seyde we dwellen her to longe	But seyde, ‘we dwellen her to longe!’
1059	Þis selkouth mithe nouth ben hyd	Þis selkouth mihte nouht ben hyd,
1060	Ful sone it was ful loude kid	Ful sone it was ful loude kid
1061	Of hauelok hw he warp þe ston	Of Hauelok, hu he warp þe ston
1062	Ouer þe laddes euerilkon	Ouer þe laddes euerilkon;
1063	Hw he was fayr hw he was long	Hu he was fayr, hu he was long,
1064	Hw he was with hw he was strong	Hu he was wiht, hu he was strong;
1065	Þoruth england yede þe speche	Þorhut England yedẹ þe speke,
1066	Hw he was strong and ek meke	Hu he was strong, and ek ful meke;
1067	In the castel up in þe halle	In the castel, up in þe halle,
1068	Þe knithes speken þer of alle	Þe knihtes speken þer-of alle,
1069	So that godrich it herde wel	So that Godrich it herde wel
1070	Þe speken of hauelok eueri del	Þer speken of Hauelok, eueri del,
1071	Hw he was strong man and hey	Hu he was strong man and hey,
1072	Hw he was strong and ek fri	Hu he was strong, and ek ful sley,
1073	And þouthte godrich þoru þis knaue	And þouhte Godrich, ‘þoru þis knaue
1074	Shal ich engelond al haue	Shal ich Engelond al haue,
1075	And mi sone after me	And mi sone after me;
1076	For so i wile þat it be	For so i wile þat it be.
1077	The king aþelwald me dide swere	King Aþelwald me dide swere
1078	Vpon al þe messe gere	Vpon al þe messe-gere,
1079	Þat y shude his douthe yeue	Þat y shulde his douhter yeue
1080	Þe hexte þat mithe liue	Þe hexte man þat mihte liue,
1081	þe beste þe fairest þe strangest ok	þe beste, þe fairest, þe strangest ok;
1082	Þat gart he me sweren on þe bok	Þat gart he me sweren on þe bok.
1083	Hwere mithe i finden ani so hey	Hwerẹ mihte i finden ani so hey
1084	So hauelok is or so sley	So Hauelok is, or so sley?
1085	þou y southe heþen in to ynde	þouh y souhte heþen in-to Ynde,
1086	So fayr so strong ne mithe y finde	So fayr, so strong, ne mihte y finde.
1087	Hauelok is þat ilke knaue	Hauelok is þat ilke knaue
1088	Þat shal goldeborw haue	Þat shal Goldeborw haue.’
1089	Þis þouthe with trechery	Þis þouhte he with trechery,
1090	Wit traysoun and wit felony	With traysoun, and with felony;
1091	For he wende þat hauelok wore	For he wende, þat Hauelok wore
1092	Sum cherles sone and no more	Sum cherles sone, and no more;
1093	Ne shulde he hauen of engellond	Ne shulde he hauen of Engellond
1094	Onlepi forw in his hond	Onlepi forw in his hond
1095	With hire þat was þer of eyr	With hirẹ, þat was þer-of þe eyr,
1096	Þat boþe was god and swiþe fair	Þat boþẹ was god and swiþe fair.
1097	He wende þat hauelok wer a þral	He wende, þat Hauelok wer a þral,
1098	þer þoru he wende hauen al	þer-þoru he wende hauen al
1099	In engelond þat hire rith was	In Engelond, þat hirẹ riht was;
1100	He was werse þan sathanas	He werse was þan Sathanas
1101	Þat iesu crist in erþe shop	Þat Iesu Crist in erþe shop:
1102	Hanged worþe he on an hok	Hanged worþe he on an hok!

1103	After goldebow sone he sende	After Goldẹborw sone he sende,
1104	Þat was boþe fayr and hende	Þat was boþe fayr and hende,
1105	And dide hire to lincolne bringe	And dide hirẹ to Lincólne bringe,
1106	Belles dede he ageyn hire ringen	Belles dede he ageyn hirẹ ringen,
1107	And ioie he made hire swiþe mikel	And ioie he made hirẹ swiþe mikel,
1108	But neþeles he was ful swikel	But neþeles he was ful swikel.
1109	He seyde þat he sholde hire yeue	He seyde, þat he sholde hirẹ yeue
1110	þe fayrest man that mithe liue	þe fayrest man that mihte liue.
1111	She answerede and seyde anon	She answerede, and seyde anon,
1112	Bi crist and bi seint iohan	Bi Iesu Crist, and bi seint Iohan,
1113	Þat hire sholde noman wedde	Þat hire sholde noman wedde,
1114	Ne noman bringen to hire bedde	Ne noman bringen hirẹ to bedde,
1115	But he were king or kinges eyr	But he were king, or kinges eyr,
1116	Were he neuere man so fayr	Were he neuere man so fayr.

1117	Godrich þe erl was swiþe wroth	Godrich þe erl was swiþe wroth
1118	Þat she swor swilk an oth	Þat she swor þer swilk an oth,
1119	And seyde hwor þou wilt be	And seyde, ‘Hweþer þou wilt be
1120	Quen and leuedi ouer me	Quen and leuẹdi ouer me?
1121	þou shalt hauen a gadeling	þou shalt hauen a gadeling,
1122	Ne shalt þou hauen non oþer king	Ne shalt þou hauẹn non oþer king;
1123	Þe shal spusen mi cokes knaue	Þe shal spusen mi cokes knaue,
1124	Ne shalt þou non oþer louerd haue	Shalt þou non oþer louerd haue.
1125	Daþeit þat þe oþer yeue	Daþeit þat þe oþer yeue
1126	Euere more hwil i liue	Euere-more hwil i liue!
1127	To mowe ye sholen ben weddeth	To-morwe sholen ye ben weddet,
1128	And maugre þin to gidere beddeth	And, maugre þin, to-gidẹre beddet.’
1129	Goldeborw gret and was hire ille	Goldeborw gret, and was hire ille,
1130	She wolde ben ded bi hire wille	She woldẹ ben ded bi hire wille.
1131	On the morwen hwan day was sprungen	On the morwen, hwan day was sprungen,
1132	And day belle at kirke rungen	And day-belle at þe kirke rungen,
1133	After hauelok sente þat iudas	After Hauelok sente þat Iudas,
1134	Þat werse was þanne sathanas	Þat werse was þannẹ Sathanas:
1135	And seyde mayster wilte wif	And seyde, ‘Mayster, wiltu wif?’
1136	Nay quoth hauelok bi my lif	‘Nay,’ quoth Hauelok, ‘bi my lif !
1137	Hwat sholde ich with wif do	Hwat sholde ich with wiue do?
1138	I ne may hire fede ne cloþe ne sho	I nẹ may hirẹ fede, ne cloþẹ, ne sho.
1139	Wider sholde ich wimman bringe	Hwider sholde ich wimman bringe?
1140	I ne haue none kines þinge	I ne haue none kinnes þinge.
1141	I ne haue hws y ne haue cote	I ne haue hus, y ne haue cote,
1142	Ne i ne haue stikke y ne haue sprote	I ne haue stikke, y ne haue sprote,
1143	I ne haue neyþer bred ne sowel	I ne haue neyþer bred ne sowel,
1144	Ne cloth but of an hold with couel	Ne cloth, but of an old whit couel.
1145	Þis cloþes þat ich onne haue	Þis cloþes, þat ich onne haue,
1146	Aren þe kokes and ich his knaue	Arẹn þe kokes, and ich his knaue.’
1147	Godrich stirt up and on him dong	Godrich stirt up, and on him dong
1148		With dintes swiþe hard and strong,
1149	And seyde but þou hire take	And seyde, ‘But þou hire take
1150	Þat y wole yeuen þe to make	Þat y wolẹ yeuen þe to make,
1151	I shal hangen þe ful heye	I shal hangen þe ful heye,
1152	Or y shal þristen vth þin heie	Or y shal þristen ut þin eie.’
1153	Hauelok was one and was odrat	Hauelok was one, and was adrad,
1154	And grauntede him al þat he bad	And grauntede him al þat he bad.
1155	Þo sende he after hire sone	Þo sende he after hire sone,
1156	þe fayrest wymman under mone	þe fayrest wymman under mone;
1157	And seyde til hire and slike	And seyde til hirẹ, fals and slike,
1158	Þat wicke þral þat foule swike	Þat wicke þral, þat foule swike:
1159	But þu þis man under stonde	But þu þis man wel under-stonde,
1160	I shal flemen þe of londe	I shal flemen þe of londe;
1161	Or þou shal to þe galwes renne	Or þou shalt to þe galwes renne,
1162	And þer þou shalt in a fir brenne	And þer þou shalt in a fir brenne.’
1163	Sho was adrad for he so þrette	Sho was adrad, for he so þrette,
1164	And durste nouth þe spusing lette	And durste nouht þe spusing lette;
1165	But þey hire likede swiþe ille	But þey hirẹ likedẹ swiþe ille,
1166	þouthe it was godes wille	Sho þouhte, it was Godes wille:
1167	God þat makes to growen þe korn	God, þat makes growen þe korn,
1168	Formede hire wimman to be born	Formede hirẹ wimman to be born.
1169	Hwan he hauede don him for drede	Hwan he hauẹde him don, for drede,
1170	Þat he sholde hire spusen and fede	Þat he sholde hirẹ spusen and fede,
1171	And þat she sholde til him holde	And þat she sholde til him holde,
1172	Þer weren penies þicke tolde	Þer weren penies þicke tolde,
1173	Mikel plente upon þe bok	Mikel plenté upon þe bok:
1174	He ys hire yaf and she as tok	He ys hirẹ yaf, and she is tok.
1175	He weren spused fayre and wel	He weren spused fayre and wel,
1176	Þe messe he deden eueridel	Þe messe he dede, and eueridel
1177	Þat fel to spusing and god clek	Þat fel to spusing, a god clerk,
1178	Þe erchebishop uth of yerk	Þe erchebishop ut of Yerk,
1179	Þat kam to þe parlement	Þat kam þer to þe parlement,
1180	Als god him hauede þider sent	Als God him hauẹde þider sent.

1181	Hwan he weren togydere in godes lawe	Hwan he togydẹre in Godes lawe
1182	þat þe folc ful wel it sawe	Werẹn, þat folc ful wel it sawe,
1183	He ne wisten hwat he mouthen	He ne wisten hwat he mouhten,
1184	Ne he ne wisten wat hem douthe	Ne he ne wisten hwat hem douhte,
1185	Þer to dwellen or þenne to gonge	Þer to dwellen, or þennẹ to gonge.
1186	þer ne wolden he dwellen longe	þer ne wolden he dwellen longe
1187	For he wisten and ful wel sawe	For he wisten, and ful wel sawe,
1188	Þat godrich hem hatede þe deuel him hawe	Godrich hem hatedẹ, þe deuel him awe!
1189	And yf he dwelleden þer outh	And yf he dwelleden þer ouht -
1190	Þat fel hauelok ful wel on þouth	Þat fel Hauelok ful wel on þouht -
1191	Men sholde don his leman shame	Men sholde don his leman shame,
1192	Or elles bringen in wicke blame	Or elles bringen in wicke blame;
1193	Þat were him leuere to ben ded	Þat were him leuerẹ to ben ded.
1194	For þi he token anoþer red	For-þi he token anoþer red,
1195	Þat þei sholden þenne fle	Þat þei sholden þenne fle
1196	Til grim and til hise sones þre	Til Grim, and til hisẹ sones þre
1197	Þer wenden he alþer best to spede	Þer wenden he alþer-beste spede,
1198	Hem forto cloþe and for to fede	Hem forto cloþe, and for to fede.
1199	Þe lond he token under fote	Þe lond he token under fote,
1200	Ne wisten he non oþer bote	Ne wisten he non oþer bote,
1201	And helden ay the riþe	And helden ay the rihte sti
1202	Til he komen to grimesby	Til he komen to Grimesby.
1203	Þanne he komen þere þanne was grim ded	Þanne he komẹn þerẹ, þannẹ was Grim ded
1204	Of him ne haueden he no red	Of him ne hauẹden he no red;
1205	But hise children alle fyue	But hise children alle fyue
1206	Alle weren yet on liue	Alle weren yet on liue;
1207	Þat ful fayre ayen hem neme	Þat ful fayre ayeyn hem neme,
1208	Hwan he wisten þat he keme	Hwan he wisten þat he keme,
1209	And maden ioie swiþe mikel	And maden ioie swiþe mikel,
1210	Ne weren he neuere ayen hem fikel	Ne werẹn he neuere ayeyn hem fikel.
1211	On knes ful fayre he hem setten	On knes ful fayre he hem setten,
1212	And hauelok swiþe fayre gretten	And Hauelok swiþe fayre gretten,
1213	And seyden welkome louerd dere	And seyden, ‘Welkomẹ, louerd dere!
1214	And welkome be þi fayre fere	And welkomẹ be þi fayre fere!
1215	Blessed be þat ilke þrawe	Blessed be þat ilke þrawe
1216	Þat þou hire toke in godes lawe	Þat þou hirẹ toke in Godes lawe!
1217	Wel is hus we sen þe on lyue	Wel is us we sen þe on lyue,
1218	Þou mithe us boþe selle and yeue	Þou maght us boþe selle and yeue;
1219	Þou mayt us boþe yeue and selle	Þou maght us boþe yeue and selle,
1220	With þat þou wilt here dwelle	With-þat þou wilt here dwelle.
1221	We hauen louerd alle gode	We hauen, louerd, alle gode,
1222	Hors and neth and ship on flode	Hors, and net, and ship on flode,
1223	Gold and siluer and michel auchte	Gold, and siluer, and michel auhte,
1224	Þat grim ure fader us bitawchte	Þat Grim urẹ fader us bitawhte.
1225	Gold and siluer and oþer fe	Gold, and siluer, and oþer fe
1226	Bad he us bi taken þe	Bad he us bi-taken þe.
1227	We hauen shep we hauen swin	We hauen shep, we hauen swin,
1228	Bi leue her louerd and al be þin	Bi-leue her, louerd, and al be þin!
1229	þo shalt ben louerd þou shalt ben syre	þou shalt ben louerd, þou shalt ben syre,
1230	And we sholen seruen þe and hire	And we sholẹn seruen þe and hire;
1231	And hure sistres sholen do	And ure sistres sholen do
1232	Al that euere biddes sho	Al that euere biddes sho;
1233	He sholen hire cloþen washen and wringen	He sholen hirẹ cloþes washen and wringen,
1234	And to hondes water bringen	And to hondes water bringen;
1235	He sholen bedden hire and þe	He sholen bedden hire and þe,
1236	For leuedi wile we þat she be	For leuẹdi wilẹ we þat she be.’
1237	Hwan he þis ioie haueden maked	Hwan he þis ioie hauẹden maked,
1238	Sithen stikes broken and kraked	Sithen stikes broken and kraked,
1239	And þe fir brouth on brenne	And þe fir brouht on brenne,
1240	Ne was þer spared gos ne henne	Ne was þer spared gos ne henne,
1241	Ne þe hende ne þe drake	Ne þe ende, ne þe drake,
1242	Mete he deden plente make	Mete he deden plenté make;
1243	Ne wantede þere no god mete	Ne wantedẹ þere no god mete,
1244	Wyn and ale deden he fete	Wyn and ale deden he fete,
1245	And made hem glade and bliþe	And maden hem ful glade and bliþe,
1246	Wesseyl ledden he fele siþe	Wesseyl he ledden fele siþe.

1247	On þe nith als goldeborw lay	On þe niht, als Goldẹborw lay,
1248	Sory and sorwful was she ay	Sory and sorwful was she ay,
1249	For she wende she were bi swike	For she wende she were bi-swike,
1250	Þat shere yeuen un kyndelike	Þat she werẹ yeuen un-kyndelike.
1251	O nith saw she þer inne a lith	O niht saw she þer-inne a liht,
1252	A swiþe fayr a swiþe bryth	A swiþe fayr, a swiþe bryht,
1253	Al so brith al so shir	Al so briht, al so shir
1254	So it were a blase of fir	So it were a blase of fir.
1255	She lokede noþ and ek south	She lokedẹ norþ, and ek south,
1256	And saw it comen ut of his mouth	And saw it comen ut of his mouth,
1257	Þat lay bi hire in þe bed	Þat lay bi hire in þe bed:
1258	No ferlike þou she were adred	No ferlikẹ þouh she were adred!
1259	Þouthe she wat may this bi mene	Þouhte she, ‘Hwat may this bi-mene!
1260	He beth heyman yet als y wene	He beth heyman yet, als y wene,
1261	He beth heyman er he be ded	He beth heyman er he be ded:’ -
1262	On hise shuldre of gold red	On hise shuldre, of gold red
1263	She saw a swiþe noble croiz	She saw a swiþe noble croiz,
1264	Of an angel she herde a uoyz	Of an angel she herde a uoyz:

1265	Goldeborw lat þi sorwe be	‘Goldeborw, lat þi sorwe be;
1266	For hauelok þat haueþ spuset þe	For Hauelok, þat hauẹþ spuset þe,
1267	He kinges sone and kinges eyr	Is kinges sone and kinges eyr;
1268	Þat bikenneth þat croiz so fayr	Þat bikenneth þat croiz so fayr.
1269	It bikenneth more þat he shal	It bikenneth, þat he shal
1270	Denemark hauen and englond al	Denemark hauen, and Englond al;
1271	He shal ben king strong and stark	He shal ben king, strong and stark,
1272	Of engelond and denemark	Of Engelond and Denemark;
1273	Þat shal þu wit þin eyne sen	Þat shalt þu with þin eyne sen,
1274	And þo shalt quen and leuedi ben	And þou shalt quen and leuẹdi ben!’

1275	Þanne she hauede herd the steuene	Þanne she hauẹde herd the steuene
1276	Of þe angel uth of heuene	Of þe angel ut of heuene,
1277	She was so fele siþes blithe	She was so fele siþes blithe
1278	Þat she ne mithe hire ioie mythe	Þat she ne mihte hirẹ ioie mythe;
1279	But hauelok sone anon she kiste	But Hauelok sone anon she kiste,
1280	And he slep and nouth ne wiste	And he slep, and nouht ne wiste
1281	Hwan þat aungel hauede seyd	Hwat þat aungel hauẹde seyd.
1282	Of his slep a non he brayd	Of his slep a-non he brayd,
1283	And seide lemman slepes þou	And seide, ‘Lemman, slepes þou?
1284	A selkuth drem dremede me nou	A selkuth drem me dremedẹ nou.

1285	Herkne nou hwat me haueth met	Herkne nou hwat me haueth met:
1286	Me þouthe y was in denemark set	Me þouhte y was in Denemark set,
1287	But on on þe moste hil	But on on þe moste hil
1288	Þat euere yete kam i til	Þat euere yete kam i til.
1289	It was so hey þat y wel mouthe	It was so hey, þat y wel mouhte
1290	Al þe werd se als me þouthe	Al þe werd se, als me þouhte.
1291	Als i sat up on þat lowe	Als i sat up-on þat lowe,
1292	I bigan denemark for to awe	I gan Denemark for to awe,
1293	Þe borwes and þe castles stronge	Þe borwes and þe castles stronge;
1294	And mine armes weren so longe	And mine armes werẹn so longe,
1295	That i fadmede al at ones	That i fadmede, al at ones,
1296	Denemark with mine longe bones	Denemark, with mine longe bones;
1297	And þanne y wolde mine armes drawe	And þanne y woldẹ mine armes drawe
1298	Til me and hom for to haue	Til me, and þouhte hem for to awe,
1299	Al that euere in denemark liueden	Al that euere in Denemark liuẹden
1300	On mine armes faste clyueden	On mine armes faste clyuẹden;
1301	And þe stronge castles alle	And þe stronge castles alle
1302	On knes bigunnen for to falle	On knes bigunnen for to falle,
1303	Þe keyes fellen at mine fet	Þe keyes fellen at mine fet: -
1304	Anoþer drem dremede me ek	Anoþer drem me dremedẹ ek,
1305	Þat ich fley ouer þe salte se	Þat ich fley ouer þe salte se
1306	Til engeland and al with me	Til Engeland, and al with me
1307	Þat euere was in denemark lyues	Þat euere was in Denemark lyues,
1308	But bondemen and here wiues	But bondemen and here wiues;
1309	And þat ich kom til engelond	And þat ich kom til Engelond,
1310	Al closede it intil min hond	Al closede it intil min hond,
1311	And goldeborw y gaf þe	And, Goldeborw, y gaf it þe
1312	Deus lemman hwat may þis be	Deus! lemman, hwat may þis be?’
1313	Sho answerede and seyde sone	Sho answerede, and seyde sone:
1314	Iesu crist þat made mone	Iesu Crist, þat made mone,
1315	Þine dremes turne to ioye	Þine dremes turnẹ to ioye, ... .
1316	Þat wite þw that sittes in trone	Þat wite þw that sittes in trone!
1317	Ne non strong king ne caysere	Ne non so strong king, ne caysére
1318	So þou shalt be fo þou shalt bere	So þou shalt be, for þou shalt bere
1319	In engelond corune yet	In Engelond corune yet;
1320	Denemark shal knele to þi fet	Denemark shal knele to þi fet;
1321	Alle þe castles þat aren þer inne	Allẹ þe castles þat arẹn þer-inne
1322	Shal tow lemman ful wel winne	Shal-tow, lemman, ful wel winne.
1323	I woth so wel so ich it sowe	I wot, so wel so ich it sowe,
1324	To þe shole comen heye and lowe	To þe sholẹ comen heye and lowe,
1325	And alle þat in denemark wone	And alle þat in Denemark wone,
1326	Em and broþer fader and sone	Em and broþer, fader and sone,
1327	Erl and baroun dreng an kayn	Erl and baroun, dreng and þayn,
1328	Knithes and burgeys and sweyn	Knihtes, and burgeys, and sweyn,
1329	And mad king heyelike and wel	And makẹ þe king heyẹlike and wel;
1330	Denemark shal be þin euere ilc del	Denemark shal be þin euere-ilc del.
1331	Haue þou nouth þer offe douthe	Haue þou nouht þer-of no doute
1332	Nouth þe worth of one nouthe	Nouht þe worth of one noute;
1333	Þer offe with inne þe firste yer	Þer-of with-inne þe firste yer
1334	Shalt þou ben king of euere il del	Shalt þou ben king, with-outen were.
1335	But do nou als y wile rathe	But do nou als y wile, rathe;
1336	Nim in witl þe to denemak baþe	Nimen wit to Denemark baþe,
1337	And do þou nouth on frest þis fare	And do þou nouht on frest þis fare;
1338	Lith and selthe felawes are	“Lith and selthe felawes are.”
1339	For shal ich neuere bliþe be	For shal ich neuere bliþe be
1340	Til i with eyen denemark se	Til i with eyen Denemark se;
1341	For ich woth þat al þe lond	For ich wot, þat al þe lond
1342	Shalt þou hauen in þin hon	Shalt þou hauen in þin hond.
1343	Prey grimes sones alle þre	Prey Grimes sones, alle þre,
1344	That he wenden forþ with þe	That he wenden forþ with þe;
1345	I wot he wilen þe nouth werne	I wot, he wilen þe nouht werne,
1346	With þe wende shulen he yerne	With þe wende shulẹn he yerne,
1347	For he louen þe herte like	For he louẹn þe herte-like,
1348	Þou maght til he aren quike	Þou maght telle he aren quike,
1349	Hwore so he o worde aren	Hworẹ-so he o worde aren;
1350	Þere ship þou do hem swithe yaren	Herẹ ship þou do hem swithe yaren,
1351	And loke þat þou dwellen nouth	And loke þat þou dwelle nouht:
1352	Dwelling haueth ofte scaþe wrouth	“Dwelling hauẹth ofte scaþe wrouht.”

1353	Hwan hauelok herde þat she radde	Hwan Hauelok herde þat she radde,
1354	Sone it was day sone he him cladde	Sone it was day, sone he him cladde,
1355	And sone to þe kirke yede	And sone to þe kirke yede
1356	Or he dide ani oþer dede	Or he dide ani oþer dede,
1357	And bifor þe rode bigan falle	Bifor þe rode bigan to falle,
1358	Croiz and crist bi to kalle	Croiz and Crist bigan to kalle,
1359	And seyde louerd þat al weldes	And seyde, ‘Louerd, þat al weldes,
1360	Wind and water wodes and feldes	Wind and water, wodes and feldes,
1361	For the holi milce of you	For the holi milce of you,
1362	Haue merci of me louerd nou	Hauẹ merci of me, louerd, nou!
1363	And wreke me yet on mi fo	And wreke me yet on mi fo
1364	Þat ich saw biforn min eyne slo	Þat ich saw biforn min eyne slo
1365	Mine sistres with a knif	Mine sistres, with a knif,
1366	And siþen wolde me mi lyf	And siþen wolde me mi lyf
1367	Haue reft for in the se	Hauẹ reft, for in the depe se
1368	Bad he grim haue drenched me	Bad he Grim hauẹ drenched me.
1369	He mi lond with mikel vn Rith	He hath mi lond with mikel un-riht,
1370	With michel wrong with mikel plith	With michel wrong, with mikel pliht;
1371	For ine misdede him neuere nouht	For i nẹ misdede him neuere nouht,
1372	And haued me to sorwe brouth	And haueth me to sorwe brouht.
1373	He haueth me do mi mete to þigge	He hauẹth me do mi mete þigge,
1374	And ofte in sorwe and pine ligge	And ofte in sorwe and pine ligge.
1375	Louerd haue merci of me	Louerd, hauẹ merci of me,
1376	And late wel passe þe se	And latẹ me passe wel þe se -
1377	Þat ihc haue ther offe douthe and kare	Þouh ich hauẹ ther-of doute and kare -
1378	With uten stormes ouer fare	With-uten stormes ouer-fare,
1379	Þat y ne drenched þer ine	Þat y ne drenched be þer-ine,
1380	Ne forfaren for no sinne	Ne may forfaren for no sinne.
1381	And bringge me wel to þe lond	And bringge me wel to þe lond
1382	Þat godard haldes in his hond	Þat Godard haldes in his hond;
1383	Þat is mi Rith eueri del	Þat is mi riht, eueri del:
1384	Iesu crist þou wost it wel	Iesu Crist, þou wost it wel!

1385	Þanne he hauede his bede seyd	Þanne he hauẹde his bede seyd,
1386	His offrende on þe auter leyd	His offrende on þe auter leyd,
1387	His leue at iesu crist he tok	His leue at Iesu Crist he tok,
1388	And at his suete moder ok	And at his suete moder ok,
1389	And at þe croiz þat he biforn lay	And at þe croiz, þat he bi lay,
1390	Siþen yede sore grotinde awey	Siþẹn yede sorẹ grotinde awey.

1391	Hwan he com hom he wore yare	Hwan he com hom, he wore yare,
1392	Grimes sones forto fare	Grimes sones, forto fare
1393	In to þe se fishes to gete	In-to þe se, fishes to gete,
1394	Þat hauelok mithe wel of ete	Þat Hauelok mihte wel of ete.
1395	But auelok þouthe al anoþer	But Hauelok þouhte al anoþer,
1396	First he kade þe heldeste broþer	First he kalde þe eldestẹ broþer,
1397	Roberd þe rede bi his name	Roberd þe Rede, bi his name,
1398	William wenduth and hauen	William Wendut, and Huwe Rauen,
1399	Grimes sones alle þre	Grimes sones alle þre,
1400	And seye liþes nou alle to me	And seyde, ‘Liþes nou to me;
1401	Louerdinges ich wile you sheue	Louerdinges, ich wilẹ you showe
1402	A þing of me þat ye wel knewe	A þing of me þat ye wel knowe.
1403	Mi fader was king of denshe lond	Mi fader was king of Denshe lond,
1404	Denemark was al in his hond	Denemark was al in his hond
1405	Þe day þat he was quik and ded	Þe day þat he was quik and ded;
1406	But þanne hauede he wicke red	But þanne hauẹde he wicke red,
1407	Þat he me and denemark al	Þat he me, and Denemark al,
1408	And mine sistres bi tawte a þral	And mine sistres bi-tawhte a þral:
1409	A deueles lime hus bitawte	A deueles lime he us bitawhte,
1410	And al his lond and al hise authe	And al his lond, and al hise auhte.
1411	For y saw that fule fend	For y saw that fule fend
1412	Mine sistres slo with hise hend	Slo mine sistres with hisẹ hend;
1413	First he shar a two here þrotes	First he shar a-two herẹ þrotes,
1414	And siþen hem al to grotes	And siþen karf hem al to grotes,
1415	And siþen bad in þe se	And siþen bad he in þe se
1416	Grim youre fader drenchen me	Grim, youre fader, drenchen me.
1417	Deplike dede he him swere	Deplike dede he him swere
1418	On bok þat he sholde me bere	On bok, þat he me sholde bere
1419	Vnto þe se an drenchen ine	Vnto þe se, and drenchen inne,
1420	And wolde taken on him þe sinne	And he woldẹ taken on him þe sinne.
1421	But grim was wis and swiþe hende	But Grim was wis, and swiþe hende,
1422	Wolde he nouth his soule shende	Wolde he nouht his soule shende;
1423	Leuere was him to be for sworen	Leuerẹ was him be for-sworen
1424	Þan drenchen me and ben for lorn	Þan drenchen me, and ben for-loren;
1425	But sone bigan he forto fle	But sonẹ bigan he forto fle
1426	Fro denemark forto berwen me	Fro Denemark, forto berwen me.
1427	For yis ich hauede þer ben funden	For yif ich hauẹde þer ben funden,
1428	Hauede ben slayn or harde bunden	Hauẹde he ben slayn, or harde bunden,
1429	And heye ben henged on a tre	And heyẹ ben henged on a tre,
1430	Hauede go for him gold ne fe	Hauẹde gon for him gold ne fe.
1431	For þi fro denemark hider he fledde	For-þi fro Denemark hider he fledde,
1432	And me ful fayre and ful wel fedde	And me ful fayre and ful wel fedde,
1433	So þat vn to þis day	So þat vn-to þis ilke day
1434	Haue ich ben fed and fostred ay	Haue ich ben fed and fostred ay.
1435	But nou ich am up to þat helde	But nou ich am up to þat elde
1436	Cumen that ich may wepne welde	Cumen, that ich may wepne welde,
1437	And y may grete dintes yeue	And y may grete dintes yeue,
1438	Shal i neuere hwil ich lyue	Shal i neuere, hwil ich lyue,
1439	Ben glad til that ich denemark se	Ben glad, til that ich Denemark se;
1440	I preie you þat ye wende with me	I preiẹ you þat ye wendẹ with me,
1441	And ich may mak you riche men	And ich may mak you riche men;
1442	Ilk of you shal haue castles ten	Ilk of you shal hauẹ castles ten,
1443	And þe lond þat þor til longes	And þe lond þat þor-til longes,
1444	Borwes tunes wodes and wonges	Borwes, tunes, wodes and wonges.’
1625	With swilk als ich byen shal	‘With swilk als ich byen shal:
1626	Þer of bi seche you nou leue	Þer-of bi-seche ich you nou leue;
1627	Wile ich speke with non oþer reue	Wile ich speke with non oþer reue,
1628	But with þe þat iustise are	But with you, þat iustise are,
1629	Þat y mithe seken mi ware	Þat y mihte sellẹn mi ware
1630	In gode borwes up and doun	In gode borwes up and doun,
1631	And faren ich wile fro tun to tun	And faren ich wilẹ fro tun to tun.’
1632	A gold ring drow he forth anon	A gold ring drow he forth anon,
1633	An hundred pund was worth þe ston	An hundred pund was worth þe ston,
1634	And yaf it ubbe for to spede	And yaf it Ubbe for to spede: -
1635	He was ful wis þat first yaf mede	‘He was ful wis þat first yaf mede;’
1636	And so was hauelok ful wis here	And so was Hauelok ful wis here,
1637	He solde his gold ring ful dere	He solde his gold ring ful dere:
1638	Was neuere non so dere sold	Was neuere non so dere sold
1639	For chapmen neyþer yung ne old	Fro chapmen, neyþer yung ne old:
1640	Þat shoren ye forthward ful wel heren	Þat sholẹn ye forthward ful wel leren,
1641	Yif þat ye wile þe storie heren	Yif þat ye wile þe storie heren.

1642	Hwan ubbe hauede þe gold ring	Hwan Ubbe hauẹde þe gold ring,
1643	Hauede he youenet for no þing	Hauẹde he yeuenet for no þing,
1644	Nouth for þe borw euere il del	Nouht for þe borw euere-ilk del: -
1645	Hauelok bi hel he swiþe wel	Hauelok bi-held he swiþe wel,
1646	Hw he was wel of bones maked	Hu he was wel of bones maked,
1647	Brod in þe sholdres ful wel schaped	Brod in þe sholdres, ful wel schaped,
1648	Þicke in þe brest of bodi long	Þicke in þe brest, of bodi long;
1649	He semede wel to ben wel strong	He semedẹ wel to ben wel strong.
1650	Deus hwat ubbe qui ne were he knith	‘Deus!’ quath Ubbe, ‘qui nẹ were he kniht?
1651	I woth þat he is swiþe with	I wot, þat he is swiþe wiht!
1652	Betere semede him to bere	Beterẹ semedẹ him to bere
1653	Helm on heued sheld and spere	Helm on heued, sheld and spere,
1654	Þanne to beye and selle ware	Þanne to beye and selle ware.
1655	Allas þat he shal þer with fare	Allas! þat he shal þer-with fare!
1656	Goddot wile he trowe me	Goddot! wile he trowe me,
1657	Chaffare shal he late be	Chaffare shal he late be.’
1658	Neþeles he seyde sone	Neþeles he seyde sone:
1659	Hauelok haue þi bone	Hauelok, haue þou þi bone,
1660	And y ful wel rede þ	And y ful wel rede þe
1661	Þat þou come and ete with me	Þat þou come, and etẹ with me
1662	To day þou and þi fayre wif	To-day, þou, and þi fayre wif,
1663	Þat þou louest also þi lif	Þat þou louest also þi lif.
1664	And haue Þou of hire no drede	And haue Þou of hirẹ no drede,
1665	Shal hire no man shame bede	Shal hire no man shame bede.
1666	Bi þe fey that y owe to þe	Bi þe fey y owe to þe,
1667	Þerof shal i me serf borw be	Þerof shal i mi-self borw be.’

1668	Hauelok herde þat he bad	Hauelok herde þat he bad,
1669	And thow was he ful sore drad	Al-thowh was he ful sore adrad
1670	With him to ete for hise wif	With him to ete, for hisẹ wif;
1671	For him wore leuere þat his lif	For him worẹ leuerẹ þat his lif
1672	Him wore reft þan she in blame	Him wore reft, þan she in blame
1673	Felle or lauthe ani shame	Felle, or lauhte ani shame.
1674	Hwanne he hauede his wille wat	Hwannẹ þat he his wille quath,
1675	þe stede þat he onne sat	þe stede, þat he onne sat,
1676	Smot ubbe with spures faste	Smot Ubbe þo with spures faste,
1677	And forth awey but at þe laste	And forth awey, but at þe laste,
1678	Or he fro him ferde	Or he ferre fro him ferde,
1679	Seyde he þat his folk herde	Seyde he, þat his folk it herde:
1680	Loke þat ye comen beþe	‘Loke þat ye comen beþe,
1681	For ich it wile and ich it rede	For ich it wile, and ich it rede.’

1682	Hauelok ne durste þe he were adrad	Hauelok ne durstẹ, þey he were adrad,
1683	Nouth with sitten þat ubbe bad	Nouht with-sitten þat Ubbe bad;
1684	His wif he dide with him lede	His wif he dide with him lede,
1685	Vn to þe heye curt he yde	Vn-to þe heye curt he yede.
1686	Roberd hire ledde þat was red	Roberd hirẹ ledde, þat was red,
1687	Þat haue þarned for hire þe ded	Þat hauẹde þoled for hire þe ded
1688	Or ani hauede hire misseyd	Or ani hauẹde hirẹ misseyd,
1689	Or hand with iuele onne leyd	Or hand with iuele onne leyd.
1690	Willam wendut was þat oþer	William Wendut was þat oþer
1691	Þat hire ledde roberdes broþer	Þat hirẹ ledde, Roberdes broþer,
1692	Þat was with at alle nedes	Þat was wiht at alle nedes:
1693	Wel is him þat god man fedes	‘Wel is him þat god man fedes!’
1694	Þan he weren comen to þe halle	Þan he werẹn comen to þe halle,
1695	Biforen ubbe and hise men alle	Biforen Ubbe, and hisẹ men alle,
1696	Vbbe stirte hem ageyn	Vbbe stirte hem ageyn,
1697	And mani a knith and mani a sweyn	And mani a kniht, and mani a sweyn,
1698	Hem for to se and forto shewe	Hem for to se, and forto shewe;
1699	Þo stod hauelok als a lowe	Þo stod Hauelok als a lowe
1700	Aboven þat þer inne wore	Abovẹn þo þat þer-inne wore,
1701	Rith al bi þe heued more	Riht al bi þe heued more
1702	Þanne ani þat þer inne stod	Þanne ani þat þer-inne stod:
1703	Þo was ubbe bliþe of mod	Þo was Ubbe bliþe of mod,
1704	Þat he saw him so fayr and hende	Þat he saw him so fayr and hende;
1705	Fro him ne mithe his herte wende	Fro him ne mihte his herte wende,
1706	Ne fro him ne fro his wif	Ne fro him, ne fro his wif;
1707	He louede hem sone so his lif	He louẹde hem sone so his lif.
1708	Weren non in denemark þat him þouthe	Werẹn non in Denemark, þat him þouhte,
1709	Þat he so mikel loue mouthe	Þat he so mikel loue mouhte;
1710	More he louede hauelok one	More he louẹde Hauelok one
1711	Þan al denemark bi mine wone	Þan al Denemark, bi mine wone!
1712	Loke nou hw god helpen kan	Lokẹ nou, hu God helpen kan
1713	O mani wise wif and man	O mani wise wif and man.

1714	Hwan it was comen time to ete	Hwan it was comen time to ete,
1715	Hise wif dede ubbe sone in fete	Hisẹ wif dede Ubbe sone in fete,
1716	And til hire seyde al on gamen	And til hirẹ seyde, al on gamen:
1717	Dame þou and hauelok shulen ete samen	‘Dame, þou and Hauelok shulẹn etẹ samen,
1718	And goldeboru shal ete wit me	And Goldeboru shal etẹ with me,
1719	Þat is so fayr so flour on tre	Þat is so fayr so flour on tre;
1720	In al denemark nis wimman	In al Denemark is wimman non
1721	So fayr so sche bi seint iohan	So fayr so sche, bi seint Iohan!’
1722	Þanne were set and bord leyd	Þanne he werẹ set, and bord leyd,
1723	And þe beneysun was seyd	And þe beneysun was seyd,
1724	Biforn hem com þe beste mete	Biforn hem com þe beste mete
1725	Þat king or cayser wolde ete	Þat king or cayser wolde ete;
1726	Kranes swannes ueneysun	Kranes, swannes, ueneysun,
1727	Lax lampreys and god sturgun	Lax, lampreys, and god sturgiun,
1728	Pyment to drinke and god clare	Pyment to drinke, and god claré,
1729	Win hwit and red ful god plente	Win hwit and red, ful god plenté.
1730	Was þer inne no page so lite	Was þer-inne no page so lite
1731	þat euere wolde ale bite	þat euere wolde ale bite.
1732	Of þe mete forto telle	Of þe mete forto telle,
1733	Ne of þe metes bidde i nout dwelle	Ne of þe win bidde i nouht dwelle;
1734	Þat is þe storie for to lenge	Þat is þe storie for to lenge,
1735	It wolde anuye þis fayre genge	It wolde anuye þis fayre genge.
1736	But hwan he haueden þe kilþing deled	But hwan he hauẹden ilk þing deyled,
1737	And fele siþes haueden wosseyled	And fele siþe hauẹden wosseyled,
1738	And with gode drinkes seten longe	With gode drinkes seten longe,
1739	And it was time for to gonge	And it was time for to gonge,
1740	Il man to þer he cam fro	Ilk man to þer þat he cam fro,
1741	Þouthe ubbe yf i late hem go	Þouhte Ubbe, ‘Yf I late hem go,
1742	Þus one foure with uten mo	Þus one foure, with-uten mo,
1743	So mote ich brouke finger or to	So mote ich brouke finger or to,
1744	For þis wimman bes mike wo	For þis wimman bes mikel wo!
1745	For hire shal men hire louerd slo	For hirẹ shal men hirẹ louerd slo.’
1746	He tok sone knithes ten	He tok sone knihtes ten,
1747	And wel sixti oþer men	And wel sixti oþer men,
1748	Wit gode bowes and with gleiues	With gode bowes, and with gleiues,
1749	And sende him unto þe greyues	And sende him unto þe greyues,
1750	þe beste man of al þe toun	þe beste man of al þe toun,
1751	Þat was named bernard brun	Þat was named Bernard Brun;
1752	And bad him als he louede his lif	And bad him, als he louẹde his lif,
1753	Hauelok wel ymen and his wif	Hauelok wel yemen, and his wif,
1754	And wel do wayten al þe nith	And wel do wayten al þe niht,
1755	Til þe oþer day þat it were lith	Til þe oþer day, þat it were liht.
1756	Bernard was trewe and swiþe with	Bernard was trewe, and swiþe wiht,
1757	In al þe borw ne was no knith	In al þe borw ne was no kniht
1758	Þat betere couþe on stede riden	Þat beterẹ couþe on stede riden,
1759	Helm on heued ne swerd bi side	Helm on heued, ne swerd bi side.
1760	Hauelok he gladlike under stod	Hauelok he gladlike under-stod
1761	With mike loue and herte god	With mikel loue and herte god,
1762	And dide greyþe a super riche	And dide greyþe a super riche,
1763	Also he was no with chinche	Also he was no whit chiche,
1764	To his bihoue euer il del	To his bihoue euer-ilk del,
1765	Þat he mithe supe swiþe wel	Þat he mihtẹ supe swiþe wel.

1766	Also he seten and sholde soupe	Also he seten, and sholde soupe,
1767	So comes a ladde in a ioupe	So comes a ladde in a ioupe,
1768	And with him sixti oþer stronge	And with him sixti oþer stronge,
1769	With swerdes drawen and kniues longe	With swerdes drawen, and kniues longe,
1770	Ilkan in hande a ful god gleiue	Ilkan in hande a ful god gleiue,
1771	And seyde undo bernard þe greyue	And seyde, ‘Undo, Bernard þe greyue!
1772	Vndo swiþe and latus in	Vndo swiþe, and lat us in,
1773	Or þu art ded bi seint austin	Or þu art ded, bi seint Austin!’
1774	Bernard stirt up þat was ful big	Bernard stirt up, þat was ful big,
1775	And caste a brinie up on his rig	And caste a brinie up-on his rig,
1776	And grop an ar þat was ful god	And grop an ax, þat was ful god,
1777	Lep to þe dore so he wore wod	Lep to þe dore, so he worẹ wod,
1778	And seyde hwat are ye þat are þer oute	And seydẹ, ‘Hwat arẹ ye, þat arẹ þer-oute,
1779	Þat þus biginnen forto stroute	Þat þus biginnen forto stroute?
1780	Goth henne swiþe fule þeues	Goth henne swiþe, fule þeues,
1781	For bi þe louerd þat man on leues	For, bi þe Louerd þat man on leues,
1782	Shol ich casten þe dore open	Shol ich casten þe dore open,
1783	Summe of you shal ich drepen	Summe of you shal ich drepen
1784	And þe oþre shal ich kesten	And þe oþre shal ich kesten
1785	In feteres and ful faste festen	In feteres, and ful faste festen!’
1786	Hwat haue ye seid quoth a ladde	‘Hwat haue ye seid?’ quoth a ladde,
1787	Wenestu þat we ben adradde	Wenẹstu þat we ben adradde?
1788	We shole at þis dore gonge	We sholen at þis dore gonge
1789	Maugre þin carl or outh longe	Maugre þin, carl, or ouht longe.’
1790	He gripen sone a bulder ston	He gripen sone a bulder-ston,
1791	And let it fleye ful god won	And let it fleye, ful god won,
1792	Agen þe dore þat it to rof	Ageyn þe dore, þat it to-rof:
1793	Auelok it saw and þider drof	Hauelok it saw, and þider drof,
1794	And þe barre sone vt drow	And þe barre sone vt-drow,
1795	Þat was unride and gret ynow	Þat was unride and gret ynow,
1796	And caste þe dore open wide	And castẹ þe dore open wide,
1797	And seide her shal y now abide	And seidẹ, ‘Her shal y now abide:
1798	Comes swiþe vn to me datheit	Comes swiþe vn-to me !
1799	Datheyt hwo you henne fle	Datheyt hwo you henne fle!’
1800	No quodh on þat shaltou coupe	‘No,’ quod on, ‘þat shaltou coupe,’
1801	And bigan til him to loupe	And bigan til him to loupe,
1802	In his hond his swerd ut drawe	In his hond his swerd ut-drawe,
1803	Hauelok he wende þore haue slawe	Hauelok he wende þore hauẹ slawe;
1804	And with comen oþer two	And with him comen oþer two,
1805	Þat him wolde of liue haue do	Þat him wolde of liue hauẹ do.
1806	Hauelok lifte up þe dore tre	Hauelok lifte up þe dore-tre,
1807	And at a dint he slow hem þre	And at a dint he slow hem þre;
1808	Was non of hem þat his hernes	Was non of hem þat hise hernes
1809	Ne lay þer ute ageyn þe sternes	Ne lay þer-ute ageyn þe sternes.
1810	Þe ferþe þat he siþen mette	Þe ferþe þat he siþen mette,
1811	Wit þe barre so he him grette	With þe barre so he him grette,
1812	Bifor þe heued þat þe rith eye	Bifor þe heued, þat þe riht eye
1813	Vt of þe hole made he fleye	Vt of þe hole made he fleye,
1814	And siþe clapte him on þe crune	And siþe clapte him on þe crune
1815	So þat he stan ded fel þor dune	So þat he stan-ded fel þor dune.
1816	Þe fifte þat he ouer tok	Þe fifte þat he ouer-tok
1817	Gaf he a ful sor dint ok	Gáf he a ful sor dint ok,
1818	Bitwen þe sholdres þer he stod	Bitwen þe sholdres, þer he stod,
1819	Þat he spen his herte blod	Þat he spende his herte blod.
1820	þe sixte wende for to fle	þe sixte wende for to fle,
1821	And he clapte him with þe tre	And he clapte him with þe tre
1822	Rith in þe fule necke so	Riht in þe fule necke so,
1823	Þat he smot hise necke on to	Þat he smot hisẹ necke on to.
1824	Þanne þe sixe weren doun feld	Þannẹ þe sixẹ werẹn doune feld,
1825	Þe seuenþe brayd ut his swerd	Þe seuenþe brayd ut his swerd,
1826	And wolde hauelok Riht in the eye	And wolde Hauelok riht in the eye;
1827	And haue le barre fleye	And Hauelok let þe barre fleye,
1828	And smot him sone ageyn þe brest	And smot him sone ageyn þe brest,
1829	Þat hauede he neuere schifte of prest	Þat hauẹde he neuere schrifte of prest;
1830	For he was ded on lesse hwile	For he was ded on lesse hwile
1831	Þan men mouthe renne a mile	Þan men mouhte renne a mile.
1832	Alle þe oþere weren ful kene	Alle þe oþẹre werẹn ful kene;
1833	A red Þei taken hem bi twene	A red Þei taken hem bi-twene,
1834	Þat he sholde him bi halue	Þat he sholden him bi-halue,
1835	And brisen so þat wit no salue	And brisen so, þat with no salue
1836	Ne sholde him helen leche non	Ne sholde him helen leche non:
1837	Þey drowen ut swerdes ful god won	Þey drowen ut swerdes, ful god won,
1838	And shoten on him so don on bere	And shoten on him, so don on bere
1839	Dogges þat wolden him to tere	Dogges, þat wolden him to-tere,
1840	Þanne men doth þe bere beyte	Þannẹ men doth þe bere beyte:
1841	Þe laddes were kaske and teyte	Þe laddes were kaske and teyte,
1842	And un bi yeden him ilkon	And vm-bi-yeden him ilkon.
1843	Sum smot with tre and sum wit ston	Sum smot with tre, and sum with ston;
1844	Summe putten with gleyue in bac and side	Summẹ puttẹn with gleyue in bac and side,
1845	And yeuen wundes longe and wide	And yeuen wundes longe and wide
1846	In twenti stedes and wel mo	In twenti stedes, and wel mo,
1847	Fro þe croune til the to	Fro þe croune til the to.
1848	Hwan he saw þat he was wod	Hwan he saw þat, he was wod,
1849	And was it ferlik hw he stod	And was it ferlik, hu he stod,
1850	For the blod ran of his sides	For the blod ran of his sides
1851	So water þat fro þe welle glides	So water þat fro þe welle glides;
1852	But þanne bigan he for to mowe	But þannẹ bigan he for to mowe
1853	With the barre and let hem shewe	With the barre, and let hem shewe
1854	Hw he cowþe sore smite	Hu he cowþe sore smite;
1855	For was þer non long ne lite	For was þer non, long ne lite,
1856	Þat he Mouthe ouer take	Þat he mouhte ouer-take,
1857	Þat he ne garte his croune krake	Þat he ne garte his croune krake;
1858	So þat on a litel stund	So þat, on a litel stund,
1859	Felde he twenti to þe grund	Felde he twenti to þe grund.

1860	Þo bigan gret dine to rise	Þo bigan gret dinẹ to rise,
1861	For þe laddes on ilke wise	For þe laddes on ilke wise
1862	Him asayleden wit grete dintes	Asaylẹden him with grete dintes,
1863	Fro fer he stoden him with flintes	Ful fer he stoden, and with flintes
1864	And gleyues schoten him fro ferne	And gleyues schoten him fro ferne,
1865	For drepen him he wolden yerne	For drepen him he wolden yerne;
1866	But dursten he newhen him no more	But dursten he newhen him no more
1867	Þanne he bor or leun wore	Þanne he bor or leun wore.

1868	Huwe rauen þat dine herde	Huwe Rauen þat dine herde,
1869	And þowthe wel þat men mis ferde	And þowhte wel, þat men mis-ferde
1870	With his louerd for his wif	With his louerd, for his wif;
1871	And grop an ore and a long knif	And grop an ore, and a long knif,
1872	And þider drof al so an hert	And þider drof al-so an hert,
1873	And cham þer on a litel stert	And cam þer on a litel stert,
1874	And saw how þe laddes wode	And saw how þat þe laddes wode
1875	Hauelok his louerd umbistode	Hauelok his louerd umbistode,
1876	And beten on him so doth þe smith	And beten on him so doth þe smith
1877	With þe hamer on þe stith	With þe hamer on þe stith.

1878	Allas hwat hwe þat y was boren	‘Allas!’ quath Huwe, ‘þat y was boren!
1879	Þat euere et ich bred of koren	Þat euere et ich bred of koren!
1880	Þat ich here þis sorwe se	Þat ich here þis sorwe se!
1881	Roberd willam hware ar ye	Roberd! William! hware ar ye?
1882	Gripeth eþer unker a god tre	Gripẹth eyþer unker a god tre,
1883	And late we nouth þise doges fle	And latẹ we nouht þise dogges fle,
1884	Til ure louerd wreke	Til ure louerd wreke be;
1885	Cometh swiþe and folwes me	Cometh swiþe, and folwes me!
1886	Ich haue in honde a ful god ore	Ich haue in honde a ful god ore:
1887	Datheit wo ne smite sore	Datheit hwo ne smite sore!’
1888	Ya leue ya quod roberd sone	‘Ya! leue, ya!’ quod Roberd sone,
1889	We hauen ful god lith of þe mone	‘We hauẹn ful god liht of þe mone.’
1890	Roberd grop a staf strong and gret	Roberd a staf grop, strong and gret,
1891	Þat mouthe ful wel bere a net	Þat mouhte ful wel bere a net,
1892	And willam wendut grop a tre	And William Wendut grop a tre
1893	Mikel grettere þan his þre	Mikel gretterẹ þan his þe,
1894	And bernard held his ax ful faste	And Bernard held his ax ful faste;
1895	I seye was he nouth þe laste	I seye, was he nouht þe laste;
1896	And lopen forth so he weren wode	And lopen forth so he werẹn wode
1897	To þe laddes þer he stode	To þe laddes, þer he stode,
1898	And yaf hem wundes swiþe grete	And yaf hem wundes swiþe grete;
1899	Þer mithe men wel se boyes bete	Þer mihtẹ men wel se boyes bete,
1900	And ribbes in here sides breke	And ribbes in herẹ sides breke,
1901	And hauelok on hem wel wreke	And Hauelok on hem wel be wreke.
1902	He broken armes he broken knes	He broken armes, he broken knes,
1903	He broken shankes he broken thes	He broken shankes, he broken thes.
1904	He dide þe blode þere renne dune	He dide þe blodẹ þerẹ renne dune
1905	To þe fet rith fro the crune	To þe fet riht fro the crune,
1906	For was þer spared heued non	For was þer spared heued non:
1907	He leyden on heuedes ful god won	He leyden on heuẹdes, ful god won,
1908	And made croune breke and crake	And made crounes breke and crake
1909	Of þe broune and of þe blake	Of þe broune, and of þe blake;
1910	He maden here backes al so bloute	He maden herẹ backes al-so bloute
1911	Als he wombes and made hem rowte	Als herẹ wombes, and made hem rowte
1912	Als he weren kradelbarnes	Als he weren kradelbarnes:
1913	So dos þe child þat moder þarnes	So dos þe child þat moder þarnes.

1914	Daþeit we recke for he it seruede	Daþeit hwo recke! for he it seruedẹ;
1915	Hwat dide he þore weren he werewed	Hwat dide he þore? He weren werewed!
1916	So longe haueden he but and bet	So longe hauẹden he but and bet
1917	With neues under hernes set	With neues under hernes set,
1918	Þat of þo sixti men and on	Þat of þo sixti men and on
1919	Ne wente þer awey liues non	Ne wente awey þer liues non.

1920	On þe morwen hhan it was day	On þe morwen, hwan it was day,
1921	Ilc on other wirwed lay	Ilc on other wirwed lay
1922	Als it were dogges þat weren henged	Als it were dogges þat werẹn henged;
1923	And summe leye in dikes slenget	And summe leye in dikes slenget,
1924	And summe in gripes bi þe her	And summe in gripes bi þe her
1925	Drawen ware and laten ther	Drawen ware, and laten ther.
1926	Sket cam tiding in til ubbe	Sket cam tiding in-til Ubbe,
1927	Þat hauelok hauede with a clubbe	Þat Hauelok hauẹde with a clubbe
1928	Of hise slawen sixti and on	Of hise slawen sixti and on
1929	Sergaunz þe beste þat mithen gon	Sergaunz, þe beste þat mihten gon.
1930	Deus quoth ubbe hwat may þis be	‘Deus!’ quoth Ubbe, ‘hwat may þis be?
1931	Betere his inime miself and se	Beterẹ is i nime miself and se
1932	Þat þis baret on hwat is wold	Hwat þis baret oweth on wold,
1933	Þanne i sende yunge or old	Þanne i sende yunge or old.
1934	For yif i sende him un to	For yif i sende him un-to,
1935	I wene men sholde him shame do	I wenẹ men sholde him shame do,
1936	And þat ne wolde ich for no þing	And þat ne wolde ich for no þing:
1937	I loue him wel bi heuene king	I loue him wel, bi heuẹne king!
1938	Me wore leuere i wore lame	Me wore leuerẹ i wore lame
1939	Þanne men dide him ani shame	Þannẹ men dide him ani shame,
1940	Or tok or onne handes leyde	Or tok, or onne handes leyde
1941	Vn ornelske or same seyde	Vn-ornelike, or shame seyde.’
1942	He lep up on a stede lith	He lep up on a stede liht,
1943	And with him mani a noble knith	And with him mani a noble kniht,
1944	And ferde forth un to þe tun	And ferde forth un-to þe tun,
1945	And dide calle bernard brun	And dide calle Bernard Brun
1946	Vt of his hus wan he þer cam	Vt of his hus, hwan he þer cam;
1947	And bernard sone ageyn nam	And Bernard sone ageyn him nam,
1948	Al to tused and al to torn	Al to-tused and al to-torn,
1949	Ner also naked so he was born	Ner also naked so he was born,
1950	And al to brised bac and þe	And al to-brised, bac and þe:
1951	Quoth ubbe bernard hwat is þe	Quoth Ubbe, ‘Bernard, hwat is þe?
1952	Hwo haues þe þus ille maked	Hwo haues þe þus ille maked,
1953	Þus to riuen and al mad naked	Þus to-riuen, and al mad naked?’

1954	Iouerd merci quot he sone	‘Louerd, merci,’ quoth he sone,
1955	To nicht also ros þe mone	‘To-nicht, also ros þe mone,
1956	Comen her mo þan sixti þeues	Comẹn her mo þan sixti þeues,
1957	With lokene copes and wide sleues	With lokenẹ copes and wide sleues,
1958	Me forto robben and to pine	Me forto robben and to pine,
1959	And for to drepe me and mine	And for to drepe me and mine.
1960	Mi dore he broken up ful sket	Mi dore he broken up ful sket,
1961	And wolde me binden hond and fet	And woldẹ me binden hond and fet.
1962	Wan þe godemen þat sawe	Hwan þe godemen þat sawe,
1963	Hauelok and he þat bi þe wowe	Hauelok, and he þat bi þe wowe
1964	Leye he stirten up sone on on	Leye, he stirten up sone on-on,
1965	And summe grop tre and sum grop ston	And summẹ grop tre, and sum grop ston,
1966	And driue hem ut þei he weren crus	And driue hem ut, þei he werẹn crus,
1967	So dogges ut of milne hous	So dogges ut of milne-hous.
1968	Hauelok grop þe dore tre	Hauelok grop þe dore-tre,
1969	And a dint he slow hem thre	And at a dint he slow hem thre.
1970	He is þe beste man at nede	He is þe beste man at nede
1971	Þat euere mar shal ride stede	Þat euere-mar shal ride on stede
1972	Als helpe god bi mine wone	Als helpe God, bi mine wone,
1973	A þhousend of men his he worth one	A þousand men is he worth one
1974	Yif he ne were ich were nou ded	Yif he ne were, ich werẹ nou ded,
1975	So haue ich don Mi soule red	So haue ich don mi soule red!
1976	But it is hof him mikel sinne	But it is of him mikel sinne;
1977	He maden him swilke woundes þrinne	He maden him swilke woundes þrinne,
1978	Þat of þe alþer leste wounde	Þat of þe alþer-leste wounde
1979	Were a stede brouht to grunde	Were a stede brouht to grunde.
1980	He haues a wunde in the side	He hauẹs a wunde in the side,
1981	With a gleyue ful un ride	With a gleyue, ful un-ride;
1982	And he haues on þoru his arum	And he hauẹs on þoru his arum,
1983	Þer of is ful mikel harum	Þer-of is him ful mikel harum;
1984	And he haues on þoru his þhe	And he hauẹs on þoru his þe,
1985	þe vn rideste þat men may se	þe vn-rideste þat men may se;
1986	And oþe wundes haues he stronge	And oþẹre wundes hauẹs he stronge,
1987	Mo than twenti swiþe longe	Mo than twenti, swiþe longe.
1988	But siþen he hauede lauth þe sor	But siþen he hauẹde lauht þe sor
1989	Of þe wundes was neuere bor	Of þe wundes, was neuere bor
1990	Þat so fauth so he fauth þanne	Þat so fauht so he fauht þanne
1991	Was non þat hauede þe hern panne	Was non þat hauẹde þe hern-panne
1992	So hard þat he ne dede alto cruhsse	So hard, þat he nẹ dede alto-crusshe,
1993	And alto shiuere and alto frusshe	And alto-shiuere, and alto-frusshe.
1994	He folwede hem so hund dos hare	He folwede hem so hund dos hare,
1995	Daþeyt on he wolde spare	Daþeyt on he wolde spare,
1996	Þat ne made hem euerilk on	Þat he ne made hem euerilk on
1997	Ligge stille so doth þe ston	Ligge stille so doth þe ston:
1998	And þer nis he nouth to frie	And þer nis he nouht to frie,
1999	For oþer sholde he make hem lye	For oþer sholde he make hem lye
2000	Ded or þei him hauede slawen	Ded, or þei him hauẹde slawen,
2001	Or alto hewen or alto drawen	Or alto-hewen, or alto-drawen.

2002	Louerd haui no more plith	Louerd, haui no more pliht
2003	Of Þat ich was þus greþed to nith	Þat ich was greued þus to-niht.
2004	Þus wolde þe theues me haue reft	Þus wolde þe theues me hauẹ reft,
2005	But god þank he hauenet sure keft	God þank, he hauẹnet sure keft.
2006	But it is of him mikel scaþe	But it is of him mikel scaþe:
2007	I woth þat he bes ded ful raþe	I wot þat he bes ded ful raþe.’

2008	Quoth ubbe bernard seyst þou soth	Quoth Ubbe, ‘Bernard, seyst þou soth?’
2009	Ya sire that ine lepe oth	Ya, sire, that i ne lepe oth:
2010	Yif y louerd a word leye	Yif y, louerd, a word leye,
2011	To morwen do me hengen heye	To-morwen do me hengen heye.’
2012	Þe burgeys þat þer bi stode þore	Þe burgeys þat þer-bi stode þore
2013	Grundlike and grete oþes swore	Grundlike and grete oþes swore,
2014	Litle and mikle yunge and holde	Litle and mikle, yunge and olde,
2015	Þat was soth þat bernard tolde	Þat was soth, þat Bernard tolde.
2016	Soth was þat he wolden him bynde	Soth was, þat he wolden him bynde,
2017	And trusse al þat he mithen fynde	And trusse al þat he mihten fynde
2018	Of hise in arke or in kiste	Of hise, in arke or in kiste,
2019	Þat he mouthe in seckes þriste	Þat he mouhte in seckes þriste.
2020	Louerd he haueden al awey born	‘Louerd, awey he hauẹden al born
2021	His þing and him self alto torn	His þing, and him-self alto-torn,
2022	But als god self barw him wel	But also God self barw him wel,
2023	Þat he ne tinte no catel	Þat he ne tinte no catel.
2024	Hwo mithe so mani stonde ageyn	Hwo mihtẹ so mani stonde ageyn
2025	Bi nither tale knith or swein	Bi nihter-tale, kniht or swein?
2026	He weren bi tale sixti and ten	He werẹn bi tale sixti and ten,
2027	Starke laddes stalworþi men	Starke laddes, stalworþi men,
2028	And on þe mayster of hem alle	And on, þe mayster of hem alle,
2029	Þat was þe name giffin galle	Þat was bi name Griffin Galle.
2030	Hwo mouthe agey so mani stonde	Hwo mouhte ageyn so mani stonde,
2031	But als þis man of ferne londe	But als þis man of ferne londe
2032	Haueth hem slawen with a tre	Hauẹth hem slawen with a tre?
2033	Mikel ioie haue he	Mikel ioie haue he!
2034	God yeue him mikel god to welde	God yeue him mikel god to welde,
2035	Boþe in tun and ek in felde	Boþe in tun, and ek in felde!
2036	We is set he etes mete	“Wel is set, he etes mete.”’
2037	Quoth ubbe doth him swiþe fete	Quoth Ubbe, ‘Doth him swiþe fete,
2038	Þat y mouthe his woundes se	Þat y mouhte his woundes se,
2039	Yf that he mouthen holed be	Yf that he mouhten heled be.
2040	For yf he mouthe couere yet	For yf he mouhte couere yet,
2041	And gangen wel up on hise fet	And gangen wel up-on hisẹ fet,
2042	Mi self shal dubbe him to knith	Mi-self shal dubben him to kniht,
2043	For þi þat he is so with	For-þi þat he is man so wiht.
2044	And yif he liuede þo foule theues	And yif he liuẹde, þo foule theues,
2045	Þat weren of kaym kin and eues	Þat weren of Kaymes kin and Eues,
2046	He sholden hange bi þe necke	He sholden hange bi þe necke
2047	Of here ded daþeit wo recke	Of here ded daþeit hwo recke,
2048	Hwan he yeden þus on nithes	Hwan he yeden þus on nihtes
2049	To binde boþe burgmen and knithes	To binde boþe burgmen and knihtes.
2050	For bynderes loue ich neuere mo	For bynderẹs loue ich neuere mo,
2051	Of hem ne yeue ich nouht a slo	Of hem ne yeue ich nouht a slo.’

2052	Hauelok was bifore ubbe browth	Hauelok was to Ubbe browht,
2053	Þat hauede for him ful mikel þouth	Þat hauẹde for him ful mikel þouht,
2054	And mikel sorwe in his herte	And mikel sorwe in his herte
2055	For hise wundes þat we so smerte	For hise wundes, þat werẹ so smerte.

2056	But hwan his wundes weren shewed	But hwan his wundes weren shewed,
2057	And a leche hauede knawed	And a leche hauẹde knawed
2058	Þat he hem mouthe ful wel hele	Þat he hem mouhte ful wel hele,
2059	Wel make him gange and ful wel mele	Wel make him gange, and ful wel mele,
2060	And wel a palefrey bistride	And wel a palefrey bistride,
2061	And wel up on a stede ride	And wel up-on a stede ride,
2062	Þo let ubbe al his care	Þo let Ubbe al his care
2063	And al his sorwe ouer fare	And al his sorwe ouer-fare;
2064	And seyde cum now forth with me	And seyde, ‘Cum now forth with me,
2065	And goldeboru þi wif with þe	And Goldeboru, þi wif, with þe,
2066	And þine seriaunz alle þre	And þine seriaunz alle þre,
2067	For nou wile y youre warant be	For nou wile y yourẹ warant be;
2068	Wile y non of here frend	Wile y þat non of here frend
2069	Þat þu slowe with þin hend	Þat þu slowe with þin hend
2070	Moucte wayte þe slo	Mouhte wayte þe to slo,
2071	Also þou gange to and fro	Also þou gange to and fro.
2072	I shal lene þe a bowr	I shal lene þe a bowr
2073	Þat is up in þe heye tour	Þat is up in þe heye tour,
2074	Til þou mowe ful wel go	Til þou mowe ful wel go,
2075	And wel ben hol of al þi wo	And wel ben hol of al þi wo.
2076	It ne shal no þing ben bitwene	It ne shal no þing ben bitwene
2077	Þi bour and min also y wene	Þi bour and min, also y wene,
2078	But a fayr firrene wowe	But a fayr firrenẹ wowe; -
2079	Speke y loude or spek y lowe	Speke y loude, or spek y lowe,
2080	Þou sahalt ful wel heren me	Þou shalt ful wel heren me,
2081	And þan þu wilt þou shalt me se	And þan þu wilt, þou shalt me se.
2082	A rof shal hile us boþe o nith	A rof shal hile us boþe o-niht,
2083	Þat none of mine clerk ne knith	Þat none of mine, clerk ne kniht,
2084	Ne sholen þi wif no shame bede	Ne sholẹn þi wif no shame bede,
2085	No more þan min so god me rede	No morẹ þan min, so God me rede! ‘

2086	He dide un to þe borw bringe	He dide un-to þe borw bringe
2087	Sone anon al with ioynge	Sone anon, al with ioyinge,
2088	His wif and his serganz þre	His wif, and ek his serganz þre,
2089	Þe beste men þat mouthe be	Þe beste men þat mouhte be.
2090	Þe firste nith he lay þer inne	Þe firste niht he lay þer-inne,
2091	Hise wif and his serganz þrinne	Hisẹ wif, and ek his serganz þrinne,
2092	Aboute þe middel of þe nith	Aboute þe middel of þe niht
2093	Wok ubbe and saw a mikel lith	Wok Ubbe, and saw a mikel liht
2094	In þe bour þat hauelok lay	In þe bour þer Hauelok lay,
2095	Also brith so it were day	Also briht so it werẹ day.

2096	Deus quoth ubbe hwat may þis be	Deus!’ quoth Ubbe, ‘hwat may þis be?
2097	Betere is i go miself and se	Betere is i go miself, and se:
2098	Hweþer he sitten nou and wesseylen	Hweþer he sittẹn nou, and wesseylen,
2099	Or of ani shotshipe to deyle	Or ani sotshipe to-deyle,
2100	Þis tid nithes also foles	Þis tid nihtes, also foles;
2101	Þan birþe men casten hem in poles	Þan birþ men casten hem in poles,
2102	Or in a grip or in þe fen	Or in a grip, or in þe fen:
2103	Nou ne sitten none but wicke men	Nou nẹ sitten none but wicke men,
2104	Glotuns reures or wicke þeues	Glotuns, reueres, or wicke þeues,
2105	Bi crist þat alle folk onne leues	Bi Crist, þat alle folk on leues !’

2106	He stod and totede in at a bord	He stod, and totede in at a bord
2107	Her he spak anilepi word	Er he spak anlepi word,
2108	And saw hem slepen faste ilkon	And saw hem slepen faste ilkon,
2109	And lye stille so þe ston	And lye stille so þe ston;
2110	And saw al þat mikel lith	And saw þat al þat mikel liht
2111	Fro hauelok cam þat was so brith	Fro Hauelok cam, þat was so briht.
2112	Of his mouth it com il del	Of his mouth it com ilk del,
2113	Þat was he war ful swiþe wel	Þat was he war ful swiþe wel.
2114	Deus quoth he hwat may þis mene	‘Deus!’ quoth he, ‘hwat may þis mene!’
2115	He calde boþe arwe men and kene	He caldẹ boþe arwe men and kene,
2116	Knithes and serganz swiþe sleie	Knihtes and serganz swiþe sleie,
2117	Mo þan an hundred with uten leye	Mo þan an hundred, with-uten leye,
2118	And bad hem alle comen and se	And bad hem alle comen and se
2119	Hwat þat selcuth mithe be	Hwat þat selcuth mihte be.

2120	Als þe knithes were comen alle	Als þe knihtes were comen alle
2121	þer hauelok lay ut of þe halle	þer Hauelok lay, ut of þe halle,
2122	So stod ut of his mouth a glem	So stod ut of his mouth a glem,
2123	Rith al swilk so þe sunne bem	Riht al swilk so þe sunne-bem;
2124	Þat al so lith wa þare bi heuene	Þat al so liht was þarẹ, bi heuene!
2125	So þer brenden serges seuene	So þer brenden serges seuene
2126	And an hundred serges ok	And an hundred serges ok:
2127	Þat durste hi sweren on a bok	Þat durste hi sweren on a bok.
2128	He slepen faste alle fiue	He slepen faste alle fiue,
2129	So he weren brouth of liue	So he weren brouht of liue;
2130	And hauelok lay on his lift side	And Hauelok lay on his lift side,
2131	In his armes his brithe bride	In his armes his brihte bride.
2132	Bi þe pappes he leyen naked	Bi þe pappes he leyen naked:
2133	So faire two weren neuere maked	So faire two werẹn neuere maked
2134	In a bed to lyen samen	In a bed to lyen samen: -
2135	Þe knithes þouth of hem god gamen	Þe knihtes þouht of hem god gamen,
2136	Hem forto shewe and loken to	Hem forto shewe and loken to.
2137	Rith also he stoden alle so	Riht also he stoden alle so,
2138	And his bac was toward hem wend	And his bac was toward hem wend,
2139	So weren he war of a croiz ful gent	So werẹn he war of a croiz ful gent
2140	On his rith shuldre swe brith	On his riht shuldre, swiþe briht,
2141	Brithter þan gold ageyn þe lith	Brihter þan gold ageyn þe liht;
2142	So þat he wiste heye and lowe	So þat he wiste, heye and lowe,
2143	Þat it was kunrik þat he sawe	Þat it was kunrik þat he sawe.
2144	It sparkede and ful brith shon	It sparkede, and ful brihte shon
2145	So doth þe gode charbucle ston	So doth þe gode charbucle-ston,
2146	Þat men Mouthe se by þe lith	Þat men se mouhte, by þe liht,
2147	A peni chesen so was it brith	A peni chesen, so was it briht.
2148	Þanne bihelden he him faste	Þannẹ bihelden he him faste,
2149	So þat he knewen at þe laste	So þat he knewen, at þe laste,
2150	Þat he was birkabeynes sone	Þat he was Birkabeynes sone,
2151	Þat was here king þat was hem wone	Þat was herẹ king, þat was hem wone
2152	Wel to yeme and wel were	Wel to yemen, and wel were
2153	Ageynes uten laddes here	Ageynes uten-laddes here.
2154	For it was neuere yet a broþer	‘For it was neuere yet a broþer
2155	In al denemark so lich anoþer	In al Denemark so lich anoþer
2156	So þis man þat is so fayr	So þis man, þat is so fayr
2157	Als birkabeyn he is hise eyr	Als Birkabeyn; he is hise eyr.’

2158	He fellen sone at hise fet	He fellen sone at hisẹ fet,
2159	Was non of hem þat he ne gret	Was non of hem þat he ne gret,
2160	Of ioie he weren alle so fawen	Of ioie he weren allẹ so fawen
2161	So he him haueden of erþe drawen	So he him hauẹden of erþe drawen.
2162	Hise fet he kisten an hundred syþes	Hisẹ fet he kisten an hundred syþes,
2163	Þe tos þe nayles and þe lithes	Þe tos, þe nayles, and þe lithes,
2164	So þat he bigan to wakne	So þat he bigan to wakne,
2165	And wit hem ful sore to blakne	And with hem ful sore to blakne;
2166	For he wende he wolden him slo	For he wende he wolden him slo,
2167	Or elles binde him and do wo	Or elles binde him, and do wo.

2168	Quoth ubbe louerd ne dred þe nowth	Quoth Ubbe, ‘Louerd, ne dred þe nowht
2169	Me þinkes that i se þi þouth	Me þinkes that I se þi þouht.
2170	Dere sone wel is me	Dere sone, wel is me
2171	Þat y þe with eyn se	Þat y þe with eyen se.
2172	Man red louerd bede y þe	Man-red, louerd, bede y þe,
2173	Þi man auht i ful wel to be	Þi man auht i ful wel to be;
2174	For þu art comen of birkabeyn	For þu art comen of Birkabeyn,
2175	Þat hauede mani knith and sweyn	Þat hauẹde mani kniht and sweyn;
2176	And so shalt þou louerd haue	And so shalt þou, louerd, haue,
2177	Þou þu be yet a ful yung knaue	Þouh þu be yet a ful yung knaue.
2178	þou shalt be king of al denemark	þou shalt be king of al Denemark,
2179	Was þer inne neuere non so stark	Was þer-innẹ neuere non so stark.
2180	To morwen shaltu manrede take	To-morwen shaltu manredẹ take
2181	Of þe brune and of þe blake	Of þe brune and of þe blake;
2182	Of alle þat aren in þis tun	Of allẹ þat aren in þis tun,
2183	Boþe of erl and of barun	Boþe of erl, and of barun,
2184	And of dreng and of thayn	And of dreng, and of thayn,
2185	And of knith and of sweyn	And of kniht, and of sweyn.
2186	And so shaltu ben mad knith	And so shaltu ben maked kniht
2187	Wit blisse for þou art so with	With blisse, for þou art so wiht.’

2188	Þo was hauelok swiþe bliþe	Þo was Hauelok swiþe bliþe,
2189	And þankede god ful fele siþe	And þankedẹ God ful fele siþe.
2190	On þe morwen wan it was lith	On þe morwen, hwan it was liht,
2191	And gon was þisternesse of þe nith	And gon was þisternesse of niht,
2192	Vbbe dide up on a stede	Vbbe dide up-on a stede
2193	A ladde lepe and þider bede	A ladde lepe, and þider bede
2194	Erles barouns drenges theynes	Erles, barouns, drenges, theynes,
2195	Klerkes knithes bugeys sweynes	Klerkes, knihtes, burgeys, sweynes,
2196	Þat he sholden comen a non	Þat he sholden comen a-non
2197	Biforen him sone euerilkon	Biforen him sone euerilkon,
2198	Also he louen here liues	Also he louẹden here liues,
2199	And here children and here wiues	And herẹ children and herẹ wiues.

2200	Hise bode ne durste he non at sitte	His bodẹ ne durste he non at-sitte
2201	Þat he ne meme for to wite	Þat he ne neme, for to wite
2202	Sone hwat wolde þe iustise	Sone, hwat wolde þe iustise:
2203	And bigan anon to rise	And he bigan anon to rise,
2204	And seyde sone liþes me	And seyde sone, ‘Liþes me,
2205	Alle samen þeu and fre	Alle samen, þeu and fre.
2206	A þing ich wile you here shauwe	A þing ich wile you herẹ shauwe,
2207	Þat he alle ful wel knawe	Þat ye alle ful wel knawe.
2208	Ye witen wel þat al þis lond	Ye witen wel þat al þis lond
2209	Was in birkabeynes hond	Was in Birkabeynes hond,
2210	Þe day þat he was quic and ded	Þe day þat he was quic and ded;
2211	And how þat he bi youre red	And how þat he, bi youre red,
2212	Bitauhte hise children þre	Bitauhte hise children þre
2213	Godard to yeme and al his fe	Godard to yeme, and al his fe.
2214	Hauelok his sone he him tauhte	Hauelok his sone he him bi-tauhte,
2215	And hise two douhtres and al his auhte	And hisẹ two douhtres, and al his auhte.
2216	Alle herden ye him swere	Alle herden ye him swere
2217	On bok and on messe gere	On boke, and on messe-gere,
2218	Þat he shulde yeme hem wel	Þat he shulde yeme hem wel,
2219	With uten lac with uten tel	With-uten lac, with-uten tel.

2220	He let his oth al ouer go	He let his oth al ouer-go,
2221	Euere wurþe him yuel and wo	Euere wurþe him yuel and wo!
2222	For þe maydnes here lif	Fro þe maydnes here lif
2223	Refte he boþen with a knif	Refte he boþen, with a knif;
2224	And him shulde ok haue slawen	And him shulde ok hauẹ slawen,
2225	Þe knif was at his herte drawen	Þe knif was at his herte drawen;
2226	But god him wolde wel haue saue	But God him wolde wel hauẹ saue,
2227	He hauede reunesse of þe knaue	He hauẹde reunesse of þe knaue,
2228	So þat he with his hend	So þat þo he with his hend
2229	Ne drop him nouth þat sor fend	Ne drop him nouht, þat sori fend!
2230	But sone dide he a fishere	But sone dide he a fishére
2231	Swiþe grete oþes swere	Swiþe grete oþes swere,
2232	Þat he sholde drenchen him	Þat he sholde drenchen him
2233	In þe se þat was ful brim	In þe se, þat was ful brim.

2234	Hwan grim saw þat he was so fayr	Hwan Grim saw þat he was so fayr,
2235	And wiste he was þe Rith eir	And wiste he was þe rihte eir,
2236	Fro denemark ful sone he fledde	Fro Denemark ful sone he fledde
2237	In til englond and þer him fedde	In-til Englond, and þer him fedde
2238	Mani winter þat til þis day	Mani winter, þat til þis day
2239	Haues he ben fed and fostred ay	Hauẹs he ben fed and fostred ay.
2240	Lokes hware he stondes her	Lokes, hware he stondes her:
2241	In al þis werd ne haues he per	In al þis werd ne hauẹs he per;
2242	Non so fayr ne non so long	Is non so fayr, ne non so long,
2243	Ne non so mikel ne non so strong	Ne non so mikel, ne non so strong.
2244	In þis middelerd nis no knith	In þis middelerd nis no kniht
2245	Half so strong ne half so with	Half so strong, ne half so wiht.
2246	Bes of him ful glad and bliþe	Bes of him ful glad and bliþe,
2247	And cometh alle hider swiþe	And cometh alle hider swiþe,
2248	Manrede youre louerd forto make	Manredẹ yourẹ louerd forto make,
2249	Boþe brune and þe blake	Boþe brune and þe blake !
2250	I shal mi self do first þe gamen	I shal mi-self do first þe gamen,
2251	And ye siþen alle samen	And ye siþen alle samen.’

2252	O knes ful fayre he him sette	O knes ful fayre he him sette,
2253	Mouthe noþing him þer fro lette	Mouhtẹ noþing him þer-fro lette,
2254	And bi cam is man Rith þare	And bi-cam his man riht þare,
2255	Þat alle sawen þat þere ware	Þat alle sawen þat þerẹ ware.

2256	After him stirt up laddes ten	After him stirt up laddes ten,
2257	And bi comen hise men	And bi-comen hise men;
2258	And siþen euerilk a baroun	And siþen euerilk a baroun
2259	Þat euere weren in al that toun	Þat euere weren in al that toun;
2260	And siþen drenges and siþen thaynes	And siþen drenges, and siþen thaynes,
2261	And siþen knithes and siþen sweynes	And siþen knihtes, and siþen sweynes;
2262	So þat or þat day was gon	So þat, or þat day was gon,
2263	In al þe tun ne was nouth on	In al þe tun ne was nouht on
2264	Þat it ne was his man bi comen	Þat he ne was his man bi-comen:
2265	Manrede of alle hauede he nomen	Manrede of alle hauẹde he nomen.

2266	Hwan he hauede of hem alle	Hwan he hauẹde of hem alle
2267	Manrede taken in the halle	Manredẹ taken in the halle,
2268	Grundlike dide he hem swere	Grundlike dide he hem swere
2269	Þat he sholden him god feyth bere	Þat he him sholden god feyth bere
2270	Ageynes alle þat woren on liue	Ageynes alle þat worẹn on liue;
2271	Þer yen ne wolde neuer on striue	Þer-yen ne wolde neuer on striue,
2272	Þat he ne maden sone þat oth	Þat he ne maden sonẹ þat oth,
2273	Riche and poure lef and loth	Riche and poure, lef and loth.
2274	Hwan þat was maked sone he sende	Hwan þat was maked, sone he sende,
2275	Vbbe writes fer and hende	Vbbe, writes fer and hende,
2276	After alle þat castel yemede	After allẹ þat castels yemẹde,
2277	Burwes tunes sibbe an fremde	Burwes, tunes, sibbe and fremde,
2278	Þat þider sholden comen swiþe	Þat þider sholden comen swiþe
2279	Til him and heren tiþandes bliþe	Til him, and heren tiþandes bliþe,
2280	Þat he hem alle shulde telle	Þat he hem alle shulde telle:
2281	Of hem ne wolde neuere on dwelle	Of hem ne wolde neuere on dwelle,
2282	Þat he ne come sone plattinde	Þat he ne come sonẹ plattinde,
2283	Hwo hors ne hauede com gangande	Hwo hors ne hauẹde, com gangande.
2284	So þat with inne a fourtenith	So þat with-inne a fourteniht,
2285	In al denemark ne was no knith	In al Denemark ne was no kniht,
2286	Ne conestable ne shireue	Ne conestable, ne shiréue,
2287	Þat com of adam and of eue	Þat com of Adam and of Eue,
2288	Þat he ne com biforn sire ubbe	Þat he ne com biforn sire Ubbe:
2289	He dredden him so þhes doth clubbe	He dredden him so þef doth clubbe.

2290	Hwan he haueden alle þe king gret	Hwan he þe king hauẹden i-gret,
2291	And he weren alle dun set	And he werẹn alle dune set,
2292	Þo seyde ubbe lokes here	Þo seyde Ubbe, ‘Lokes here
2293	Vre louerd swiþe dere	Vre louerd swiþe dere,
2294	Þat shal ben king of al þe lond	Þat shal ben king of al þe lond,
2295	And haue us alle under hond	And haue us alle under hond!
2296	For he is birkabeynes sone	For he is Birkabeynes sone,
2297	Þe king þat was vmbe stonde wone	Þe king þat was vmbẹ stonde wone
2298	For to yeme and wel were	Us for to yemen, and wel were
2299	Wit sharp swerd and longe spere	With sharpe swerd and longe spere.
2300	Lokes nou hw he is fayr	Lokes nou, hu he is fayr;
2301	Sikerlike he is hise eyr	Sikerlike he is hise eyr.
2302	Falles alle to hise fet	Falles alle to hisẹ fet,
2303	Bicomes hise men ful sket	Bicomes hise men ful sket.’
2304	He weren for ubbe swiþe adrad	He werẹn for Ubbe swiþe adrad,
2305	And dide sone al þat he bad	And dide sone al þat he bad,
2306	And yet deden he sumdel more	And yet he deden sumdel more;
2307	O bok ful grundlike he swore	O bok ful grundlike he swore
2308	Þat he sholde with him halde	Þat he sholde with him halde
2309	Boþe ageynes stille and bolde	Boþe ageynes stille and bolde,
2310	Þat euere wode his bodi dere	Þat euere wolde his bodi dere:
2311	Þat dide hem o boke swere	Þat dide he hem o boke swere.

2312	Hwan he hauede manrede and oth	Hwan he hauẹde manrede and oth
2313	Taken of lef and of loth	Taken of lef and ek of loth,
2314	Vbbe dubbede him to knith	Vbbe dubbede him to kniht
2315	With a swerd ful swiþe brith	With a swerd ful swiþe briht;
2316	And þe folk of al þe lond	And þe folk of al þe lond
2317	Bitauhte him al in his hond	Bitauhte him al in his hond,
2318	Þe cunnriche eueril del	Þe cuneriche euerilk del,
2319	And made him king heylike and wel	And made him king heylike and wel.
2320	Hwan he was king þer mouthe men se	Hwan he was king, þer mouhte men se
2321	Þe moste ioie þat mouhte be	Þe moste ioie þat mouhte be:
2322	Buttinge with sharpe speres	Buttinge with þe sharpe speres,
2323	Skirming with talevaces þat men beres	Skirming with talẹvas þat men beres,
2324	Wrastling with laddes putting of ston	Wrastling with laddes, putting of ston,
2325	Harping and piping ful god won	Harping and piping, ful god won,
2326	Leyk of mine of hasard ok	Leyk of mine, of hasard ok,
2327	Romanz reding on þe bok	Romanz-reding on þe bok;
2328	Þer mouthe men here þe gestes singe	Þer mouhtẹ men here þe gestes singe,
2329	Þe glevmen on þe tabour dinge	Þe gleumen on þe tabour dinge;
2330	Þer mouhte men se þe boles beyte	Þer mouhtẹ men se þe boles beyte,
2331	And þe bores with hundes teyte	And þe bores, with hundes teyte;
2332	Þo mouthe men se eueril gleu	Þo mouhte men se euerilk gleu,
2333	Þer mouthe men se hw grim greu	Þer mouhte men se hu Grim greu;
2334	Was neuere yete ioie more	Was neuere yete ioie more
2335	In al þis werd þan þo was þore	In al þis werd, þan þo was þore.
2336	Þer was so mike yeft of cloþes	Þer was so mikel yeft of cloþes,
2337	Þat þou i swore you grete othes	Þat, þouh i swore you grete othes,
2338	I ne wore nouth þer offe croud	I nẹ wore neuere þer-of crod:
2339	Þat may i ful wel swere bi god	Þat may i ful wel swerẹ, bi God!
2340	Þere was swiþe gode metes	Þerẹ was swiþe gode metes,
2341	And of wyn þat men fer fetes	And of wyn, þat men fer fetes,
2342	Rith al so mik and gret plente	Riht al so mikel and gret plenté
2343	So it were water of þe se	So it were water of þe se.
2344	Þe feste fourti dawes sat	Þe feste fourti dawes sat,
2345	So riche was neuere non so þat	So richẹ was neuere non so þat.
2346	Þe king made roberd þere knith	Þe king madẹ Roberd þere a kniht,
2347	Þat was ful strong and ful with	Þat was ful strong and ek ful wiht ;
2348	And willam wendut hec his broþer	And William Wendut ec, his broþer,
2349	And huwe rauen þat was þat oþer	And Huwe Rauen, þat was þat oþer;
2350	And made hem barouns alle þre	And made hem barouns alle þre,
2351	And yaf hem lond and oþer fe	And yaf hem lond, and oþer fe,
2352	So mikel þat ilker twent knihtes	So mikel, þat ilker twenti knihtes
2353	Hauede of genge dayes and nithes	Hauẹde of genge, dayẹs and nihtes.

2354	Hwan þat feste was al don	Hwan þat feste was al don,
2355	A thusand knihtes ful wel o bon	A thusand knihtes wel o bon
2356	With held þe king with him to lede	With-held þe king, with him to lede;
2357	Þat ilkan hauede ful god stede	Þat ilkan hauẹde ful god stede,
2358	Helm and sheld and brinie brith	Helm and sheld and brinie briht,
2359	And al þe wepne þat fel to knith	And al þe wepne þat fel to kniht.
2360	With hem fiue thusand gode	With hem ek fiuẹ thusand gode
2361	Sergaunz þat weren to fyht wode	Sergaunz, þat werẹn to fyhten wode,
2362	With held he al of his genge	With-held he þer, al of his genge:
2363	Wile i namore þe storie lenge	Wile I namore þe storie lenge.
2364	Yet hwan he hauede of al þe lond	Yet hwan he hauẹde of al þe lond
2365	Þe casteles alle in his hond	Þe castelẹs alle in his hond,
2366	And conestables don þer inne	And conestables don þer-inne,
2367	He swor he ne sholde neuer blinne	He swor, he nẹ sholde neuer blinne
2368	Til þat he were of godard wreken	Til þat he were of Godard wreken,
2369	Þat ich haue of ofte speken	Þat ich haue of ofte speken.
2370	Hal hundred knithes dede he calle	Half hundred knihtes dede he calle,
2371	And hise fif thusand sergaunz alle	And hisẹ fif thusand sergaunz alle,
2372	And dide sweren on the bok	And dide hem sweren on the bok
2373	Sone and on þe auter ok	Sone, and on þe auter ok,
2374	Þat he ne sholde neuere blinne	Þat he ne sholde neuere blinne,
2375	Ne for loue ne for sinne	Ne for loue, ne for sinne,
2376	Til þat he haueden godard funde	Til þat he hauẹden Godard funde,
2377	And brouth biforn him faste bunde	And brouht biforn him faste bunde.

2378	Þanne he haueden swor þis oth	Þanne he hauẹden sworn þis oth,
2379	Ne leten he nouth for lef ne loth	Ne letẹn he nouht, for lef ne loth,
2380	Þat he ne foren swiþe rathe	Þat he ne foren swiþe rathe
2381	Þer he was unto þe paþe	Þer he was, unto þe paþe
2382	Þer he yet on hunting for	Þer he yet on hunting for
2383	With mikel genge and swiþe stor	With mikel genge, and swiþe stor.
2384	Robert þat was of al þe ferd	Robert, þat was of al þe ferd
2385	Mayster was girt wit a swerd	Mayster, girt was with a swerd,
2386	And sat up on a ful god stede	And sat up-on a ful god stede,
2387	Þat vnder him Rith wolde wede	Þat vnder him riht wolde wede;
2388	He was þe firste þat with godard	He was þe firste þat with Godard
2389	Spak and seyde hede cauenard	Spak, and seyde, ‘Hedẹ, caynard!
2390	Wat dos þu here at þis paþe	Hwat dost þu here at þis paþe?
2391	Cum to þe king swiþe and raþe	Cum to þe kinge, swiþe and raþe,
2392	Þat sendes he þe word and bedes	Þat sendes þe þis word, and bedes,
2393	Þat þu þenke hwat þu him dedes	Þat þu þenke hwat þu him dedes,
2394	Hwan þu reftes with a knif	Hwan þu reftes with a knif
2395	Hise sistres here lif	Hise sistres here lif,
2396	An siþen bede þu in þe se	And siþen bedẹ þu in þe se
2397	Drenchen him þat herde he	Drenchen him; þat herde he!
2398	He is to þe swiþe grim	He is to þe swiþe grim:
2399	Cum nu swiþe un to him	Cum nu swiþe un-to him
2400	Þat king is of þis kuneriche	Þat king is of þis kunerike,
2401	Þu fule man þu wicke swike	Þu fule man! þu wicke swike!
2402	And he shal yelde þe þi mede	And he shal yelde þe þi mede,
2403	Bi crist þat wolde on rode blede	Bi Crist þat wolde on rode blede!’

2404	Hwan godard herde þat þer þrette	Hwan Godard herde þat he þer þrette,
2405	With þe neue he robert sette	With þe neue he Robert sette
2406	Biforn þe teth a dint ful strong	Biforn þe teth a dint ful strong.
2407	And robert kipt ut a knif long	And Robert kipt ut a knif long,
2408	And smot him þoru þe rith arum	And smot him þoru þe rihte arum:
2409	Þer of was ful litel harum	Þer-of was him ful litel harum.

2410	Hwan his folk þat sau and herde	Hwan his folk þat sau and herde,
2411	Hwou robert with here louerd ferde	Hou Robert with herẹ louerd ferde,
2412	He haueden him wel ner browt of liue	He hauẹden him wel ner browht of liue,
2413	Ne weren his two breþren and oþre fiue	Ne weren his breþren and oþre fiue,
2414	Slowen of here laddes ten	Þat slowen of herẹ laddes ten,
2415	Of godardes alþer beste men	Of Godardẹs alþer-beste men.
2416	Hwan þe oþre sawen þat he fledden	Hwan þe oþre sawen þat, he fledden,
2417	And godard swiþe loude gredde	And Godard swiþe loude gredde:
2418	Mine knithes hwat do ye	‘Mine knihtes, hwat do ye?
2419	Sule ye þus gate fro me fle	Shulẹ ye þus-gate fro me fle?
2420	Ich haue you fed and yet shal fede	Ich haue you fed, and yet shal fede,
2421	Helpe me nu in þis nede	Helpeþ me nu in þis nede,
2422	And late ye nouth mi bodi spille	And latẹ ye nouht mi bodi spille,
2423	Ne hauelok don of me hise wille	Ne Hauelok don of me hisẹ wille.
2424	Yif ye id do ye do you shame	Yif ye it do, ye do you shame,
2425	And bringeth you self in mikel blame	And bringẹth you-self in mikel blame.’
2426	Hwan he þat herden he wenten a geyn	Hwan he þat herden, he wenten a-geyn,
2427	And slowen a knit and a sweyn	And slowen a kniht and ek a sweyn
2428	Of þe kinges oune men	Of þe kinges oune men,
2429	And woundeden abuten ten	And woundeden abuten ten.

2430	Þe kinges men hwan he þat sawe	Þe kinges men, hwan he þat sawe,
2431	Scuten on hem heye and lowe	Schuten on hem, heye and lowe,
2432	And euerilk fot of hem slowe	And euerilk fot of hem he slowe
2433	But godard one þat he flowe	But Godard one, þat he flowe,
2434	So þe þef men dos henge	So þe þef þat men dos henge,
2435	Or hund men shole in dike slenge	Or hund men shole in dike slenge.
2436	He bunden him ful swiþe faste	He bunden him ful swiþe faste,
2437	Hwil þe bondes wolden laste	Hwil þe bondes wolden laste,
2438	Þat he rorede als a bole	Þat he rorede als a bole,
2439	Þat he wore parred in an hole	Þat wore parred in an hole
2440	With dogges forto bite and beite	With dogges forto bite and beite:
2441	Were þe bondes nouth to leite	Werẹ þe bondes nouht to leite.
2442	He bounden him fo fele sore	He bounden him so fele sore,
2443	Þat he gan crien godes ore	Þat he gan crien Godes ore,
2444	Þat he sholde of his hend plette	Þat he ne sholde his hend of-plette;
2445	Wolden he nouht þer fore lette	Wolden he nouht þer-fore lette,
2446	Þat he ne bounden hond and fet	Þat he ne bounden hond and fet:
2447	Daþeit þat on þat þer fore let	Daþeit þat on þat þer-forẹ let!
2448	But dunten him so man doth bere	But dunten him so man doth bere,
2449	And keste him on a scabbed mere	And keste him on a scabbed mere,
2450	Hise nese went un to þe crice	Hisẹ nese went un-to þe crice:
2451	So ledden he þat fule swike	So ledden he þat fule swike,
2452	Til he was biforn hauelok brouth	Til he biforn Hauelok was brouht,
2453	Þat he haue ful wo wrowht	Þat he hauẹde ful wo wrowht,
2454	Boþe with hungred and with cold	Boþe with hungre and with cold,
2455	Or he were twel winter old	Or he werẹ twelue winter old,
2456	And with mani heui swink	And with mani heui swink,
2457	With poure mete and feble drink	With poure mete and feble drink,
2458	And swiþe wikke cloþes	And with swiþe wikke cloþes,
2459	For al hise manie grete othes	For al hisẹ manie grete othes.
2460	Nu beyes he his holde blame	Nu beyes he his olde blame:
2461	Old sinne makes newe shame	‘Old sinne makes newe shame:’
2462	Wan he was so shamelike	Hwan he was brouht so shamelike
2463	Brouht biforn þe king þe fule swike	Biforn þe king, þe fule swike,
2464	Þe king dede ubbe swiþe calle	Þe king dede Ubbe swiþe calle
2465	Hise erles and hise barouns alle	Hise erles, and hisẹ barouns alle,
2466	Dreng and thein burgeis and knith	Dreng and thein, burgeis and kniht,
2467	And bad he sholden demen him rith	And bad he sholden demen him riht:
2468	For he kneu þe swike dam	For he kneu þe swike dam;
2469	Euerildel god was him gram	Euerilk del, God was him gram.
2470	He setten hem dun bi þe wawe	He setten hem dune bi þe wawe,
2471	Riche and pouere heye and lowe	Riche and pouere, heye and lowe,
2472	Þe helde men and ek þe grom	Þe olde men, and ek þe grom,
2473	And made þer þe rithe dom	And made þer þe rihte dom,
2474	And seyden unto þe king anon	And seyden unto þe king anon,
2475	Þat stille sat so þe ston	Þat stille sat al-so þe ston:
2476	We deme þat he be al quic slawen	‘We demẹ, þat he be al quic flawen,
2477	And siþen to þe galwes drawe	And siþen to þe galwes drawen
2478	At þis foule mere tayl	At þis foule mere tayl;
2479	Þoru is fet a ful strong nayl	Þoru his fet a ful strong nayl;
2480	And þore ben henged wit two feteres	And þorẹ ben henged with two feteres,
2481	And þare be writen þise leteres	And þarẹ be writen þise leteres:
2482	Þis is þe swike þat wende wel	‘Þis is þe swike þat wende wel
2483	Þe king haue reft þe lond il del	Þe king hauẹ reft þe lond ilk del,
2484	And hise sistres with a knif	And hise sistres with a knif
2485	Boþe refte here lif	Boþe refte here lif.’
2486	Þis writ shal henge bi him þare	Þis writ shal henge bi him þore;
2487	Þe dom is demd seye we na more	Þe dom is demd, seyẹ we na more.’

2488	Hwan þe dom was demd and giue	Hwan þe dom was demd and giue,
2489	And he was wit þe prestes shriue	And he was with þe prestes shriue,
2490	And it ne mouhte ben non oþer	And it ne mouhte ben non oþer,
2491	Ne for fader ne for broþer	Ne for fader ne for broþer,
2492	þat he sholde þarne lif	But þat he sholde þarne lif;
2493	Sket cam a ladde with a knif	Sket cam a ladde with a knif,
2494	And bigan Rith at þe to	And bigan riht at þe to
2495	For to ritte and for to flo	For to ritte, and for to flo
2496	So it were grim or gore	So it were grim or gore
2497	And he bigan for to rore	And he bigan þo for to rore,
2498	Þat men mithe þeþen a mile	Þat men mihte þeþen a mile
2499	Here him rore þat fule file	Here him rore, þat fule file.
2500	Þe ladde ne let no with for þi	Þe ladde ne let no wiht for-þi,
2501	Þey he criede merci merci	Þey he criẹdẹ ‘merci! merci!’
2502	Þat ne flow eueril del	Þat he ne flow him euerilk del
2503	With knif mad of grunden stel	With kniue mad of grunden stel.
2504	Þei garte bringe þe mere sone	Þei garte bringe þe mere sone,
2505	Skabbeb and ful iuele o bone	Skabbed, and ful iuele o bone,
2506	And bunden him rith at hire tayl	And bunden him riht at hirẹ tayl
2507	With a rop of an old seyl	With a rop of an old seyl,
2508	And drowen him un to þe galwes	And drowen him un-to þe galwes,
2509	Nouth bi þe gate But ouer þe falwes	Nouth bi þe gate, but ouer þe falwes;
2510	And henge þore Bi þe hals	And henge him þore bi þe hals:
2511	Daþeit hwo recke he was fals	Daþeit hwo recke! he was fals.

2512	Þanne he was ded þat sathanas	Þanne he was ded, þat Sathanas
2513	Sket was seysed al þat his was	Sket was seysed al þat his was
2514	In þe kinges hand il del	In þe kinges hand ilk del,
2515	Lond and lith and oþer catel	Lond and lith, and oþer catel,
2516	And þe king ful sone it yaf	And þe king ful sone it yaf
2517	Vbbe in þe hond wit a fayr staf	Vbbe in þe hond, with a fayr staf,
2518	And seyde her ich sayse þe	And seyde, ‘Her ich sayse þe
2519	In al þe lond in al þe fe	In al þe lond, in al þe fe.’
2520	Þo swor hauelok he sholde make	Þo swor Hauelok he sholde make,
2521	Al for grim of monekes blake	Al for Grim, of monẹkes blake
2522	A priorie to seruen inne ay	A priorie to seruen in ay
2523	Iesu crist til domesday	Iesu Crist, til domesday,
2524	For þe god he haueden him don	For þe god he hauẹde him don
2525	Hwil he was pouere and we o bon	Hwil he was pouere and iuel o bon.
2526	And þer of held he wel his oth	And þer-of held he wel his oth,
2527	For he it made god it woth	For he it made, God it wot!
2528	In þe tun þer grim was grauen	In þe tun þer Grim was grauen,
2529	Þat of grim yet haues þe name	Þat of Grim yet hauẹs þe name.
2530	Of grim bidde ich na more spelle	Of Grim bidde ich na more spelle. -
2531	But wan godrich herde telle	But hwan Godrich herde telle,
2532	Of cornwayle þat was erl	Of Cornwayle þat was erl,
2533	Þat fule traytour that mixed cherl	(Þat fule traytóur, that mixed cherl!)
2534	Þat hauelok was king of denemark	Þat Hauelok king was of Denemark,
2535	And ferde with him strong and stark	And with a ferde strong and stark
2536	Comen engelond with inne	Was comen Engelond with-inne,
2537	Engelond al for to winne	Engelond al for to winne;
2538	And þat she þat was so fayr	And þat she, þat was so fayr,
2539	Þat was of engelond rith eir	Þat was of Engelond riht eir,
2540	Þat was comen up at grimesbi	Was comen up at Grimesbi,
2541	He was ful sorful and sori	He was ful sorwful and sori,
2542	And seyde hwat shal me to raþe	And seyde, ‘Hwat shal me to raþe?
2543	Goddoth i shal do slon hem baþe	Goddot! i shal do slon hem baþe.
2544	I shal don hengen hem ful heye	I shal don hengen hem ful heye,
2545	So mote ich brouke mi Rith eie	So mote ich brouke mi rihte eie!
2546	But yif he of mi lond fle	But-yif he of mi londe fle;
2547	Hwat wenden he to desherite me	Hwat wenden he desheritẹ me?’
2548	He dide sone ferd ut bidde	He dide sone ferd ut bede,
2549	Þat al þat euere mouhte o stede	Þat al þat euere mouhte o stede
2550	Ride or helm on heued bere	Ride, or helm on heued bere,
2551	Brini on bac and sheld and spere	Brini on bac, and sheld and spere,
2552	Or ani oþer wepne bere	Or ani oþer wepne bere,
2553	Hand ax syþe gisarm or spere	Hand-ax, syþe, gisarm, or spere,
2554	Or aunlaz and god long knif	Or aunlaz, and ful god long knif,
2555	Þat als he louede leme or lif	Þat, als he louẹde leme or lif,
2556	Þat Þey sholden comen him to	Þey sholden comen alle him to —
2557	With ful god wepne ye ber so	With ful god wepne y-boren so —
2558	To lincolne þer he lay	To Lincólne, þer he lay,
2559	Of marz þe seuentenþe day	Of Marz þe seuentenþe day,
2560	So þat he couþe hem god þank	So þat he couþe hem god þank;
2561	And yif þat ani were so rang	And yif þat ani were so rank
2562	That he þanne ne come anon	That he þanne ne come anon,
2563	He swor bi crist and seint iohan	He swor bi Crist, and bi seint Iohan,
2564	That he sholde maken him þral	That he sholde maken him þral,
2565	And al his of spring forth with al	And al his of-spring forth with-al.

2566	Þe englishe þat herde þat	Þe Englishe men þat herde þat,
2567	Was non þat euere his bode sat	Was non þat euere his bode at-sat;
2568	For he him dredde swiþe sore	For he him dredde swiþe sore,
2569	So Runci spore and mikle more	So runci spore, and mikle more.
2570	At þe day he come sone	At þe day he come sone
2571	Þat he hem sette ful wel o bone	Þat he hem sette, ful wel o bone,
2572	To lincolne with gode stedes	To Lincólne, with gode stedes,
2573	And al þe wepne þat knith ledes	And al þe wepne þat kniht ledes.
2574	Hwan he wore come sket was þe erl yare	Hwan he worẹ come, sket was þe erl yare
2575	Ageynes denshe men to fare	Ageynes Denshe men to fare,
2576	And seyde lyþes mi alle samen	And seyde, ‘Lyþes me allẹ samen,
2577	Haue ich gadred you for no gamen	Haue ich you gadred for no gamen,
2578	But ich wile seyen you forþi	But ich wilẹ seyen you forhwi;
2579	Lokes hware here at grimesbi	Lokes hware here at Grimesbi
2580	Hise uten laddes here comen	Is uten-laddes here comen,
2581	And haues nu þe priorie numen	And haues þe priorie numen;
2582	Al þat euere mithen he finde	Al þat euere mihten he finde,
2583	He brenne kirkes and prestes binde	He brenne kirkes, and prestes binde;
2584	He strangleth monkes and nunnes boþe	He strangleth monkes and nunnes boþe
2585	Wat wile ye frend her offe Rede	Hwat wilẹ ye, frendes, her-of rede?
2586	Yif he regne þus gate longe	Yif he regne þus-gate longe,
2587	He Moun us alle ouer gange	He moun us alle ouer-gange,
2588	He moun vs alle quic henge or slo	He moun vs alle quic henge or slo,
2589	Or þral maken and do ful wo	Or þral maken and do ful wo,
2590	Or elles reue us ure liues	Or elles reue us ure liues,
2591	And ure children and ure wiues	And ure children, and ure wiues.
2592	But dos nu als ich wile you lere	But dos nu als ich wilẹ you lere,
2593	Als ye wile be with me dere	Als ye wilẹ be with me dere;
2594	Nimes nu swiþe forth and raþe	Nimes nu swiþe forth and raþe,
2595	And helpes me and yu self baþe	And helpes me and yu-self baþe,
2596	And slos up o þe dogges swiþe	And slos up-on þe dogges swiþe:
2597	For shal neuere more be bliþe	For shal i neuere more be bliþe,
2598	Ne hoseled ben ne of prest shriuen	Ne hosẹled ben, ne of prest shriuen,
2599	Til þat he ben of londe driuen	Til þat he ben of londe driuen.
2600	Nime we swiþe and do hem fle	Nime we swiþe, and do hem fle,
2601	And folwes alle faste me	And folwes alle faste me;
2602	For ich am he of al þe ferd	For ich am he, of al þe ferd,
2603	Þat first shal slo with drawen swerd	Þat first shal slo with drawen swerd.
2604	Daþeyt hwo ne stonde faste	Daþeyt hwo ne stonde faste
2605	Bi me hwil hise armes laste	Bi me, hwil hise armes laste!’
2606	Ye lef ye couth þe erl gunter	‘Ye! lef, ye!’ quoth þe erl Guntér;
2607	Ya quoth þe erl of cestre reyner	‘Ya!’ quoth þe erl of Cestre, Reynér.
2608	And so dide alle þat þer stode	And so dide alle þat þer stode,
2609	And stirte forth so he were wode	And stirte forth so he werẹ wode.
2610	Þo mouthe men se þe brinies brihte	Þo mouhtẹ men se þe brinies brihte
2611	On backes keste and late rithe	On backes keste, and late rihte,
2612	Þe helmes heye on heued sette	Þe helmes heye on heued sette;
2613	To armes al so swiþe plette	To armes al so swiþe plette,
2614	Þat þei wore on a litel stunde	Þat þei wore on a litel stunde
2615	Grethet als men mithe telle a pund	Greithed, als men mihtẹ telle a pund;
2616	And lopen on stedes sone anon	And lopen on stedes sone anon,
2617	And toward grimesbi ful god won	And toward Grimẹsbi, ful god won,
2618	He foren softe bi þe sti	He foren softe bi þe sti,
2619	Til he come ney at grimesbi	Til he comẹ ney at Grimesbi.

2620	Hauelok þat hauede spired wel	Hauelok, þat hauẹde spired wel
2621	Of here fare eueril del	Of here fare, euerilk del,
2622	With al his ferd cam hem a geyn	With al his ferd cam hem a-geyn,
2623	For bar he noþer knith ne sweyn	For-bar he noþer kniht ne sweyn.
2624	Þe firste knith þat he þer mette	Þe firste kniht þat he þer mette
2625	With þe swerd so he him grette	With þe swerd so he him grette,
2626	For his heued of he plette	Þat his heued of he plette,
2627	Wolde he nouth for sinne lette	Wolde he nouht for sinne lette.
2628	Roberd saw þat dint so hende	Roberd saw þat dint so hende,
2629	Wolde he neuere þeþe wende	Wolde he neuere þeþen wende,
2630	Til þat he hauede anoþer slawen	Til þat he hauẹde anoþer slawen
2631	With þe swerd he held ut drawen	With þe swerd he held ut-drawen.
2632	Willam wendut his swerd vt drow	William Wendut his swerd vt-drow,
2633	And þe þredde so sore he slow	And þe þredde so sore he slow,
2634	Þat he made up on the feld	Þat he made up-on the feld
2635	His lift arm fleye with the swerd	His lift arm fleye, with the swerd.

2636	Huwe rauen ne forgat nouth	Huwe Rauen ne forgat nouht
2637	Þe swerd he hauede þider brouth	Þe swerd he hauẹde þider brouht;
2638	He kipte it up and smot ful sore	He kipte it up, and smot ful sore
2639	An erl þat he saw priken þore	An erl, þat he saw priken þore
2640	Ful noblelike upon a stede	Ful noblelike upon a stede,
2641	Þat with him wolde al quic wede	Þat with him wolde al quic wede.
2642	He smot him on þe heued so	He smot him on þe heued so,
2643	Þat he þe heued clef a two	Þat he þe heued clef a-two,
2644	And þat bi þe shudre blade	And þat he bi þe shuldre-blade
2645	Þe sharpe swerd let wade	Þe sharpe swerd let dune wade
2646	Þorw the brest unto þe herte	Þorw the brest unto þe herte;
2647	Þe dint bigan ful sore to smerte	Þe dint bigan ful sorẹ to smerte,
2648	Þat þe erl fel dun a non	Þat þe erl fel dun a-non,
2649	Al so ded so ani ston	Al so ded so ani ston.
2650	Quoth ubbe nu dwelle ich to longe	Quoth Ubbe, ‘Nu dwelle ich to longe,’
2651	And leth his stede sone gonge	And let his stede sone gonge
2652	To godrich with a god spere	To Godrich, with a ful god spere
2653	Þat he saw a noþer bere	Þat he saw a-noþer bere,
2654	And smoth godrich and g him	And smot Godrich, and Godrich him,
2655	Hetelike with herte grim	Hetelike with herte grim,
2656	So þat he boþe felle dune	So þat he boþe felle dune,
2657	To þe erþe first þe croune	To þe erþe, first þe croune.
2658	Þanne he woren fallen dun boþen	Þanne he worẹn fallen dune boþen,
2659	Grundlike here swerdes ut drowen	Grundlike herẹ swerdes he ut-drowen,
2660	Þat weren swiþe sharp and gode	Þat weren swiþe sharp and gode,
2661	And fouhten so þei woren wode	And fouhten so þei woren wode,
2662	Þat þe swot ran fro þe crune	Þat þe swot ran fro þe crune
2663		To the fet riht þere adune.
2664	Þer mouthe men se to knithes bete	Þer mouhtẹ men se two knihtes bete
2665	Ayþer on oþer dintes grete	Ayþer on oþer dintes grete,
2666	So þat with alþer lest dint	So þat with þe alþer-leste dint
2667	Were al to shiuered a flint	Were al to-shiuered a flint.
2668	So was bi twenen hem a fiht	So was bi-twenen hem a fiht
2669	Fro þe morwen ner to þe niht	Fro þe morwen ner to þe niht,
2670	So þat þei nouth ne blinne	So þat þei stinted nouht ne blunne,
2671	Til þat to sette bigan þe sunne	Til þat to sette bigan þe sunne.
2672	Þo yaf godrich þorw þe side	Þo yaf Godrich þorw þe side
2673	Vbbe a wunde ful un ride	Vbbe a wunde ful un-ride,
2674	So þat þorw þat ilke wounde	So þat þorw þat ilke wounde
2675	Hauede ben brouth to þe grunde	Hauẹde he ben brouht to grunde,
2676	And his heued al of slawen	And his heued al of-slawen,
2677	Yif god ne were and huwe rauen	Yif God ne were, and Huwe Rauen,
2678	Þat drow him fro godrich awey	Þat drow him fro Godrich awey,
2679	And barw him so þat ilke day	And barw him so þat ilke day.
2680	But er he were fro godrich drawen	But er he were fro Godrich drawen,
2681	Þer were a þousind knihtes slawen	Þer were a þousind knihtes slawen
2682	Bi boþe halue and mo y nowe	Bi boþe halue, and mo y-nowe,
2683	Þer þe ferdes to gidere slowe	Þer þe ferdes to-gidẹre slowe.
2684	Þer was swilk dreping of þe folk	Þer was swilk dreping of þe folk,
2685	Þat on þe feld was neuere a polk	Þat on þe feld was neuere a polk
2686	Þat it ne stod of blod so ful	Þat it ne stod of blod so ful
2687	Þat þe strem ran intil þe hul	Þat þe strem ran intil þe hul.
2688	Þo tarst bigan godrich to go	Þo tarst bigan Godrich to go
2689	Vp on þe danshe and faste to slo	Vp-on þe Danshe, and faste to slo,
2690	And forth rith also leuin fares	And forth-riht, also leun fares
2691	Þat neuere kines best ne spares	Þat neuere kines best ne spares,
2692	Þanne his gon for he garte alle	Þanne is he gon, for he garte alle
2693	Þe denshe men biforn him falle	Þe Denshe men biforn him falle.
2694	He felde browne he felde blake	He felde browne, he felde blake,
2695	Þat he mouthe ouer take	Þat he mouhte ouer-take.
2696	Was neuere non þat mouhte þaue	Was neuere non þat mouhte þaue
2697	Hise dintes noyþer knith ne knaue	Hisẹ dintes, noyþer kniht ne knaue,
2698	Þat he felden so dos þe gres	Þat he ne felden so dos þe gres
2699	Bi forn þe syþe þat ful sharp is	Bi-forn þe syþe þat ful sharp is.
2700	Hwan hauelok saw his folk so brittene	Hwan Hauelok saw his folk so brittenẹ,
2701	And his ferd so swiþe littene	And his ferd so swiþe littenẹ,
2702	He cam driuende up on a stede	He cam driuende up-on a stede,
2703	And bigan til him to grede	And bigan til him to grede,
2704	And seyde godrich wat is þe	And seyde, ‘Godrich, hwat is þe
2705	Þat þou fare þus with me	Þat þou fare þus with me,
2706	And mine gode knihtes slos	And mine gode knihtes slos?
2707	Siker like þou mis gos	Siker-like þou mis-gos.
2708	Þou wost ful wel yif þu wilt wite	Þou wost ful wel, yif þu wilt wite,
2709	Þat aþelwold þe dide site	Þat Aþelwold þe dide sitte
2710	On knes and sweren on messe bok	On knes, and sweren on messe-bok,
2711	On caliz and on messe hok	On caliz, and on pateyn ok,
2712	Þat þou hise douhter sholdest yelde	Þat þou hisẹ douhter sholdest yelde,
2713	Þan she were wimman of elde	Þan she were wimman of elde,
2714	Engelond eueril del	Engelond al euerilk del:
2715	Godrich þe erl þou wost it wel	Godrich þe erl, þou wost it wel.
2716	Do nu wel with uten fiht	Do nu wel with-uten fiht,
2717	Yeld hire þe lond for þat is rith	Yeld hirẹ þe lond, for þat is riht.
2718	Wile ich forgiue þe þe lathe	Wile ich forgiue þe þe lathe,
2719	Al mi dede and al mi wrathe	Al mi dede and al mi wrathe,
2720	For y se þu art so with	For y se þu art so wiht,
2721	And of þi bodi so god knith	And of þi bodi so god kniht.’
2722	þat ne wile ich neuere mo	‘þat ne wile ich neuere mo,’
2723	Quoth erl godrich for ich shal slo	Quoth erl Godrich, for ich shal slo
2724	Þe and hire for henge heye	Þe, and hire for-henge heye.
2725	I shal þrist ut þi rith eye	I shal þrist ut þi rihte eye
2726	Þat þou lokes with on me	Þat þou lokes with on me,
2727	But þu swiþe heþen fle	But þu swiþe heþen fle.’
2728	He grop þe swerd ut sone anon	He grop þe swerd ut sone anon,
2729	And hew on hauelok ful god won	And hew on Hauelok, ful god won,
2730	So þat he clef his sheld on two	So þat he clef his sheld on-two:
2731	Hwan hauelok saw þat shame do	Hwan Hauelok saw þat shame do
2732	His bodi þer bi forn his ferd	His bodi, þer bi-forn his ferd,
2733	He drow ut sone his gode swerd	He drow ut sone his gode swerd,
2734	And smot him so up on þe crune	And smot him so up-on þe crune,
2735	Þat godrich fel to þe erþe adune	Þat Godrich fel to þe erþe adune.
2736	But godrich stirt up swiþe sket	But Godrich stirt up swiþe sket
2737	Lay he nowth longe at hise fet	Lay he nowht longe at hisẹ fet
2738	And smot him on þe sholdre so	And smot him on þe sholdre so,
2739	Þat he dide þare undo	Þat he dide þare undo
2740	Of his brinie ringes mo	Of his brinie ringes mo
2741	Þan þat ich kan tellen fro	Þan þat ich kan tellen, fro;
2742	And woundede him rith in þe flesh	And woundede him riht in þe flesh,
2743	Þat tendre was and swiþe nesh	Þat tendre was and swiþe nesh,
2744	So þat þe blod ran til his to	So þat þe blod ran til his to:
2745	Þo was hauelok swiþe wo	Þo was Hauelok swiþe wo,
2746	Þat he hauede of him drawen	Þat he hauẹde of him drawen
2747	Blod and so sore him slawen	Blod, and ek so sore him slawen.
2748	Hertelike til him he wente	Hertelike til him he wente,
2749	And godrich þer fulike shente	And Godrich þer fullike shente;
2750	For his swerd he hof up heye	For his swerd he hof up heye,
2751	And þe hand he dide of fleye	And þe hand he dide of-fleye,
2752	Þat he smot him with so sore	Þat he smot him with so sore:
2753	Hw mithe he don him shame more	Hu mihte he don him shame more?

2754	Hwan he hauede him so shamed	Hwan he hauẹde him so shamed,
2755	His hand of plat and yuele lamed	His hand of-plat, and yuelẹ lamed,
2756	He tok him sone bi þe necke	He tok him sone bi þe necke
2757	Als a traytour daþeyt wo recke	Als a traytóur, daþeyt hwo recke!
2758	And dide him binde and fetere wel	And dide him binde and fetere wel
2759	With gode feteres al of stel	With gode feteres al of stel;
2760	And to þe quen he sende him	And to þe quen he sende him,
2761	Þat birde wel to him ben grim	Þat birde wel to him ben grim;
2762	And bad she sholde don him gete	And bad she sholde don him gete,
2763	And þat non ne sholde him bete	And þat non ne sholde him bete,
2764	Ne shame do for he was knith	Ne shame do, for he was kniht,
2765	Til knithes haueden demd him Rith	Til knihtes hauẹden demd him riht.
2766	Þan þe englishe men þat sawe	Þan þe Englishẹ men þat sawe,
2767	Þat þei wisten heye and lawe	Þat þei wisten, heye and lawe,
2768	Þat goldeboru þat was so fayr	Þat Goldeboru, þat was so fayr,
2769	Was of engeland rith eyr	Was of Engeland riht eyr,
2770	And þat þe king hire hauede wedded	And þat þe king hire hauẹde wedded,
2771	And haueden ben samen bedded	And hauẹden he ben samen bedded,
2772	He comen alle to crie merci	He comen alle, to criẹ merci,
2773	Vnto þe king at one cri	Vnto þe king, at one cri,
2774	And beden him sone manrede and oth	And beden him sone manrede and oth,
2775	Þat he ne sholden for lef ne loth	Þat he ne sholden, for lef ne loth,
2776	Neuere more ageyn him go	Neuere more ageyn him go,
2777	Ne ride for wel ne for wo	Ne ridẹ, for wele ne for wo.

2778	Þe king ne wolde nouth for sake	Þe king ne wolde nouht for-sake,
2779	Þat he ne shulde of hem take	Þat he ne shulde of hem take
2780	Manrede þat he beden and ok	Manredẹ þat he beden, and ok
2781	Hold oþes sweren on þe bok	Hold oþes sweren on þe bok;
2782	But or bad he þat þider were brouth	But or bad he, þat þider werẹ brouht
2783	Þe quen for hem swilk was his þouth	Þe quen, for hem - swilk was his þouht -
2784	For to se and forto shawe	For to se, and forto shawe,
2785	Yif þat he hire wolde knawe	Yif þat he hirẹ wolde knawe.
2786	Þoruth hem witen wolde he	Þoru hem witen wolde he
2787	Yif þat she aucte quen to be	Yif þat she auhte quen to be.

2788	Sixe erles weren sone yare	Sixe erles weren sone yare,
2789	After hire for to fare	After hire for to fare.
2790	He nomen on on and comen sone	He nomen on-on, and comen sone,
2791	And brouthen hire þat under mone	And brouhten hire, þat under mone
2792	In al þe werd ne hauede per	In al þe werd ne hauẹde per
2793	Of hendeleik fer ne ner	Of hendeleike, fer ne ner.
2794	Hwan she was come þider alle	Hwan she was come þider, alle
2795	Þe englishe men bi gunne to falle	Þe Englishẹ men bi-gunne falle
2796	O knes and greten swiþe sore	O knes, and greten swiþe sore,
2797	And seyden leuedi kistes ore	And seyden, ‘Leuẹdi, Kristes ore
2798	And youres we hauen misdo mikel	And youres! we hauen misdo mikel,
2799	Þat we ayen you haue be fikel	Þat we ayeyn you hauẹ be fikel,
2800	For englond auhte forto ben youres	For Englond auhte forto ben
2801	And we youre men and youres	Youres, and we youre men .
2802	Is non of us yung ne old	Is non of us, ne yung ne old,
2803	Þat we ne wot þat aþelwold	Þat he ne wot, þat Aþelwold
2804	Was king of þis kunerike	Was king of al þis kunerike,
2805	And ye his eyr and þat þe swike	And ye his eyr, and þat þe swike
2806	Haues it halden with mikel wronge	Hauẹs it halden with mikel wronge:
2807	God leue him sone to honge	God leue him sone hey to honge!’

2808	Quot hauelok hwan þat ye it wite	Quoth Hauelok, ‘Hwan þat ye it wite,
2809	Nu wile ich þat ye doun site	Nu wile ich þat ye doune sitte,
2810	And after godrich haues wrouht	And, after Godrich haues wrouht,
2811	Þat haues in sorwe him self brouth	Þat hauẹs him-self in sorwe brouht,
2812	Lokes þat ye demen him rith	Lokes þat ye demen him riht,
2813	For dom ne spared clerk ne knith	For dom ne spareth clerk ne kniht;
2814	And siþen shal ich under stonde	And siþen shal ich under-stonde
2815	Of you after lawe of londe	Of you, al after lawe of londe,
2816	Manrede and holde oþes boþe	Manrede, and holde oþes boþe,
2817	Yif ye it wilen and ek rothe	Yif ye it wilen, and ek rothe.’
2818	Anon þer dune he hem sette	Anon þer dune he hem sette,
2819	For non þe dom ne durste lette	For non þe dom ne durste lette,
2820	And demden him to binden faste	And demden, him to binden faste
2821	Vp on an asse swiþe un wraste	Vp-on an asse swiþe un-wraste,
2822	Andelong nouht ouer þwert	Andelong, nouht ouer-þwert,
2823	His nose went unto þe stert	His nose went unto þe stert,
2824	And so to lincolne lede	And so un-to Lincólne lede,
2825	Shamelike in wicke wede	Shamelike in wicke wede -
2826	And hwan he cam un to þe borw	And hwan he come un-to þe borw,
2827	Shamelike ben led þer þoru	Shamelike ben led þer-þoru,
2828	Bisouþe þe borw un to a grene	Bisouþe þe borw, un-to a grene -
2829	Þat þare is yet als y wene	Þat þare is yete, als y wene -
2830	And þere be bunden til a stake	And þerẹ be bunden til a stake,
2831	Abouten him ful gret fir make	Abouten him ful gret fir make,
2832	And al to dust be brend Rith þere	And al to dust be brend riht þore: -
2833	And yet demden he þer more	And yete demden he þer more,
2834	Oþer swikes for to warne	Oþer swikes for to warne,
2835	Þat hise children sulde þarne	Þat hise children shulde þarne
2836	Euere more þat eritage	Euere-more þat eritage,
2837	Þat his was for hise utrage	Þat his was, for hise utrage.

2838	Hwan þe dom was demd and seyd	Hwan þe dom was demd and seyd,
2839	Sket was þe swike on þe asse leyd	Sket was þe swike on þe asse leyd,
2840	And him til þat ilke grene	And led un-til þat ilke grene,
2841	And brend til asken al bidene	And brend til asken al bidene.
2842	Þo was goldeboru ful bliþe	Þo was Goldeboru ful bliþe,
2843	She þanked god fele syþe	She þanked God ful fele syþe
2844	Þat þe fule swike was brend	Þat þe fule swike was brend,
2845	Þat wende wel hire bodi haue shend	Þat wende wel hirẹ bodi hauẹ shend;
2846	And seyde nu is time to take	And seyde, ‘Nu is timẹ to take
2847	Manrede of brune and of blake	Manrede of brune and of blake,
2848	Þat ich se ride and go	Þat ich ride se and go:
2849	Nu ich am wreke of mi fo	Nu ich am wreken of mi fo.’

2850	Hauelok anon manrede tok	Hauelok anon manrede tok
2851	Of alle englishe on þe bok	Of alle Englishe, on þe bok,
2852	And dide hem grete oþes swere	And dide hem grete oþes swere,
2853	Þat he sholden him god feyth bere	Þat he sholden him god feyth bere
2854	Ageyn alle þat woren liues	Ageyn hem alle þat woren liues,
2855	And þat sholde ben born of wiues	And þat sholde ben born of wiues.

2856	Þanne he haueden sikernesse	Þanne he hauẹde sikernesse
2857	Taken of more and of lesse	Taken of more and of lesse,
2858	Al at hise wille so dide he calle	Al at hisẹ wille, so dide he calle
2859	Þe erl of cestre and hise men alle	Þe erl of Cestre, and hisẹ men alle,
2860	Þat was yung knith wit uten wif	Þat was yung kniht with-uten wif,
2861	And seyde sire erl bi mi lif	And seyde, ‘Sire erl, bi mi lif,
2862	And þou wile mi conseyl tro	And þou wile mi conseyl tro,
2863	Ful wel shal ich with þe do	Ful wel shal ich with þe do;
2864	For ich shal yeue þe to wiue	For ich shal yeue þe to wiue
2865	Þe fairest þing that is oliue	Þe fairest þing that is oliue.
2866	Þat is gunnild of grimesby	Þat is Gunnild of Grimesby,
2867	Grimes douther bi seint dauy	Grimes douhter, bi seint Dauy,
2868	Þat me forth broute and wel fedde	Þat me forth brouhte, and wel fedde,
2869	And ut of denemark with me fledde	And ut of Denemark with me fledde,
2870	Me for to burwe fro mi ded	Me for to berwen fro mi ded:
2871	Sikerlike þoru his red	Sikerlike, þoru his red
2872	Haue ich liued in to þis day	Haue ich liued in-to þis day,
2873	Blissed worþe his soule ay	Blissed worþe his soule ay!
2874	I rede þat þu hire take	I rede þat þu hire take,
2875	And spuse and curteyse make	And spuse, and curteysye make;
2876	For she is fayr and she is fre	For she is fayr, and she is fre,
2877	And al so hende so she may be	And al so hende so she may be.
2878	Þertekene she is wel with me	Þertekenẹ she is wel with me,
2879	Þat shal ich ful wel shewe þe	Þat shal ich ful wel shewe þe
2880	For ich giue þe a giue	For ich wilẹ giue þe a giue,
2881	Þat euere more hwil ich liue	Þat euere-more, hwil ich liue,
2882	For hire shal tu be with me dere	For hirẹ shal-tu be with me dere,
2883	Þat wile ich þat þis folc al here	Þat wile ich þat þis folc al here.’
2884	Þe erl ne wolde nouth ageyn	Þe erl ne wolde nouht ageyn
2885	Þe king be for knith ne sweyn	Þe kinge be, for kniht ne sweyn,
2886	Ne of þe spusing seyen nay	Ne of þe spusing seyen nay,
2887	But spusede þat ilke day	But spusede hire þat ilke day.
2888	Þat spusinge was god time maked	Þat spusingẹ was in god time maked,
2889	For it ne were neuere clad ne naked	For it nẹ werẹ neuere clad ne naked
2890	In a þede samened two	In a þede samened two
2891	Þat cam to gidere liuede so	Þat cam to-gidere, liuẹde so,
2892	So þey dide al here liue	So þey diden on al herẹ liue:
2893	He geten samen sones fiue	He geten samen sones fiue,
2894	Þat were þe beste men at nede	Þat werẹ þe beste men at nede
2895	Þat mouthe riden on ani stede	Þat mouhte riden on ani stede.
2896	Hwan gunnild was to cestre brouth	Hwan Gunnild was to Cestre brouht,
2897	Hauelok þe gode ne for gat nouth	Hauelok þe gode ne for-gat nouht
2898	Bertram þat was the erles kok	Bertram, þat was the erles kok,
2899	Þat he ne dide callen ok	Þat he ne dide him callen ok,
2900	And seyde frend so god me rede	And seyde, ‘Frend, so God me rede,
2901	Nu shaltu haue riche mede	Nu shaltu haue riche mede
2902	For wissing and þi gode dede	For wissing, and þi gode dede
2903	Þat tu me dides in ful gret nede	Þat tu me dides in ful gret nede.
2904	For þanne y yede in mi cuuel	For þanne y yede in mi cuuel,
2905	And ich ne haue bred ne sowel	And ich ne hauẹde bred ne sowel,
2906	Ne y ne hauede no catel	Ne y ne hauẹde no catel,
2907	Þou feddes and claddes me ful wel	Þou feddes and claddes me ful wel.
2908	Haue nu for þi of cornwayle	Hauẹ nu for-þi of Cornwayle
2909	Þe erldom ildel with uten fayle	Þe erldom ilk del, with-uten fayle,
2910	And al þe lond þat godrich held	And al þe lond þat Godrich held,
2911	Boþe in towne and ek in feld	Boþe in towne and ek in feld;
2912	And þerto wile ich þat þu spuse	And þerto wile ich þat þu spuse,
2913	And fayre bring hire un til huse	And fayre bring hire un-til huse,
2914	Grimes douther leuiue þe hende	Grimes douhter, Leuiue þe hende,
2915	For þider shal she with þe wende	For þider shal she with þe wende.
2916	Hire semes curteys forto be	Hirẹ semes curteys forto be,
2917	For she is fayr so flour on tre	For she is fayr so flour on tre;
2918	Þe heu is swilk in hire ler	Þe heu is swilk in hire ler
2919	So þe rose in roser	So is þe rose in roser,
2920	Hwan it is fayr sprad ut newe	Hwan it is fayre sprad ut newe
2921	Ageyn þe sunne brith and lewe	Ageyn þe sunne briht and lewe.’
2922	And girde him sone with þe swerd	And girde him sone with þe swerd
2923	Of þe erldom bi forn his ferd	Of þe erldom, bi-forn his ferd,
2924	And with his hond he made him knith	And with his hond he made him kniht,
2925	And yaf him armes for þat was rith	And yaf him armes, for þat was riht,
2926	And dide him þere sone wedde	And dide him þere sone wedde
2927	Hire þat was ful swete in bedde	Hirẹ þat was ful swete in bedde.

2928	After þat he spused wore	After þat he spused wore,
2929	Wolde þe erl nouth dwelle þore	Wolde þe erl nouht dwelle þore,
2930	But sone nam until his lond	But sone nam until his lond,
2931	And seysed it al in his hond	And seysed it al in his hond,
2932	And liuede þer inne he and his wif	And liuẹde þer-inne, he and his wif,
2933	An hundred winter in god lif	An hundred winter in god lif,
2934	And gaten mani children samen	And gaten mani children samen,
2935	And liueden ay in blisse and gamen	And liuẹden ay in blisse and gamen.
2936	Hwan þe maydens were spused boþe	Hwan þe maydens werẹ spused boþe,
2937	Hauelok anon bigan ful rathe	Hauelok anon bigan ful rathe
2938	His denshe men to feste wel	His Denshe men to feste wel
2939	Wit riche landes and catel	With riche landes and catel,
2940	So þat he weren alle riche	So þat he weren alle riche:
2941	For he was large and nouth chinche	For he was large and nouht chiche

2942	Þer after sone with his here	Þer-after sone, with his here,
2943	For he to lundone forto bere	For he to Lundonẹ, forto bere
2944	Corune so þat it sawe	Corune, so þat alle it sawe,
2945	Henglishe ant denshe heye and lowe	Englishe and Denshe, heye and lowe,
2946	Hwou he it bar with mikel pride	Hou he it bar with mikel pride,
2947	For his barnage þat was un ride	For his barnage þat was un-ride.

2948	Þe feste of his corunig	Þe feste of his coruning
2949	Laste with gret ioying	Lastede with gret ioying
2950	Fourti dawes and sumdel mo	Fourti dawes, and sumdel mo;
2951	Þo bigunnen þe denshe to go	Þo bigunnen þe Denshẹ to go
2952	Vn to þe king to aske leue	Vn-to þe king, to aske leue,
2953	And he ne wolde hem nouth greue	And he ne wolde hem nouht greue
2954	For he saw þat he woren yare	For he saw þat he worẹn yare
2955	In to denemark for to fare	In-to Denemark for to fare;
2956	But gaf hem leue sone anon	But gaf hem leue sone anon,
2957	And bitauhte hem seint iohan	And bitauhte hem seint Iohan;
2958	And bad ubbe his iustise	And bad Ubbe, his iustise,
2959	Þat he sholde on ilke wise	Þat he sholde on ilke wise
2960	Denemark yeme and gete so	Denemark yeme and gete so,
2961	Þat no pleynte come him to	Þat no pleynte come him to.

2962	Hwan he wore parted alle samen	Hwan he worẹ parted alle samen,
2963	Hauelok bi lefte wit ioie and gamen	Hauelok bi-lefte with ioie and gamen
2964	In engelond and was þer inne	In Engelond, and was þer-inne
2965	Sixti winter king with winne	Sixti winter king with winne,
2966	And goldeboru quen þat i wene	And Goldẹboru quen, as þat i wene:
2967	So mikel loue was hem bitwene	So mikel loue was hem bitwene,
2968	Þat al þe werd spak of hem two	Þat al þe werd spak of hem two
2969	He louede hire and she him so	He louẹde hire, and she him so,
2970	Þat neyþer oþe mithe be	Þat neyþer oþer mihte be
2971	Fro oþer ne no ioie se	Fro oþer, ne no ioie se
2972	But yf he were to gidede boþe	But-yf he were to-gidẹre boþe;
2973	Neuere yete ne weren he wroþe	Neuere yete ne werẹn he wroþe,
2974	For here loue was ay newe	For here loue was ay newe;
2975	Neuere yete wordes ne grewe	Neuere yete wordes ne grewe
2976	Bitwene hem hwar of ne lathe	Bitwene hem, hwar-of no lathe
2977	Mithe rise ne no wrathe	Mihte rise, ne no wrathe.

2978	He geten children hem bi twene	He geten children hem bi-twene
2979	Sones and douthres rith fiuetene	Sones and douhtres riht fiuetene,
2980	Hwar of þe sones were kinges alle	Hwar-of þe sones werẹ kinges alle,
2981	So wolde god it sholde bifalle	So wolde god it sholdẹ bifalle;
2982	And þe douhtres alle quenes	And þe douhtres alle quenes:
2983	Him stondes wel þat god child strenes	‘Him stondes wel þat god child strenes.’ -
2984	Nu haue ye herd þe gest al þoru	Nu haue ye herd þe gest al þoru
2985	Of hauelok and of goldeborw	Of Hauelok and of Goldeborw;
2986	Hw he weren born and hw fedde	Hu he werẹn boren, and hu fedde,
2987	And hwou he woren with wronge ledde	And hou he woren with wronge ledde
2988	In here youþe with trecherie	In here youþe, with trecherie,
2989	With tresoun and with felounye	With tresoun, and with felounye;
2990	And hwou þe swikes haueden thit	And hou þe swikes haueden tiht
2991	Reuen hem þat was here rith	Reuen hem þat was herẹ riht,
2992	And hwou he weren wreken wel	And hou he weren wreken wel,
2993	Haue ich sey you euerildel	Haue ich seyd you euerilk del;
2994	And forþi ich wolde biseken you	Forþi ich wolde biseken you
2995	Þat hauen herd þe rim nu	Þat hauen herd þe rime nu,
2996	Þat ilke of you with gode wille	Þat ilke of you, with gode wille,
2997	Seye a pater noster stille	Seye a pater-noster stille,
2998	For him þat haueth þe rym maked	For him þat hauẹth þe ryme maked,
2999	And þer fore fele nihtes waked	And þer-forẹ fele nihtes waked;
3000	Þat iesu crist his soule bringe	Þat Iesu Crist his soule bringe
3001	Bi forn his fader at his endinge	Bi-forn his fader at his endinge.
3002	A—M—E—N	A—M—E—N.